ZƏFƏR BAYRAMI: VƏTƏN ANDI, OĞUL ANDI

30 ildir ki, ana torpaqlarımız daşnak tör-töküntüləri olan ermənilərin işğalı altında idi. Bu 30 ili bütün xalqımız dərd yükü, ürəkağrısı, üz-gözünün kədəri, gərilmiş əsəbləri ilə yaşayıb. Amma həm də ötən illərin təcrübəsinə əsaslanaraq yetişəcək məqamı gözləmək məcburiyyətində idi. Ən əsas məqam isə xalq, dövlət, ordu birliyinə inanmaq, bir olmaq, birlikdə olmaq idi.

Budur, o məqam yetişdi. 2020-ci il sentyabrın 27-dən noyabrın 10-na kimi - 44 günlük ağır İkinci Qarabağ müharibəsi günlərini yaşadıq. İgid əsgərlərimiz Qarabağ torpaqlarında Vətən müharibəsində son damla qanlarına qədər vuruşmağa and içdilər və bu savaşda şərəfli döyüşlərini başa vurdular. Vətənimin hər bölgəsindən Qarabağa yollanan oğullar Ali Baş Komandanın rəhbərliyi altında Zəfər qazandılar. İşğalda olan torpaqlarımızın böyük bir hissəsini ağır hərb yolu ilə düşmən tapdağından qurtardılar, qalan hissə isə noyabrın 10-da Azərbaycan, Ermənistan və Rusiya rəhbərlərinin imzaladığı Bəyanata əsasən qeyd olunan müddətə işğaldan azad olunacaq. Bəyanatın beşinci maddəsində göstərildiyi kimi, “münaqişə tərəflərinin razılaşmalara əməl etməsinə nəzarətin səmərəliliyinin artırılması məqsədilə atəşkəsə nəzarət üzrə yaradılmış sülhməramlı mərkəz”in tərəfdaşları Rusiya-Türkiyə arasında bağlanmış Müqavilə bu məsələnin ədalətlə nizamlanacağına böyük ümid yaradır.

Torpaq, Vətən namusu bizi 44 günlük tarixi gündə bir xalq olaraq doğmalaşdırdı. Sevincimizi də, kədərimizi də birgə bölüşdük. Müharibənin ilk günündən bu birlik özünü göstərdi.

11 noyabrda, Zəfər Qələbəmizin səhəri Ali Baş Komandan İlham Əliyev 1 saylı Kliniki Tibbi Mərkəzdə yaralı hərbçilərlə görüşdü.

Ali Baş Komandan həmin görüşdə bildirdi ki, Zəfərdən sonrakı ilk görüşü onlarladır. Dövlət başçımız Qələbə sevincini yaralılarla bölüşdü. “Qələbə bizim hərbçilərimizin peşəkarlığı, qəhrəmanlığı hesabına qazanılıb. Onlar torpağımızı düşməndən qarış-qarış azad edib, bu zəfəri xalqımıza nəsib ediblər. Gəlmişəm deyim ki, mən hər zaman sizinlə bir yerdə olacağam. Mənə arxalana bilərsiniz. Bizim qəhrəman döyüşçülərimiz gələcək həyatda da daim mənim nəzarətimdə olacaqlar”.

Ali Baş Komandanın qələbəni qazanan şəhidlərimizin ruhu qarşısında, onları böyüdən valideynlər haqqında dedikləri hamının qəlbindən keçən sözlər idi.

Azərbaycan əsgəri ötən 44 günlük müharibə ərzində 5 şəhər, 4 qəsəbə, 300-ə yaxın kənd, onlarla strateji yüksəkliyi düşmən tapdağından azad etdi, Ermənistan faktiki məğlubiyyətə düçar edildi.

Vətən müharibəsi günlərində sanki bir xalq olaraq yenidən, öz içimizdən doğulduq, vüqarımız, qürurumuzla birgə böyüdük.

Qədim Şuşanın - Qala Şuşanın düşməndən azad edilməsindən (8 noyabr) sonra Ali Baş Komandanın Şəhidlər Xiyabanından xalqa etdiyi müraciəti bizi duyğulandırdı, sabaha inamımızı tam dirçəltdi. Həmin gün Prezident ulu öndərin vəsiyyətinə əməl etdiyindən mənəvi rahatlıqla söz açdı: “Mən xoşbəxt insanam ki, ata vəsiyyətini yerinə yetirdim. Şuşanı azad etdik! Bu böyük Qələbədir! Bu gün Şəhidlərimizin, Ulu Öndərin ruhu şaddır! Gözün aydın olsun, Azərbaycan!”

İlham Əliyevin bu etirafı övladın ata vəsiyyətinə əməli cavabı idi. Bununla cənab Prezident ulu öndərin də ruhunu şad etmiş oldu.

Bu müharibədə biz Ali Baş Komandanı qüdrətli sərkərdə kimi gördük. Onu yaşadığımız çətinliklər, ağrılar zamanı da yenilməz, inamlı gördük. Bu böyük bir tale qismətidir, bu bir alın yazısıdır. Biz gənclər bu dövrü yaşadıq, baş verənlərin şahidi olduq. Allah türkü qorusun. Sözümü bitirdiyim məqamda vaxtilə ümummilli lider Heydər Əliyevin bu sözlərini xatırladım: “Şuşasız Qarabağ, Qarabağsız isə, ümumiyyətlə, Azərbaycan yoxdur!”

Bu gün Şuşanın yerləşdiyi Qarabağ bizimdir! Qarabağ Azərbaycandır!

Atilla SÜLEYMANLI

Respublika.- 2020.- 15 noyabr.- S.7.