“Birlikdəyik” layihəsi

COVİD-19 XXI əsr insanının həyatının bir parçasına çevrilib və hər kəsi onun diktə etdiyi şərtlərlə yaşamağa vadar edib: sosial izolyasiya gözləyərək, maska taxaraq, şəxsi gigiyena qaydalarına əməl edərək. Azərbaycanda yeni koronavirus infeksiyasına qarşı görülən sistemli tədbirlər bu gün də davam etdirilir. İnfeksiyanın yayıldığı ilk günlərdən dövlətimizin vəziyyəti nəzarətə götürməsi, genişmiqyaslı tədbirlər həyata keçirməyə başlaması qısa zamanda müsbət nəticələrə nail olmağa rəvac verdi. İstər vətəndaşların sağlamlığının və təhlükəsizliyinin təmin edilməsi, istərsə də koronavirus xəstələrinin müalicəsi, səhiyyə infrastrukturunun təkmilləşdirilməsi, yeni xəstəxanaların açılması və tibb müəssisələrinin texniki təchizatı baxımından bütün məsələlər uğurla həll edildi.

Hər zaman olduğu kimi, pandemiya dövründə də Azərbaycan Prezidentinin yürütdüyü siyasətin ana xəttini insan amili, vətəndaşların sağlamlığı, təhlükəsizliyi, ölkəmizin inkişafı və cəmiyyətimizin sosial rifahı təşkil edir. Bu mənada cəmiyyətin bütün üzvlərinin, istər dövlət qurumları, istərsə də digər sektorların iştirakçılarının, o cümlədən özəl sektorun da səyləri məhz bu istiqamətə yönəlməlidir.

“Coca-Cola” Fondu və ASAN Könüllüləri

təşkilatının COVİD-lə mübarizəyə dəstək məqsədilə həyata keçirdikləri sosial yardım layihəsi məhz belə səylərdən biridir, hətta maraqlısıdır. “Coca-Cola” şirkətinin Qafqaz Regionu Direktoru Adrian Çernautan ASAN Könüllüləri ilə əməkdaşlığın ölkədə pandemiya ilə mübarizəyə töhfə verdiyinə inandığını bildirmişdir: “Dünyada yayılmış məlum pandemiya ilə mübarizədə “Coca-Cola” olaraq Azərbaycan cəmiyyəti ilə birlikdə olmaqla, COVİD-19 virusunun qarşısının alınması istiqamətində görülən vacib işləri alqışlayırıq. Şirkətimiz ASAN Könüllülərinin sosial yardım məqsədilə hazırladıqları layihəni dəstəkləmək qərarını verdi. Çox şadıq ki, ASAN Könüllüləri ilə birgə bu milli mübarizəyə dəstək ola bildik. Dövlətin, cəmiyyətin və özəl sektorun səylərinin birləşdirilməsi nəticəsində bu çətinliyin öhdəsindən birgə gələcəyimizə inanırıq”.

Azərbaycan Respublikası Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin (ASAN Xidmət) İnsan Resursları və Təlim şöbəsinin müdir müavini Cahangir Hacıyev “Coca-Cola” Fonduna layihəni həyata keçirməkdə dəstəyə görə təşəkkürünü bildirib və könüllülərin epidemiyaya qarşı mübarizədə fəallığını vurğulayıb: “ASAN Könüllüləri artıq neçə illərdir ki, çoxsaylı layihələr həyata keçirərək cəmiyyət üçün, xalqımız üçün faydalı olmaq naminə səylərini əsirgəmir. Hazırda ölkəmizin üzləşdiyi epidemiya ilə mübarizəyə də könüllülərimiz öz töhfəsini verməkdədir. Təbii ki, belə layihələr və təşəbbüslər tərəfdaşlarsız mümkün olmur. Bu Fondun dəstəyi ilə bir neçə layihəyə imza atmışıq. Çox sevindirici haldır ki, bu çətin günlərdə də “Coca-Cola” Fondu və ASAN Könüllüləri bir araya gələrək həkimlərə və aztəminatlı ailələrə kömək əlini uzatmaq üçün belə əməkdaşlıq edirlər”.

Hələ aprel ayının əvvəlində ölkədə karantin rejimində çalışan xəstəxanalar üçün 120,000 su məhsullarının çatdırılmasını təşkil etmişdik, deyən “Coca-Cola” şirkətinin İctimaiyyətlə Əlaqələr və Kommunikasiya Meneceri Elşad Fərzəliyev onu da bildirdi ki, bu yaxınlarda “Birlikdəyik” layihəsi çərçivəsində yüzdən artıq ASAN Könüllüləri və “Coca-Cola” şirkətinin əməkdaşları, “Tibbi Ərazi Bölmələrini İdarəetmə Birliyi” karantin rejimində çalışan səhiyyə müəssisələrinə müvafiq tibbi ləvazimatlar, tibb personalı üçün min ədəd qoruyucu eynək, min ədəd qoruyucu kombinezon, 3 min şəffaf maska, 21 min əlcək, 7 min baxıl və 20 min respirator maska yardım olunub.

Əhaliyə yardım məqsədi ilə COVİD-19 pandemiyası dövründə ABAD publik hüquqi şəxs tərəfindən istehsal olunan 17500 ədəd antiseptik vasitə könüllülərə, dövlət xidmətlərinin göstərildiyi məntəqələrdə və vətəndaşların toplaşdığı yerlərdə paylanılmışdır. Hazırda “Birlikdəyik” layihəsi çərçivəsində həm əhaliyə qida yardımlarının çatdırılması, o cümlədən 20 min şəxsi əhatə edən aztəminatlı ailələrə yardım qutularının paylanılması, həm də antiseptik şəxsi gigiyena ləvazimatları vasitələrin paylanılması, eyni zamanda sosial şəbəkələr vasitəsilə maarifləndirilmə işinin aparılması həyata keçirilir.

COVİD-19 virusunun qarşısının alınması istiqamətində mübarizə dövlətin, cəmiyyətin və özəl sektorların səylərinin birləşdirilməsi nəticəsində bu çətinliyin öhdəsindən tezliklə birgə gələcəyimizə inanırıq. Nəzərə alınmalıdır ki, payız-qış mövsümü həmçinin digər xəstəliklərin fəallaşdığı dövrdür və bu xəstəliklər insan orqanizmi üçün ciddi təhlükədir. Buna görə də koronavirusun yayılmasına, yeni yoluxma nöqtələrinin yaranmasına imkan verilməməlidir. Hər bir vətəndaş qoyulan qərarlara, pandemiyanın tələblərinə mütləq şəkildə əməl etməlidir.

Bəybala BƏYBALAYEV

Respublika.- 2020.- 15 noyabr.- S.7.