Meliorativ tədbirlər bol məhsula zəmin yaradır

Son illərdə cəbhə bölgəsində yerləşən Tərtər rayonunda bütün sahələrdə dinamik inkişafı görmək olar. Rayon zəhmətkeşləri pambıq və taxıl istehsalında qabaqcıl yerlərdə qərar tutmuşlar. Dövlətimizin başçısı cənab İlham Əliyev Tərtərə son səfəri zamanı ictimaiyyət nümayəndələri ilə görüşdə rayonda gedən inkişafı yüksək qiymətləndirmişdir.

Tərtər rayonu təmas xəttində yerləşməsinə və düşmənin atəşkəs rejimini pozmasına baxmayaraq insanlar heç də əlini işdən soyutmur. Rayon iqtisadiyyatının əsasını təşkil edən aqrar sahədə, o cümlədən əkinçilikdə yüksək nailiyyətlərin əldə olunması davamlı hal almışdır. Bitkiçilikdə yüksək məhsuldarlığın əldə olunması birbaşa suvarma suyuna olan tələbatın vaxtlı-vaxtında ödənilməsindən asılıdır. “Tərtərçay” Hidroqovşağı İstismar İdarəsinin rəisi Emil Hacıyevlə söhbət zamanı bildirdi ki, qeyd olunan müəssisə 1976-cı ildə “Sərsəng” və “Madağız” su anbarlarının istifadəyə verilməsindən sonra yaradılmışdır. “Tərtərçay” Hidroqovşağı Aran Qarabağ massivində 113 min ha əkin sahəsinin suvarılmasına xidmət etməli idi. Qarabağ müharibəsinədək müəssisə Tərtər, Bərdə, Yevlax, Goranboy, Ağdam və Ağcabədi rayonlarının 63 min ha əkin sahəsini suvarma suyu ilə təmin edirdi. Təəssüf hissi ilə qeyd etmək lazımdır ki, “Sərsəng” və “Madağız” su anbarlarının erməni işğalı altına düşməsi nəticəsində təsərrüfatların suvarma suyu ilə təminatında çətinliklər yarandı. Belə ki, sağ və sol magistral kanalları və Hidroqovşaq işğal olunmuş ərazilərdə qaldı. Bundan sonra su nəqli beton üzlüklü magistral kanallar vasitəsi ilə deyil, Yuxarı Çaylı kəndi ərazisində Tərtərçaydan qidalanan 3 torpaq məcralı kanal - Xan arxı, Təley, Xoruzlu kanalları vasitəsi ilə həyata keçirildi. Bundan sonra idarə Tərtər, Bərdə, Yevlax və Goranboy rayonlarının 36300 ha sahəsinə xidmət edə bildi. Mənfur ermənilər adətən suyu qış aylarında açıb Tərtərçaya buraxaraq Sərsəng su anbarını boşaldırlar. Təsərrüfatların suya ehtiyacı olduğu zaman isə suyun qarşısını kəsirlər. Nəticədə əkin sahələrinin suvarma suyu ilə təminatında çətinlik yaranır. Su torpaq məcralı kanallar vasitəsi ilə nəql edildiyinə görə su itkisinin miqdarı həddindən artıq çox olur. Su itkisinin qarşısını almaq məqsədilə idarə vaxtaşırı torpaq kanalların lildən, kol-kosdan və digər çöküntülərdən təmizləmə işlərini həyata keçirir. Qısa müddət ərzində suvarmaya hazırlıqla əlaqədar 135 km kanalda təmizləmə işləri aparılmış və davam etdirilir. Xan arxında, Təley, Qaraqoyunlu, Qaramallı, Şatırlı və Sol sahil magistral kanallarında 103 min kubmetr lildən təmizləmə işləri aparılmış, 31 km torpaq məcralı kanalların beton üzlüyə alınması istiqamətində işlər aparılır. Cari ilin 5 ayı ərzində 8 ədəd hidrotexniki qurğu, 10 ədəd hidrometrik post, 1 km istismar yolunda cari təmir işləri aparılmışdır. Bundan başqa 6,5 km uzunluğunda torpaq və beton məcralı kanallarda cari təmir işləri aparılmış, işlər istismar tədbirləri planına uyğun qaydada davam etdirilir. R-8-1 paylayıcı kanalının 400 m-lik hissəsində təmir-bərpa işləri aparılmışdır. Emil Hacıyev bildirdi ki, idarə lazımi qədər texnika ilə təmin olunmuşdur. İlin əvvəlindən inzibati bina yerləşən ərazidə abadlıq işləri aparılmışdır. Ərazidə minə yaxın cürbəcür meyvə və dekorativ ağaclar əkilərək yüksək aqrotexniki qulluq göstərilir. Bundan əlavə Azərbaycan Respublikasının Birinci vitse-prezidenti Mehriban xanım Əliyevanın təşəbbüsü ilə dahi Azərbaycan şairi İmadəddin Nəsiminin 650 illiyi ilə bağlı keçirilən ağacəkmə aksiyasında Tərtər-Bərdə və Tərtər-Dördyol istiqamətində 1500 ədəd meyvə ağacı, şam ağacları, çinar və başqa ağaclar əkilmişdir. Bundan başqa ölkədə baramaçılığın inkişaf etdirilməsi istiqamətində yem bazasının yaradılması üçün idarəyə aid olan ərazidə Çin Xalq Respublikasından gətirilmiş 1000 ədəd tut tingi əkilmişdir.

Sonda idarə rəisi bildirdi ki, su itkisinin minimuma endirilməsi üçün hazırda kanalların beton üzlüyə alınması prosesi davam etdirilir.

Vəli VƏLİYEV,

Respublika. - 2020.- 23 iyun.- S.4.