Musiqişünas alim

Professor, Əməkdar İncəsənət Xadimi Akif Quliyevin adı respublikamızın musiqi ictimaiyyətinə çox yaxşı tanışdır. Onun əsərləri musiqiçilərin stolüstü kitabıdır. Musiqinin müxtəlif janrlarına həsr olunmuş bu kitablar, dərsliklər xaricdə də musiqiçilərin diqqətini özünə çəkmişdir. Akif müəllim hələ Sumqayıt 1 nömrəli musiqi məktəbində, sonra isə Bülbül adına orta ixtisas musiqi məktəbinin tar sinfində oxuyarkən məşhur tarzən, respublikanın tanınmış tarzəni Əhsən Dadaşovdan dərs almışdır. O, 1973-cü ildə Ü.Hacıbəyov adına Azərbaycan Dövlət Konservatoriyasının Musiqi tarixi və nəzəriyyəsi fakültəsinə daxil olmuşdur. Tələbəlik illərində tələbə elmi cəmiyyətinin sədri olmuşdur. Respublika ali məktəblərinin elmi konfranslarındakı çıxışlarına görə fəxri fərmanlara layiq görülmüşdür. A.Quliyev 1978-ci ildə 3 ixtisas üzrə müəllim, musiqişünas və musiqi tənqidçisi kimi konservatoriyanı müvəffəqiyyətlə bitirmişdir.

O, bir müddət Naxçıvan Respublikasının orta ixtisas musiqi məktəbində işlədikdən sonra hərbi xidmətdə olmuş, sonra isə 1981-2006-cı illərdə Azərbaycan Milli Elmlər Akademiyasının Memarlıq və İncəsənət İnstitutunda — “Azərbaycan Xalq Musiqisinin tarixi və nəzəriyyəsi” şöbəsində elmi işçi vəzifəsində işləmişdir. O, burada işlədiyi müddətdə “Azərbaycan xalq musiqisinin antologiyası” adlı çoxcildlik materialın hazırlanmasında fəal iştirak etmişdir.

“Azərbaycan muğamlarının musiqi dramaturgiyasında kontrastlıq prinsipləri” mövzusunda dissertasiya müdafiə edib sənətşünaslıq namizədi elmi dərəcəsi almışdır. Bir dərslik, bir monoqrafiya, iki dərs vəsaiti, 100-dən artıq elmi məqalə və tədris proqramlarının müəllifidir, (“Saz məktəbi”, “Aşıq musiqisinin bəzi tarixi və nəzəri problemləri haqqında”, “Koroğlu” operasında aşıq musiqisindən istifadə xüsusiyyətləri”, “Muğamın musiqi dramaturgiyasına dair”, “Qara Qarayev və Azərbaycan musiqi folkloru”, “Səid Rüstəmovun həyat və yaradıcılığı”, “Muğam və din” və s.). Respublika dövri mətbuatında, elmi məcmuələrdə və radio-televiziyada musiqi sənətinin müxtəlif sahələrini əhatə edən məqalə və çıxışlarla iştirak etmişdir. Elmi işlərlə yanaşı, pedaqoji fəaliyyətlə də uzun müddətdir ki, məşğul olur. Belə ki, 1985-1993-cü illərdə Sumqayıt şəhər musiqi texnikumunda dərs demiş, 1995-ci ildən 2003-cü ilə kimi Bakı Musiqi Akademiyasının Azərbaycan xalq musiqisinin tarixi və nəzəriyyəsi kafedrasında müəllim, baş müəllim, dosent, 2003-cü ildən bu günə kimi Azərbaycan Milli Konservatoriyasının Musiqinin tarixi və nəzəriyyəsi kafedrasında müdir vəzifəsində çalışır. 2003-2010-cu illərdə Azərbaycan Milli Konservatoriyasının Elmi Şuranın katibi vəzifəsində işləmiş, 2009-cu ildən 2014-cü ilə kimi tədris işləri üzrə prorektor vəzifəsini icra etmişdir. 2010-cu ildən kafedranın professoru kimi fəaliyyətimi davam etdirir. 12.10.2012-ci ildən AAK tərəfindən təsdiqini almış, 2003-cü ildən bu günə kimi Bakı Musiqi Akademiyasında təşkil olunmuş Müdafiə Şurasının üzvüdür.

Akif müəllim 1997-ci ildən Azərbaycan Bəstəkarlar İttifaqının üzvüdür. Bir sıra beynəlxalq simpozium və konfranslarda, respublika dövri mətbuatında, elmi məcmuələrdə, radio-televiziyada musiqi sənətinin müxtəlif sahələrini əhatə edən məqalə və çıxışlarına, elmi-pedaqoji fəaliyyətinə görə 2008-ci ildə Respublikanın Əməkdar İncəsənət Xadimi fəxri adına layiq görülmüşdür.

Zabit CAVADOV,

Respublika. - 2020.- 20 iyun.- S.7.