Azərbaycan bayrağı həm də Lider-xalq vəhdətinin rəmzidir

XVIII əsrin II yarısı Azərbaycanın siyasi-coğrafi tarixində xüsusi bir dövrdür. Bu dövrdə Azərbaycan ərazisinin ümumi sahəsi, təxmini hesablamalara görə, 380 min kvadratkilometr idi. Azərbaycanın orta əsrlərdəki vahid ərazisində Qacar dövləti ilə Çar Rusiyası arasındakı müharibədə Rusiya qalib gəlir və 1813-cü il Gülüstan və 1828-ci il Türkmənçay müqavilələri nəticəsində Araz çayının şimal hissəsi Qacar dövlətindən alınaraq Rusiyaya birləşdirilir.

1918-ci il mayın 28-də Azərbaycan öz dövlət müstəqilliyini bərpa etdi və müstəqil Azərbaycan Xalq Cümhuriyyəti elan edildi. 23 ay yaşadıqdan sonra bu respublika 1920-ci il aprelin 28-də süqut etdi. 1922-ci il dekabrın ayından Azərbaycan dövlət atributlarına malik - konstitusiyalı, bayraqlı, himn və gerbli müttəfiq respublika kimi SSRİ-nin tərkibinə daxil edildi. 1991-ci ildə isə yenidən Azərbaycanın dövlət müstəqilliyi bərpa edildi və dövlət müstəqilliyi barədə konstitusiya aktı qəbul olundu.

1995-ci il noyabrın 12-də müstəqil Azərbaycan Respublikasının bütün xalq tərəfindən bəyənilmiş Konstitusiyası qəbul edildi. Bu hadisə Azərbaycan xalqının tarixində yeni mərhələnin - tərəqqi və demokratiya əsrinin başlanması ilə əlamətdardır. Müstəqil Azərbaycan dövlətinin qurulması bizim həyatımızda mühüm tarixi hadisədir. Doğrudur, müstəqillik yolu bizim üçün hamar olmayıb və biz ağır sınaqlara məruz qalmışıq. Ermənistanın Azərbaycana qarşı hərbi təcavüzü, erməni qəsbkarlarının ərazimizin 20 faizini işğal etməsi, bir milyondan çox həmvətənimizi doğma yurd-yuvasından didərgin salaraq qaçqın və köçkünə çevrilməsi... Bəli, Dağlıq Qarabağın işğalı

...Dağlıq Qarabağ Azərbaycanın əzəli tarixi torpağıdır. Bütün dünya da bu bölgəni Azərbaycanın ayrılmaz hissəsi kimi tanıyır. Beynəlxalq təşkilatlar tərəfindən qəbul edilən qərar və qətnamələr də Dağlıq Qarabağın ölkəmizə məxsus olduğunu təsdiqləyir. BMT Təhlükəsizlik Şurasının dörd qətnaməsində də deyilir ki, erməni silahlı qüvvələri dərhal, tam və qeyd-şərtsiz işğal edilmiş torpaqlardan çıxarılmalıdır. BMT Baş Assambleyası, Qoşulmama Hərəkatı, Avropa Şurası, Avropa Parlamenti, İslam Əməkdaşlıq Təşkilatı, digər təşkilatlar qətnamə qəbul etdi, sərhədlərimizin toxunulmazlığını, suverenliyimizi və Azərbaycanın ərazi bütövlüyünü NATO-nun müvafiq sammitlərində də birmənalı şəkildə dəstəklənib. Lakin 30 ilə yaxındır ki, həmin qətnamələr kağız üzərində qalıb.

İndiyə qədər beynəlxalq təşkilatlar tərəfindən Dağlıq Qarabağ münaqişəsinin həlli ilə bağlı çox önəmli qərarlar qəbul olunub. BMT Təhlükəsizlik Şurasının 7 bəyanatında və 4 qətnaməsində (822, 853, 874, 884 nömrəli qətnamələr) Ermənistan dövlətinin işğalçı olduğu açıq şəkildə göstərilib. Torpaqların azad edilməsi, qaçqınların öz yurdlarına qayıtması tələb olunub. 1996-cı il dekabrın 2-3-də ATƏT-in Lissabonda keçirilən Zirvə toplantısında ulu öndər Heydər Əliyevin siyasi qətiyyəti və diplomatik prinsipiallığı nəticəsində, Ermənistan istisna olmaqla, 54 üzv dövlət tərəfindən Azərbaycanın haqlı mövqeyini müdafiə edən xüsusi sənəd imzalanıb.

Bu gün Azərbaycan Ordusu hünər meydanında torpaqlarımızı işğaldan azad etmək üçün BMT Təhlükəsizlik Şurasının, ATƏT-in Minsk qrupunun illərdir təmin edə bilmədiyi tarixi ədaləti təkbaşına icra edir. Nəhayət, sentyabrın 27-dən başlanan ikinci Qarabağ müharibəsində rəşadətli Azərbaycan Ordusu işğal olunmuş rayonlarımızı bir-birinin ardınca azad etməklə, müstəqillik tariximizin ən şərəfli səhifəsini yazır.

Dünyanın ən güclü orduları sırasında olan, ən müasir silahlarla, hərbi texnika və müdafiə təyinatlı qurğularla tam təchiz edilən ordumuzun hərbi-texniki və döyüş hazırlığının yüksək səviyyədə olduğunu da bu gün artıq döyüş meydanında özünü təsdiq edir. Qeyd edək ki, Azərbaycan Ordusu dünyanın ən güclü 50 ordusundan biridir. Sözsüz ki, bütün bu uğurlar Prezident İlham Əliyevin həyata keçirdiyi məqsədyönlü ordu quruculuğu siyasəti sayəsində mümkün olub. Uzun illərdən sonra rəşadətli Azərbaycan Ordusu şanlı qələbələrlə dədə-baba torpaqlarımızı işğaldan azad edərək itirilmiş ərazilərimizi bərpa edir. O cümlədən Füzuli, Cəbrayıl, Zəngilan, Qubadlı şəhərləri, Hadrut, Ağbənd, Mincivan qəsəbələrində, 200-dən çox yaşayış məntəqəsində, milli kimliyimizin rəmzlərindən olan Xudafərin körpüsündə 27 ildən sonra Azərbaycan bayrağı dalğalanmağa başladı. Ard-arda gələn qalibiyyət xəbərləri, kəndlərimizin bir-bir düşmən tapdağından azad edilməsi, tezliklə Qarabağa qayıdacağımızla bağlı qələbə mesajları xalqımızın hər bir övladının qəlbində qürur, sevinc hayqırtısına çevrildi.

28 illik həsrətdən sonra on milyonluq Azərbaycan vətəndaşları, dünyada yaşayan bütün soydaşlarımız dövlətimizin başçısına məxsus “Qarabağ Azərbaycandır!” qələbə çağırışını, Azərbaycan xalqı üçün böyük əhəmiyyət kəsb edən və rəmzi məna daşıyan Şuşa şəhəri işğaldan azad edildiyi 8 noyabr tarixini boyük sevinclə qeyd etdilər. Şuşa azad edildikdən bir gün sonra, noyabrın 9-da Prezident İlham Əliyev daha 71 kəndin, bir qəsəbənin və 8 strateji yüksəkliyin işğaldan azad olunması barədə ölkə ictimaiyyətini məlumatlandırdı. Beləliklə, hərbi əməliyyatlar zamanı döyüş meydanında darmadağın edilən düşmənin çıxış yolu Prezident İlham Əliyevin irəli sürdüyü şərtləri qəbul etmək oldu.

Noyabrın 10-da atəşkəs elan edərək Azərbaycan, Rusiya prezidentləri və Ermənistanın Baş naziri birgə bəyanat imzaladılar. Bu bəyanatda Ermənistan öz üzərinə öhdəlik götürür ki, qarşıdakı 20 gün ərzində Ağdam, Kəlbəcər və Laçın rayonlarından qoşunlarını çıxaracaq. Nəticə etibarilə, dekabradək qan tökülmədən, itki verilmədən ərazi baxımdan böyük rayonlarımız azad olunacaq. Həmçinin bölgədə sülhyaratma prosesi Rusiya və Türkiyənin birgə iştirakı sülhməramlıların əraziyə gəlməsi Ermənistan qoşunlarının Azərbaycanın işğal olunmuş ərazilərindən çıxarılması ilə təmin ediləcək.

Prezident, Ali Baş Komandan İlham Əliyevin ötən gecə xalqa müraciət edərək şanlı qələbəmizin müjdəsini verməsi uzun illərdir həsrətində olduğu tarixi qələbəni Azərbaycan xalqı böyük coşqu, sevinc və qürur hissi ilə qeyd edir. Prezidentin müraciətindən sonra insanlar bu tarixi zəfərin sevincini paylaşmaq üçün paytaxtın küçələrinə axışdılar. Bütün ölkəni qələbə əhval-ruhiyyəsi; küçələr, binalar, avtomobillər Azərbaycan və qardaş Türkiyənin ay-ulduzlu qoşa bayraqlarıyla bəzəndi. Bir andaca əlləri üçrəngli bayraqlı, dilləri zəfər nəğməli insanlar küçələrdə selə döndü, aşdı-daşdı, haqq nidaları dünyanı lərzəyə saldı. Əllərində Azərbaycanın bayrağı və Ali Baş Komandanın portretləri olan insanlar şanlı qələbənin sevincini yaşayırlar. Bu sevinc və qürur hisslərini onlara yaşatdığına görə dövlətimizin başçısına minnətdarlıq edirlər. Bu bir daha onu göstərir ki, Azərbaycan xalqı həmişə olduğu kimi Lideri ilə bir yerdədir, həm də Azərbaycan bayrağı Lider-xalq vəhdətinin rəmzidir. Hər tərəfi “Yaşasın Ali Baş Komandan!”, “Qarabağ!”, “Qarabağ Azərbaycandır!”, “Azərbaycan Ordusuna eşq olsun!” “Qələbə bizimdir” kimi şüarlar bürüyüb. Bu inam, bu güvən Ali Baş Komandan İlham Əliyevin daxili və xarici siyasətinin uzaqgörənliyindən, qətiyyətindən, qüdrətli Azərbaycan Ordusunun qələbə əzmindən doğur.

Yaşadığımız bu tarixi günü, bu qüruru Ali Baş Komandanımız müzəffər ordumuzun sayəsində nail olub böyük qələbəni xalqımıza bəxş etdi.

Kamaləddin MƏNSİMOV,

“Nabucco Architecture and Construction” şirkətinin

direktoru.

Respublika.- 2020.- 13 noyabr.- S.9.