Azərbaycan dövləti mütəmadi olaraq sahibkarlara dəstək nümayiş etdirir

Yeni növ koronavirus infeksiyasının dünya ölkələrini kəskin böhran və itkilərlə, sosial-iqtisadi problemlərlə üz-üzə qoyduğu son dövrlər dövlətlər üçün ciddi bir sınağa çevrilib. Hətta inkişaf etmiş ölkələrdə pandemiya qurbanlarının sayının minlərlə olduğu, böhranın çıxılmaz vəziyyət yaratdığı indiki çətin və mürəkkəb dövrdə Azərbaycan bu ağır sınaqdan uğurla çıxmaqdadır.

Bəşəriyyəti çətin sınaq qarşısında qoyan qlobal pandemiya ölkələrin iqtisadiyyatına ciddi mənfi təsirini göstərməkdədir. Bir tərəfdən karantin dövründə işsiz əhalinin maddi durumunun yaxşılaşdırılması, sahibkarlıq subyektlərinə dəstək göstərilməsi, əlbəttə ki, dövlətin iqtisadi imkanlarına təsir edən amillərdir. Pandemiyadan az itkilərlə çıxmaq üçün qabaqlayıcı tədbirlər görən Azərbaycan dövləti makroiqtisadi sabitliyi qorumaq üçün imkanlarını səfərbər edib. Hökumət əhalinin sosial rifahının yaxşılaşdırılması, sahibkarlara dəyən zərərin ödənilməsi istiqamətində ciddi qərarlar qəbul edib, bir sıra qanunvericilik aktlarında dəyişikliklər olunub. Bu dəyişikliklərə əsasən, sahibkarlıq subyektlərinə vergi güzəştləri və tətillərinin verilməsi, sosial sığorta yükünün azaldılması, kredit faizlərinin subsidiyalaşdırılması və zəmanət alətlərinin təkmilləşdirilməsi prosesi həyata keçirildi.

Azərbaycanda sahibkarlara davamlı dəstək göstərilməsi əsas priotetlərdən biridir. Son illərdə həyata keçirilən Dövlət proqramları, bu istiqamətdə görülən işlər müvafiq olaraq sahibkarlığın inkişafına mühüm zəmin yaradıb. Xüsusilə pandemiya dövründə sahibkarlara dəstəyin artırılması, həm iqtisadi paket, həm dolayı təşviq tədbirləri ilə sahibkarların dəstəklənməsi bir daha təsdiq etdi ki, ən həssas dönəmlərdə belə dövlətimiz, Prezident cənab İlham Əliyev sahibkarların yanındadır. COVİD-19 pandemiyasının ölkə iqtisadiyyatına, makroiqtisadi sabitliyə, məşğulluq məsələlərinə və sahibkarlıq subyektlərinə mənfi təsirinin azaldılması ilə bağlı ölkə Prezidentinin Sərəncamı ilə işçi qruplar yaradıldı. İşçi qrup tərəfindən koronavirusdan ən çox zərər çəkmiş, mənfi təsirə əhəmiyyətli dərəcədə məruz qalmış, minimal təsirə məruz qalmış və ya təsirə məruz qalmamış sahələr müəyyən edildi, eyni zamanda, iqtisadiyyatın və özəl sahibkarlığın müxtəlif sahələrinə dövlət dəstəyini nəzərdə tutan 10 proqram hazırlandı. Məhz pandemiya dövründə minlərlə kiçik sahibkara dövlət tərəfindən dəstək verildi.

Prezident İlham Əliyevin rəhbərliyi və uzaqgörən siyasəti nəticəsində ötən dövrdə bütün istiqamətlərdə yaradılmış güclü iqtisadi potensial, xüsusilə müasir səhiyyə sistemi, peşəkar tibbi personal, eyni zamanda dövlət başçısının qəbul etdiyi operativ qərarlar, “Biz birlikdə güclüyük!” devizi ətrafında qısa müddətdə pandemiyaya qarşı yaranan güclü milli həmrəylik hərəkatı respublikaya bu qlobal böhranı uğurla adlayıb keçməyə imkan verdi.

Mübaliğəsiz demək olar ki, Azərbaycan dövləti mütəmadi olaraq sahibkarlara dəstək nümayiş etdirir. Xüsusən pandemiya dövründə sahibkarlara dəstəyin artırılması, həm iqtisadi paket, həm dolayı təşviq tədbirləri ilə sahibkarların dəstəklənməsi göstərir ki, ən həssas dönəmlərdə belə Azərbaycan dövləti sahibkarının yanındadır və sahibkarlığın dəstəklənməsi siyasətini davam etdirir.

Azərbaycan Prezidenti İlham Əliyev Biləsuvar və Saatlı rayon icra hakimiyyətləri başçılarını vəzifələrinə təyin olunmaları ilə əlaqədar videoformatda qəbulda da dövlətin sahibkarlara dəstək göstərdiyini, müdafiə etdiyini, şərait yaratdığını, onların gəlirlərinin artırılmasına çalışdığını vurğulayıb: “Sahibkarların da dövlət dəstəyinə uyğun olaraq məcburi öhdəlikləri vaxtında yerinə yetirməsi vacibdir. Pandemiya da göstərdi ki, bu gün qeyri-rəsmi məşğulların sayı kifayət qədər çoxdur. Çoxlu sayda vətəndaşlarımız var ki, sahibkarlıq subyektləri onlarla əmək müqaviləsi bağlamırlar. Çox təəssüf ki, qeyri-leqal, yaxud gizli iqtisadiyyatda çalışaraq vergidən yayınan sahibkarlar var. Onlar bir tərəfdən vergidən yayınır, digər tərəfdən isə haqsız rəqabət yaradırlar. Bu da təbii ki, iqtisadi inkişafa mane olan amillərdən hesab olunur. Sahibkarların dövlət qarşısında fiskal və məcburi öhdəlikləri zamanında yerinə yetirməsi vacibdir”.

Ölkəmizdə istənilən sahədə sahibkarlıqla məşğul olan hər bir vətəndaş son illər iqtisadiyyatımızın dinamik inkişafının təmin olunması, bu sahədə gəlirlərin tam şəffaflaşdırılması istiqamətində ardıcıl olaraq islahatların həyata keçirilməsinin şahididir.

Azərbaycan Respublikasının Prezidenti cənab İlham Əliyevin tapşırığı ilə pandemiya dövründə dövlət və özəl sektorda işçilərin əsassız yerə işdən çıxarılmaması, ixtisarına yol verilməməsi və məzuniyyətə buraxılan işçilərin əməkhaqlarının saxlanması istiqamətində aparılan məqsədyönlü işlər sahibkarların daha səmərəli fəaliyyət göstərmələrinə təkan oldu. Belə ki, əhalinin maddi durumunun pisləşməsi nəticəsində alıcılıq qabiliyyəti ən aşağı səviyyəyə düşə bilərdi ki, sözsüz ki, bu da özəl sektorun böhrana düçar olmasına səbəb ola bilərdi. Bir sıra mühüm obyektlər kimi, ərzaq mağazalarının da fəaliyyətinə heç bir məhdudiyyət qoyulmaması və nəticədə bu sahədə çalışanların işlərinin itirməməsi də hər bir sahibkar üçün çox önəmli idi. Beləliklə, dövlətimizin atdığı məqsədyönlü addımlar nəticəsində digər dünya ölkələrində müşahidə etdiyimiz iqtsadi böhran ölkəmizdən yan keçdi.

Mən də kiçik bir sahibkar kimi, pandemiya dövründə dövlətin sahibkarlara göstərdiyi diqqət və qayğını təqdirəlayiq hesab edirəm. Bir daha əmin oldum ki, dövlətimiz bu sahənin inkişafına daim diqqət göstərir.

Bir məsələni də xüsusilə qeyd etmək istəyirəm ki, son günlər cəhbədə Azərbaycan ordusunun Ermənistan silahlı qüvvələrinin təxribatının qarşısını alması xalqımız tərəfindən böyük əhvali-ruhiyyə ilə qarşılanır. Ordumuz öz doğma torpaqlarını rəşadətlə qoruyur, düşmənə ağır zərbələr endirir. İnanırıq ki, 30 ilin həsrətinə son qoyulacaq, Prezident, Ali Baş Komandan cənab İlham Əliyevin rəhbərliyi altında ordumuz zəfər çalacaqdır.

Müşfiq MAMIYEV,

sahibkar, YAP üzvü.

Respublika.- 2020.- 2 oktyabr.- S.7.