Türkiyə: Xocalı soyqırımının 28-ci ildönümünü əks etdirən veriliş

“Bengü Türk” televiziya kanalında yayımlanan “Azərbaycan ruzigarı” proqramının buhəftəki verilişi Xocalı soyqırımının 28-ci ildönümünə həsr olunub. Həmyerlimiz Səidə Ömərin müəllifi və aparıcısı olduğu verilişin budəfəki qonağı sosial elmlər üzrə ekspert, türkiyəli yazıçı Mətin Yıldırım və jurnalist Ağası Hun Məmmədli olub. Xocalı hadisələrinin mahiyyəti, səbəbləri, faciənin acı nəticələri barədə ətraflı fikir mübadiləsi aparılıb.

Xocalı soyqırımı və “Xocalıya ədalət!” beynəlxalq kampaniyası haqqında ətraflı məlumat verən aparıcı Səidə Ömər 1992-ci il fevralın 25-dən 26-na keçən gecə Xocalıda erməni silahlı birləşmələrinin törətdiyi vəhşiliklərdən danışıb. O bildirib ki, “Xocalıya ədalət!” kampaniyası beynəlxalq ictimaiyyəti məlumatlandırmaq baxımından çox önəmlidir. Dünya birliyi ermənilər tərəfindən törədilmiş bu barbarlığı, Ermənistanın əsl üzünü görməlidir.

Aparıcı həmçinin qeyd edib ki, Heydər Əliyev Fondunun vitse-prezidenti, Dialoq və Əməkdaşlıq Uğrunda İslam Konfransı Gənclər Forumunun Mədəniyyətlərarası Dialoq üzrə baş əlaqələndiricisi Leyla Əliyevanın təşəbbüsü ilə 2008-ci il mayın 8-də elan edilən “Xocalıya ədalət!” beynəlxalq təbliğat və məlumatlandırma kampaniyası dünyanın 40-dan çox ölkəsində həyata keçirilib. Ədalət öz yerini tutana qədər “Xocalıya ədalət!” kampaniyası davam edəcək. “Xocalıya ədalət!” beynəlxalq kampaniyası çərçivəsində həyata keçirilən tədbirlər nəticəsində yalan və saxtakarlıq üzərində qurulmuş erməni təbliğat maşınının iç üzü ifşa olunur. Artıq Xocalı faciəsinin soyqırımı olması faktı dünyanın bir çox ölkələrinin və beynəlxalq təşkilatların qərarlarında, qətnamələrində əksini tapır.

Mətin Yıldırım bildirib ki, tarixdə bir neçə qətliamlar, faciələr, soyqırımı faktlarına rast gəlmişik. Lakin Xocalı soyqırımı o faciələrin hamısından fərqlidir. Ermənilərin Xocalıda bir gecədə 600-dən çox insanı, o cümlədən uşaq, qoca və hamilə qadınları xüsusi qəddarlıqla qətlə yetirmələri misli görünməmiş amansızlıqdır. Xocalıda soyqırımı insanlığa qarşı törədilmiş bəşəri cinayətdir. O bildirib ki, dünya ictimaiyyəti bu cür vəhşiliklərə göz yummamalıdır. İkili standartlara son qoyulmalı, cinayətkarlar layiq olduqları cəzanı almalıdırlar. Əks halda bəşəriyyət bundan da ağır cinayətlərlə üzləşəcək.

Xocalıda törədilənlər əsl soyqırımıdır. Bu qətliam dünyanın gözü qarşısında törədilib. Təəssüflər olsun ki, faciənin günahkarları hələ də ədalət qarşısına çıxarılmayıb və layiq olduqları cəzanı almayıblar. Çıxışını bu sözlərlə başlayan jurnalist Ağası Hun Məmmədli deyib ki, Xocalı soyqırımında günahsız körpə və uşaqlar, qadın və qocalar qətlə yetiriliblər. Belə faciənin ağrı-acısı unudulmur və hər zaman bizim ürəyimizdə yaşayacaq. Xocalıda törədilənlər, sadəcə, hərbi cinayət kimi dəyərləndirilə bilməz. Bu, bəşəri bir cinayət, Azərbaycan xalqına, insanlığa qarşı məqsədli və planlı surətdə törədilən soyqırımıdır. Ona görə də Xocalı faciəsi ilə bağlı həqiqətlərin beynəlxalq ictimaiyyətə daha geniş çatdırılması mühüm və təxirəsalınmaz məsələdir. “Xocalıya ədalət!” Qarabağ probleminin Azərbaycanın ərazi bütövlüyü və hüquqlarının qorunması şərti ilə həll olunmasında vacib bir fəaliyyətdir. Xocalı soyqırımının tanıdılması Dağlıq Qarabağ probleminin ədalətli həllinin bünövrəsidir”.

“Allah Xocalı qurbanlarına rəhmət etsin, bizə isə qətliamın günahkarlarını ədalət məhkəməsində görmək qismət olsun”, - deyə o vurğulayıb.

Verilişin sonunda Xocalı soyqırımından bəhs edən fraqmentlər nümayiş etdirilib.

Esmira YAZKAN ASLANOVA,

“Respublika” qəzetinin Türkiyə üzrə müxbiri

Respublika.- 2020.- 25 fevral.- S.6.