İstanbulda keçirilən yürüş

İstanbulda keçirilən “Şam işığında Xocalıya Ədalət” yürüşündə bu soyqırımı aktına siyasi və hüquqi qiymətin verilməsi, eləcə də bu qanlı hadisəni törədənlərin layiqincə cəzalandırılması tələb olunub. Yürüşdə ictimaiyyət nümayəndələri, İstanbulda təhsil alan azərbaycanlı tələbələr, türkdilli xalqların ictimai birliklərinin əməkdaşları, yerli əhali və media nümayəndələri iştirak ediblər.

Tədbir İstanbul Türkiyə-Azərbaycan Dərnəyi (İSTAD) və Azərbaycanlıların və digər Türkdilli Xalqların Əməkdaşlıq Mərkəzi (ATXƏM) tərəfindən təşkil olunub.Yürüş şəhərin tarixi bölgələrindən olan Kadıköy rayonunun Bahariyyə prospekti boyunca davam edib. Eyni bölgədə yerləşən Sürəyya Operasının qarşısında toplanan yürüş iştirakçıları tərəfindən Xocalı soyqırımına siyasi və hüquqi qiymətin verilməsi istiqamətində bəyanat səsləndirilib.

Tədbirdə çıxış edən İSTAD-ın rəhbəri Səfər Qaraqoyunlu bildirib ki, Xocalı soyqırımı yalnız azərbaycanlılara deyil, bütün insanlığa qarşı törədilmiş cinayətdir. Bu səbəbdən Xocalıya ədalət üçün bütün dünya Azərbaycanı tam dəstəkləməlidir: “Təəssüflər olsun ki, Ermənistan hələ də öz işğalçılıq siyasətini davam etdirir və beynəlxalq təşkilatların onun işğal olunmuş Azərbaycan torpaqlarından çıxması ilə bağlı verdiyi qərarlara məhəl qoymur. Erməni silahlı qüvvələri hələ də Azərbaycan torpaqlarını işğaldan azad etmək istəmir. Xocalı kimi dəhşətli bir soyqırımı aktını törətdiklərinə baxmayaraq, Türkiyəyə qarşı əsassız soyqırımı iddiaları irəli sürən ermənilər özlərini dünyaya məzlum xalq kimi təqdim edirlər, lakin dünyanın gözü qarşısında baş vermiş bu soyqırımı aktını törədən məhz həmin ermənilərdir. Bu qanlı hadisəni törədənlərin cəzasız qalması bütün bəşəriyyətə qarşı cinayətdir”.

ATXƏM-in sədri İlham İsmayılov bildirib ki, 1988-ci ildən başlamış Ermənistan-Azərbaycan, Dağlıq Qarabağ münaqişəsi dövründə ən faciəli hadisələrdən biri Xocalıda baş vermiş soyqırımıdır. O bildirib ki, Xocalı faciəsi XX əsrin ən dəhşətli və ən qəddarcasına törədilmiş Xatın, Xiroşima faciələri ilə bir sırada durur. Belə ki, bir gecədə qədim Xocalı şəhəri yerlə yeksan edilib. 1992-ci ilin fevral ayının 25-dən 26-na keçən gecə Ermənistan silahlı qüvvələri 366-cı motoatıcı alayının zirehli texnikasının və hərbi heyətinin köməyi ilə Xocalı şəhərində soyqırımı törədərək 63-ü uşaq, 106-sı qadın, 70-i qoca olmaqla 613 nəfər Xocalı sakinini qətlə yetirib. Soyuq, qarlı fevral gecəsində yüzlərlə soydaşımız əsir düşüb, girov götürülüb. Son iki əsr ərzində ermənilər zaman-zaman türklərə, eyni zamanda azərbaycanlılara qarşı amansız terror və soyqırımı aktları həyata keçirib, yaşayış bölgələrində etnik təmizləmə siyasəti aparıblar. Qeyd olunub ki, ermənilərin apardıqları bu etnik təmizləmə və soyqırımı siyasətinin ağır nəticələrini son iki əsr ərzində milyonlarla müsəlman öz üzərlərində hiss ediblər.

Türkiyəli yazıçı Mətin Yıldırım çıxışında erməni yalanlarına və onların işğalçılıq siyasətinə qarşı mübarizə aparmaq üçün qardaşlıq bağlarının daha da gücləndirilməsinin vacib olduğunu vurğulayıb. Bildirib ki, bu gün dünyanın əsas meqapolislərindən biri olan İstanbulda Xocalı soyqırımı qurbanlarının xatirəsinin yad edilməsi hər şeydən əvvəl qardaşlıq borcudur.

Yürüş boyu “Xocalıya Ədalət”, “Qarabağ Azərbaycan torpağıdır”, “İşğalı dayandır!”, “Ermənistan, işğal etdiyin torpaqları azad et” kimi şüarlar səsləndirilib. Sürəyya Operasının qarşısında Xocalı soyqırımı qurbanlarının xatirəsinə şamlar yandırılıb.

Esmira Yazkan ASLANOVA,

Respublika.- 2020.- 28 fevral.- S.5.