Lider-millət vəhdəti - qələbəyə aparan yolun təminatı

Haqq yolunda, öz azadlığı uğrunda tökülən qanlar millətin ruhunu çəkic dəmiri döyən kimi döyüb itiləyir, möhkəmləndirir və yalnız bir halda ərsəyə gələn qılınc əsrlər boyu öz kəsərini itirmir əgər onu tutan əl həqiqi bir qəhrəmana-liderə məxsus olursa. “El bir olsa, dağ oynadar yerindən; Güc bir olsa, zərbi kərən sındırar”. 14 iyulda millətin orduya və dövlətə dəstək üçün keçirdiyi möhtəşəm yürüş məhz dağı yerdən oynadacaq gücdə idi. Bir milləti millətlər arasında ən uca bir zirvəyə qaldırıb, haqqında dastan qoşduran da onun lideri, qəhrəmanı olur. Daha dəqiq desək, bir millətin lideri varsa və millət öz lideri ilə bir vəhdət halındadırsa, o millət yaşayacaq, heç bir təhlükə onu sındıra, öz yolundan edə bilməyəcək. Məhz millətinə arxalanan, millətindən güc alan bir Lider Azərbaycan Respublikasının Prezidenti İlham Əliyev belə əminliklə deyir ki, “Ordu dövlətçiliyi, bizim seçimimizi, müstəqil siyasətimizi qoruyur. Xalq isə ordunu qoruyur və qorumalıdır”.

Bütün bu proseslərdə gözlə görünməyən çox əhəmiyyətli bir faktı təkrar vurğulamaq istəyirik. Azərbaycan Prezidenti ölkəsi və milləti üçün nə edirsə, iki faktı daim əlində rəhbər tutur: Azərbaycan bir hüquqi dövlət kimi bütün beynəlxalq prinsiplər çərçivəsində hərəkət edir və Azərbaycanın milli-mənəvi dəyərləri, milli marağı və kimliyi hər şeydən uca tutulmalıdır. Bunu isə məhz milli Lider edə bilər. Xatırladaq ki, müasir dünyanı idarə edən dəyərlər dəyişib, millətləri, xalqları köləyə çevirən vasitələri zahiri görkəmindən nəinki tanımaq olmur, hətta onu ən doğma, dost kimi qəbul etmək bir zərurətə çevrilib. Ən təhlükəlisi isə millətlərin öz içlərindən özlərinə düşmən yetişdirib, dövlətləri öz içindən yıxmaq super dövlətlərin siyasətinin az qala başlıca xəttinə çevrilib. Ancaq müasir Azərbaycanda gedən inkişaf prosesini, dövlət başçısının millətlə necə yaxın, doğma əlaqələr qurmasını izləyəndə belə qənaətə gəlirsən ki, Lider millətin arxasında durur ki, o da ona dayaq olsun!

2020-ci il sınaqlarla başlandı və hələ də davam edir: iqtisadi böhran, neftin ucuzlaşması, COVİD-19 bəlasının gətirdiyi pandemiya. Azərbaycanın payına bir sınaq da artıq düşüb - mənfur qonşunun hücumlarından qorunmaq. Bu ağır günlərdə Azərbaycan xalqının güvəndiyi çox şey var: qədim tarixi, zəngin sərvəti, polad kimi möhkəm ruhlu xalqı, başlıcası isə xalqı ilə bir yerdə olan Lideri. 14 iyul yürüyüşü Azərbaycan xalqının bütün sınaqlara hazır olduğunun göstərici oldu.

Düz 32 il sonra Bakının meydan və küçələrini dolduran millət yenə haqq səsini qaldırdı. Baxış bucaqları fərqlidir, ancaq bizim fikrimizə görə, milli ruhun qalxması, bu gecənin başlanğıcı Ramil Səfərovun ekstradisiyası ilə qoyuldu. Cənab Prezidentin öz sözləri ilə desək, “ədalət bərpa edildi”, “Azərbaycan öz zabitini vətənə qaytardı”, Azərbaycan öz vətəndaşına, oğluna sahib çıxdı. Təbii ki, ekstradisiya haqqında beynəlxalq aləmdə fərqli rəylər, hətta hədə-qorxular səslənsə də, Azərbaycan Respublikasının Prezidenti İlham Əliyevin öz qərarı üzərində dönməz qalması millətin sanki passivləşmiş, sönmüş cəsarətini oyatdı.

Ruhun yüksəlməyinə doğru atılan ikinci addım isə Milli Qəhrəman Mübariz İbrahimovun öz millətinə yaşatdığı qürur hissi və bu qüruru daha da böyüdən, öz əsgərinin arxasında millətin Liderinin, Ali Baş Komandanın dağ kimi durması oldu. Bir gecəlik hadisədə nə qədər böyük mətləblər yatır! Ata-anasına yazdığı məktubuna da dediyi kimi, Mübariz Vətəni üçün şəhid olmağa gedir və tək başına cəbhəni yara bilir. Bu, bir gizirin deyil, ordunun ruhu idi. İstənilən anda düşməni yox etmək gücünə malik olması yalnız bir oğulun əməlində üzə çıxdı. Mübarizdən sonra həlak olan Fərid Əhmədov da bunu öz canı və qanı ilə təsdiqlədi. Onlarla vida mərasimində Ali Baş Komandan məhz bu məqamı vurğuladı: “Bizim ordumuzda minlərlə, on minlərlə Mübariz kimi, Fərid kimi qəhrəmanlar vardır. Onlar Ali Baş Komandanın əmrini gözləyirlər. Onlar öz doğma torpaqlarını azad etmək üçün hər an hazırdırlar. Azərbaycan Ordusu Cənubi Qafqazda ən qüdrətli, ən peşəkar, ən mübariz ordudur və şəhidlərimizin qəhrəmanlığı bunu bir daha sübut edir. Bizdə nəinki böyük sayda silah-sursat, hərbi texnika, döyüş imkanları vardır, eyni zamanda, ordumuzda böyük ruh yüksəkliyi vardır. Çünki bizim işimiz haqq işidir. Biz heç bir ölkənin torpağını zəbt etməmişik. Bizim torpaqlarımız uzun illərdir ki, işğal altındadır. Bizim heç bir başqa dövlətin torpağına iddiamız yoxdur. Amma öz torpağımızdan heç kimə bir qarış verməyəcəyik. Biz öz ərazi bütövlüyümüzü bərpa edəcəyik. Mübarizlə Fərid başqa ölkənin ərazisində həlak olmamışlar, öz doğma torpağında şəhid olmuşlar”.

Ali Baş Komandan gördüyü hər işində yüksək təvazökarlıq göstərir, hər işin öhdəsindən məhz millətin gəldiyini vurğulayır. Əslində, bu, böyük həqiqətdir, çünki millət və həqiqi Lider bir-birindən ayrılmaz fenomenlərdir. Məsələnin mahiyyətinə baxsaq, Liderin öz millətinin birliyinin nüvəsi olması nəinki təəccüblü deyil, əksinə, zərurətdir. Prezident deyir: “Bu aylar ərzində bütün Azərbaycan Fəridin, Mübarizin ailələrinin yanında idi. Azərbaycan xalqı həmrəylik göstərmişdir. Mən bilirəm, bütün bu aylar ərzində vətəndaşlarımız, müxtəlif bölgələrdə yaşayan vətəndaşlar şəhid övladlarımızın ailələrinə baş çəkib başsağlığı vermiş, öz həmrəyliyini göstərmişlər. Mübarizin və Fəridin qısa və şərəfli həyatı Azərbaycan xalqını daha da birləşdirdi”.

Əlbəttə, bu ərəfədə cəbhədə bir çox əhəmiyyətli proseslər gedirdi. Hər şeydən əvvəl, Ali Baş Komandanın düzgün kadr siyasəti orduya yeni bir döyüş ruhu bəxş eləmişdi. 2014-cü ilin noyabr ayında düşmən helikopterini vuran hərbiçimizlə bərabər, az qala bütün millət hayqırdı: “Vur, komandir, vur!” Çox əhəmiyyətli bir faktdır ki, uzun illər ərzində yalnız faciəli günlərində əlbir-dilbir olan xalq artıq döyüş ruhu ilə də birləşməyə başlamışdı. Əslində, millətin yalnız matəmli, qara günlərdə birləşməsi çox kədərli bir faktdır - millətin kədərli, ağlayan ruhunun gözünün yaşını silmək, onu sakitləşdirmək, üstəlik onu öz qüvvəsinə inandırıb təkrar ayağa qaldırmaq. Torpaqların 20%-ni itirmək, 1 mln. qaçqınını yerləşdirmək, öz Vətənindən didərgin düşmüş insanlara qucaq açmaq, onların sosial-psixoloji problemlərini həll etmək və bunlarla paralel olaraq onlarda sağlam, düşmənə, qara qüvvəyə sinə gərə bilən bir ruh tərbiyə etmək bəlkə də əsrlərin işi olardı, bəlkə də heç mümkün olmazdı. Amma İlham Əliyev bu prosesi tezləşdirdi. Öz xalqının qarşısında etdiyi hər çıxışında onları əmin etdi ki, siz tək deyilsiniz, çünki “mən hər vətəndaşın Prezidentiyəm”. Respublikanın Prezidenti ölkənin bütün bölgələrinə səfərlərini xarici səfərlərdən daha vacib bildi, ən xoş məqamını - ad gününü belə sadə insanların yanında qeyd etdi. Onların inamını, etibarını qazanmaq, özünün onların arxa dayağı olduğunu sübut etməklə yanaşı, onların mütləq öz dədə-baba yurdlarına qayıdacaqlarına əmin etmək böyük mənəvi güc tələb edirdi.

Azərbaycan sabit və davamlı bir inkişaf yolu keçir və xalq hər addımda Liderin dəstəyini, gücünü hiss elədikcə, bu inkişafla bərabər Lider-Xalq vəhdəti də böyüyür və möhkəmlənir. Bəli, Azərbaycan hər addımı, hər uğuru ilə bütün dünyaya car çəkir ki, o, sülh ölkəsidir, hər bir qonşusu ilə əmin-aman şəraitdə yaşaya bilər, dar gündə ona dəstək dura bilər. Bu çağırışda daha bir vurğu var: biz mənfur düşməni silahsız da gücümüz qarşısında çökdürə bilərik. Bu gün hər mənada çökmüş Ermənistan buna canlı nümunədir.

Nəhayət, 2016-cı ilin aprel ayında 4 günlük müharibə başladı. Azərbaycan milləti nəinki ayağa durdu, həm də aslan kimi kükrədi. Belə bir silahlı toqquşma Ermənistan - Azərbaycan münaqişəsində nə ilk, nə də sonuncu idi. Hələ 1988-ci ildə əvvəlcə Ermənistanda etnik təmizləmə siyasətinin aparılması və azərbaycanlıların öz dədə-baba yurdlarından amansızca qovulması prosesi daha sonra Qarabağ torpaqlarına irəli sürülən əsassız iddia və başlanan müharibə, 20% torpaqların işğalı və atəşkəs rejimi olmasına baxmayaraq, hər gün xain hücumlarla davam etməkdədir. Artıq 20 ildən artıq bir müddət ərzində Azərbaycan ərazisi atəşə tutulur, dinc sakinləri zərər görür, uşaqları, yaşlıları, qadınları qəddarcasına qətlə yetirilir, zəmiləri yandırılır, axar suları zəhərlənir. Aprel döyüşləri və ya el arasında Dördgünlük müharibə bir növ bu savaşların ilk dönüş nöqtəsi ola bildi. Ancaq bu nöqtə nə təsadüfdür, nə də bəxtin gətirməsi. Aprel döyüşləri, qeyd etdiyimiz kimi, özündə bir çox əhəmiyyətli məqamları birləşdirir. Yəni bu hadisə sadəcə növbəti bir atəşkəs pozulmasına verilən cavab olmadı. Bu, əsrlərdir türk adından tülkü kimi qorxan, ancaq öz adını zəif qoca və uşaqları xaincəsinə öldürməklə qəhrəman çıxartmaq istəyən alçaq düşmənə öz yerini göstərmək idi. Necə deyərlər, “Aslan aslandı, yaralı da olsa, çaqqal çaqqaldı, arxalı da olsa”. Bəli, illərdir Azərbaycan düşdüyü siyasi və hərbi oyunlarda yaralı düşmüş bir aslan kimi idi və Aprel döyüşləri bu yaraların artıq sağaldığının və yenə də ətrafındakı çaqqal-çuqqallarda vahimə yaratdığının sübutu oldu.

Aprel döyüşlərinin bununla yanaşı, başqa bir əhəmiyyətli rolu da bu oldu ki, zənnimizcə, düşmənə verilən dərslərin hamısından daha öndə durmağa layiqdir. Bu, Liderin öz millətinin inamını təkrar özünə qaytarması idi. Bəli, Azərbaycan xalqı həmişə qəhrəman olmuşdur. Bunu ona xatırlatmaq az idi, onu bu əmələ doğru aparmaq lazım idi ki, millətin Lideri, Ali Baş Komandan cənab İlham Əliyev də məhz bunu bacardı. Aprel döyüşlərinə gələn yol bəlkə də məhz bir gecədə günahsız qətlə yetirilən Yanvar hadisələrindən başlayırdı - ümummilli liderin öz millətini tək qoymadığı məqamdan. Düzdür, bu müddətdə millət çox satqınlıqlar gördü, çox günahsız qurbanlar verdi, çox qəhrəman oğullarını itirdi, ancaq bir Liderinin olduğunu və ən çətin anında üz tuta biləcəyi bir güclü dayağının varlığını unutmadı. Bu inam idi ki, illər ərzində milləti tamamilə sınmağa qoymamışdı. Bu inam idi ki, əvvəl xarici arenada öz adını təsdiqlətməyi bacardı, özünü regionun ən gərəkli və etibarlı tərəfdaşı kimi tanıtdı. Bu inam idi ki, bir əli düşmənlə sərhəddə vuruşub, bir əli ilə quruculuq işləri apara bildi. Nəhayət, bu inam idi ki, aldığı yaralara rəğmən xain düşmənin qarşısında nəinki dimdik durmuşdu, həm də onda vahimə yaratmışdı. Bəli, təsadüfi heç nə yoxdur. Hər şeyin ciddi səbəbi, hər zirvəyə gedən bir aydın yolu vardır. Bu yolu aydınladan, qarşısına çıxan maneələri aşmaq əzmi verən ən güclü vasitə isə inamdır. Aprel döyüşlərinə aparan yolu aydınladan isə Lider - millət vəhdətinə olan inam idi.

Lider və millət arasında gedən birləşmə, tamamlanma prosesinin kulminasiya məqamı isə 14 iyulda yaşandı. Heç bir millət önündə həqiqi bir Lider olmasa, sel gücünü ortaya çıxara bilməz, heç bir Lider arxasında milləti durmasa, Qəhrəman və Qurucu ola bilməz. Lidersiz heç bir toplu millət kimi özünü təsdiq edə bilməz, heç bir Lider millətsiz tarixdə qala bilməz!

Belə millətin bir nümayəndəsi olmaq böyük qürurdur. Belə cəmiyyətdə və belə bir çətin dövrdə öz yerini, öz missiyanı anlamaq isə borcdur, öhdəlikdir. “Əczaçılar klubu” İctimai Birliyinin yaranması həmin öhdəliyin ifadəsidir. Pandemiyanın ilk günlərindən millətin Liderinin cənab Prezident İlham Əliyevin çağırışına qoşulmağımız, risk qrupuna daxil olan əczaçıları səfərbər etmək ilk işimiz oldu. KİV vasitəsilə həm həmkarlarımıza, həm bizimlə daim ünsiyyətdə olan əhalimizə müraciətlərimiz, həm Ümumdünya Səhiyyə Təşkilatı ilə əməkdaşlıq edib maarifçilik işimizi artırmağımız, həm dərman preparatlarının Azərbaycanın rayonlarına çatdırmaq üçün Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası layihələrə qoşulmağımız bizim vətəndaş kimi edə bildiklərimizin yalnız başlanğıcıdı. Bütün əməllərimizin isə bir məqsədi var: 14 iyulda Liderinə, ordusuna arxa, dəstək çıxan millət qələbəni də belə coşqu ilə yaşayan zaman həmin sevinc və qürurda biz əczaçıların da haqlı payı olsun.

Şövqi BÜNYATOV,

“Əczaçılar Klubu” İctimai Birliyinin

İdarə Heyətinin sədri.

Respublika.- 2020.- 22 iyul.- S.4.