DOST HAQQINDA DÜŞÜNCƏLƏR

Mən dostluğa, dost andına, dost sədaqətinə və bu sədaqətin dönməzliyinə inanan adamların cərgəsindəyəm və belə mənəvi sərvətlərin bəhrəsini həmişə görmüşəm.

Dostluğun mahiyyəti, faydası, dost ünsiyyətinin qiyməti, səfası, cəfası barədə bədii ədəbiyyatımızdan istənilən qədər misal gətirmək mümkündür. Böyük Nazim Hikmət dostluq haqqında necə də sərrast, obrazlı fikir söyləyib: “Dostluq ağac kimidir, əgər o ağac qurusa, bir daha göyərməz...”.

Mən bu yazıda bir dostum haqqında bildiklərimdən danışmağı vacib saydım.

Dilafət Hacıyevi az qala qırx ildir ki, yaxından tanıyıram. Xeyirdə, şərdə bir yerdəyik, rayonlara, kəndlərimizə səfər etmişik, onunla saysız-hesabsız məclislərdə olmuşuq, bütün rayonlarda tanışlarımız var, çörək kəsdiyimiz adamlar da az deyil.

Onların arasında əsl kişilər, comərd, birüzlü, səmimi şəxslərlə yanaşı, simasız, yaltaq, şərəfsiz kəslər də olub ki, belə hallar məni qəti təəccübləndirməyib. “Bağda ərik var idi...” psixologiyası ilə ömür sürən adamlar da kifayət qədərdir.

Çünki adamı tanımaq çətin məsələdir. Biz kainatı öyrənirik, yeni planetlər tapırıq, yeni ulduzlar kəşf edirik, amma illərlə ünsiyyətdə olduğumuz adamı bəzən tanıya bilmirik, yaxşıları kəşf etməkdə acizik...

Dilafət Hacıyev Bərdədən Bakıya gələndə kirayədə qalmaq üçün adicə bir mənzil tapınca xeyli əziyyət çəkməli olmuşdu. İndi şükürlər olsun ki, yeni tikilmiş çoxmərtəbəli binaların birində geniş, rahat evinin qapısı qohum, dost üzünə həmişə açıqdır. Mən də o işıqlı mənzildə olmuşam. Həmin mənzildə sədaqətli ömür-gün yoldaşı, mehriban balaları, istəkli nəvəsini də tanımışam.

Dostları, tanışları çoxdur Dilafətin. Xarici ölkələrdə dostları, tanışları, həmkarları ilə sıx əlaqələri, işgüzar görüşləri də öz yerində.

İki ali təhsil diplomu var. Ali iqtisadçı diplomundan sonra o ötən il yüz illiyini qeyd etdiyimiz Bakı Dövlət Universitetinin hüquq fakültəsini fərqlənmə diplomu ilə bitirmiş məzunlarından biridir. Və şübhəsiz ki, həqiqi ali təhsil ocağı onun müasir, savadlı bir şəxs kimi formalaşmasında mühüm rol oynayıb, desək, doğru olar.

Həyatda nəyə nail olubsa, onları öz zəhməti hesabına qazanıb. Uğuru, müvəffəqiyyəti xoşbəxt həyatı ona məcməyidə verməyiblər.

Mən bu istiqanlı kişiylə yaxınam, atasını - uzun illər peşə təhsili sistemində çalışmış rəhmətlik Rüstəm kişini tanıyırdım. Qardaşlarını, bacısını tanıyıram. Hətta günlərin bir günü indiki İqtisadiyyat Universitetinin dosenti Dəmir Alməmmədovla (Allah rəhmət eləsin!) birlikdə Bərdəyə, Dilafətin elçiliyinə getmişik. Dilafət doğmalarını çox istəyir, onların güzəranı, dolanışığı həmişə diqqət mərkəzindədir.

Bəzən elə kəslərə rast gəlirik ki, illərlə bacı-qardaşının qapısını açmır, üzünü görmür. Doğmalarına biganə olan adamlardan sənə dost ola bilməz. Belələri heç Vətənə, millətə də gərək deyil. Mənim cənnətlik Zəhra anam deyərdi ki, qohumun yaxşısı yaxşıdır, pisinin başına dönüm...

Dilafətin Ağdam rayonundan olan bir qohumunun ailəsi 1993-cü ildə onun Nərimanov rayonu ərazisində olan evində məskunlaşdı. İki ilə yaxındır ki, həmin ailə dövlətimiz tərəfindən mənzillə təmin olunub. Dilafət deyir ki, o evə bir balaca əl gəzdirib oğlum Elçini evləndirəcəm.

Elçin Azərbaycan İqtisadiyyat Universitetini bitirdikdən sonra təhsilin magistr pilləsini Şimali Kipr Respublikasında Doğu Ağdəniz Universitetində başa vurmuşdur. Qızı Azərbaycan Tibb Universitetini bitirmişdir, həkimdir. Xanımı müəllimdir.

Dilafət nikbin, gülərüz, ünsiyyət qurmağı bacaran, həm də kövrək bir insandır. 20 Yanvar qırğını vaxtı, Xocalı faciəsi günlərində onu hönkürtü ilə ağlayan görmüşəm.

Əmək fəaliyyətinə Bərdədəki texniki peşə məktəbində çilingər işləməklə başlayan Dilafət sonrakı illərdə “Azərittifaq” sistemində, Bakı rayonlarının partiya və icraiyyə komitələrində (sovet dövründə) və başqa idarələrdə çalışmış, fərasəti, işgüzarlığı sayəsində daha da irəli gedərək mərkəzi ali icra orqanında məsul vəzifələrdə çalışaraq xətir-hörmət qazana bilmişdir.

Artıq xeyli vaxtdır ki, Dilafət kiçik sahibkarlıqla məşğuldur. O, yeni iş yerləri yaradaraq onlarla gəncin məşğulluğuna nail olmuşdur.

Dilafət deyir ki, sahibkarlıq özü fitri istedad və qabiliyyət tələb edən sahədir. Dövlətimiz sahibkarlığın inkişafına böyük əhəmiyyət verir, bu sahəyə konkret kömək göstərir.

Keçmiş günlərin söhbətidir. Dostlardan biri məndən soruşdu ki, Dilafət necə adamdır? Dedim ki, o, çox fərasətlidir, göndər, gedib quru ağacı silkələsin, ondan meyvə yığıb gətirsin...

Dilafətin ən böyük arzusu istəkli nəvəsi, 6 nömrəli orta məktəbin əlaçı şagirdi Teymurçinlə birlikdə Ağdamı, Şuşanı, Laçını... görməkdir. Bir də atası Rüstəm kişinin tikdirdiyi köhnə evlərinin yerində müasir bir bina ucaltmaqdır. Allah arzusuna çatdırsın!

Dilafət Hacıyev dostluğa, qardaşlığa layiq şəxsiyyətdir, necə deyərlər, üstünə gediləsi kişidir.

Bu yerdə böyük şairimiz Rəsul Rzanın məşhur misralarını xatırlayıram:

Mən insanam,

Ünsiyyətsiz ölərəm...

Ramiz MƏMMƏDZADƏ.

Respublika. - 2020.- 20 iyun.- S.7.