Torpaqlarımızın yaralarına məlhəm qoyacağıq

Şanlı Azərbaycan ordusu Yuxarı Qarabağda torpaqlarımızı 30 ilə yaxın bir müddətdə işğal altında saxlayan Ermənistanın quldur rejiminin silahlı qüvvələrinə qarşı əks-hücum əməliyyatlarını uğurla davam etdirir. Ağır və sarsıdıcı zərbələr alan düşmən son çarəsini dinc əhalini hədəfə almaqda görür və öz çirkin simasını bir daha bütün dünyaya göstərdi.

On gün ərzində rəşadətli ordu hissələri düşmən işğalından onlarla kəndi, strateji yüksəklikləri və Cəbrayıl şəhərini azad edərək qətiyyətlə irəliləyir. Qorxaq düşmən əsgərləri silah-sursatını, döyüş bayrağını, hərbi texnikanı ataraq qaçırlar.

Yalan, saxtakarlıq, riyakarlıq, təxribat və nəhayət, müharibə cinayətləri üzərində küçədən tapılan baş nazir Paşinyanın əlləri dinc azərbaycanlı insanların qanına batıb və çox yəqin ki, bu quldur rejim yaxın vaxtlarda öz layiqli cəzasını alacaq. Evləri dağıtmaq, azərbaycanlıları qətlə yetirmək, uşaqları öldürmək erməni faşizminin alçaqlığı, şərəfsizliyi və murdarlığıdır.

Xalqımız Azərbaycan Prezidenti, Ali Baş Komandan İlham Əliyevin düşmən qüvvələrə qarşı göstərdiyi qətiyyətli mövqeyini inamla dəstəkləyir və ordumuzun qalibiyyətini sevinclə qaşılayır, döyüşən orduya mənəvi dəstək göstərir. Cəbhə bölgəsində mərmi atəşi altında yaşayan və gündəlik qayğıları ilə nəfəs alan Ağdam rayonunun sakinləri əks-hücum başlayan gündən həmrəylik və misilsiz dözüm nümayiş etdirirlər.

Xain ermənilərin atdığı top və raket mərmisindən 8 nəfər dinc sakin həyatını itirib, onlarla ev dağılıb, infrastruktura ciddi ziyan dəyib, yaralılar var. Buna baxmayaraq, ağdamlılar həm ön cəbhədə igidliklə döyüşürlər, həm də arxa cəbhədə ruh yüksəkliyi ilə çalışırlar. Mərmilərin yağış kimi yağdığı kəndlərdə heç kəs öz evini tərk etmir, gündəlik təsərrüfat işləri ilə məşğul olurlar.

Oktyabrın 4-də Quzanlı qəsəbəsində öz həmyerliləri ilə birlikdə müharibə şəraitinə uyğun olaraq rayon icra hakimiyyətinin fəaliyyət göstərdiyi bunkerdə icra başçısı Vaqif Həsənovla görüşdük. Burada Bakıdan və digər şəhərlərdən döyüşən orduya yardım gətirən yüzlərlə insan var idi. İcra başçısı qəlbi Vətən eşqi ilə çırpınan insanlara dövlətimizin başçısı İlham Əliyevin adından təşəkkür bildirərək qeyd etdi ki, silahlı qüvvələrimizin ərzaq və geyim təchizatı çox yüksək səviyyədədir, dövlət lazım olan hər şeyi edir.

Gün ərzində müşahidə etdik ki, adamlar axın-axın qərargaha gəlirdilər. Quzanlıya təkcə Bakı şəhərindən Azərbaycanın və qardaş Türkiyənin bayraqları ilə bəzədilmiş yüzlərlə maşın gəldi. Doğrudan da xalqımızın həmrəyliyinin bir coşquya, bir qələbə təşnəsinə çevrildiyinin şahidi olduq. Təqaüddə olan general Yaşar Aydəmirovun köməkçisi, iş adamları, imkanlı şəxslər, ayrı-ayrı sadə vətəndaşlar gətirdikləri yardımları hərbi hissəyə təhvil verirdilər. Ağdam rayonunun Seyidli kəndindən məcburi köçkün Tahir Əliyev ailəsinin məskunlaşdığı Bakı şəhərindən gücü çatan qədər zəruri məmulatlar gətirmişdi.

Söhbət zamanı Tahir deyir:

- Ermənistan öz havadarlarına arxalanaraq 27 ildir doğulub boya-başa çatdığım yurdu işğal edib və məcburi köçkün həyatı yaşayırıq. Ordumuzun əks-hücum əməliyyatları hər birimizdə dərin inam yaradıb ki, biz öz torpaqlarımıza qayıdacağıq. Yenidən ev tikəcəyik, bağlar salacağıq, düşmən tapdağı altında inləmiş torpaqlarımızın yaralarına məlhəm qoyacağıq. Ailəmiz adından Ali Baş Komandanımız İlham Əliyevə dərin minnətdarlığımızı bildirirəm, bütün məcburi köçkünlər Prezidentimizin mübarizliyini, qətiyyətini, düşməni istər siyasi sahədə, istərsə də hərbi sahədə ağır məğlubiyyətə uğratmasını yüksək qiymətləndiririk.

Güllücə kəndindən məcburi köçkün Əli Əliyev deyir:

- Ordumuzun cəbhədə qazandığı uğurlar hamımızda qürur və sevinc yaradıb. İnanırıq ki, tezliklə torpaqlarımız işğalçılardan təmizlənəcək və bütün məcburi köçkünlər öz dədə-baba yurdlarına qayıdacaqlar.

Cəbhə bölgəsində, mərmi atəşi altında yaşayan əhali ilə görüşdüyümüz zaman erməni hərbi qüvvələrinin atdığı top mərmisi dayandığımız yerin lap yaxınlığında partladı, “Vətən səsi” qəzetinin Baş redaktoru Elşən Əliyevi, hərbi ekspert Mahir Cavadlını və bu sətirlərin müəllifini top mərmisindən yaxınlıqdakı çinar ağacı xilas etdi. Buna baxmayaraq, iki nəfər dinc sakin yaralandı. Onları təcili yardım maşını ilə yaxınlıqdakı hərbi hospitala yola saldıq.

Sözün əsl mənasında, Ağdam döyüşür, sadə insanlar orduya kömək etmək arzusundadır, döyüşə atılmaq istəyənlərin sayı-hesabı yoxdur.

Düşmənin hədəfə aldığı yaşayış məntəqələrindən biri də Xındırıstan kəndidir. Erməni faşistlərinin artilleriya atəşi nəticəsində kənddə sakinlərə məxsus 1 yaşayış evi dağılıb, 16 evə, yardımçı binalara, təsərrüfatlara ziyan dəyib. Lakin bunlara baxmayaraq, kənd əhalisinin əhval-ruhiyyəsi yüksəkdir. Sakinlər Azərbaycan Ordusuna güvənərək öz doğma kəndlərini tərk etmir, gündəlik işləri ilə məşğul olurlar.

Kənd sakini Taleh Allahverdiyev deyir:

- Düşmən rayonun digər kəndləri kimi, bizim kəndimizi də atəşə tutur. Dünən atılan mərmilərdən biri də mənim evimi dağıdıb. Həyət-bacaya, meyvə ağaclarına ziyan dəyib. Ancaq buna baxmayaraq, evimi, kəndimi tərk etməmişəm. Ordumuzun cəbhədəki uğurları bizi ruhlandırır. Əminik ki, tezliklə qələbə qazanacağıq”.

Kəndin digər sakini Yafəs Eyvazov bildirir ki, düşmənin təxribatları, yaşayış məntəqələrini atəşə tutması onları ruhdan salmır. Düşmənin kəndi artilleriya atəşinə tutması bizi narahat etmir. Görürsünüz, əkdiyim tərəvəzə qulluq edirəm. Tərəvəzin bəzilərini kənd atəşə tutulan vaxt əkmişəm. Kənddə hamı öz işindədir. Çünki ordumuza güvənirik.

Xındırıstan kəndində əhalinin əsas məşğuliyyəti əkinçilik və heyvandarlıqdır. Hazırda kənd sakinləri mal-qaranın qış mövsümü üçün yem təminatı ilə məşğuldurlar. Hüseynovlar ailəsinin də dolanışığı heyvandarlıqdan çıxır. Almaz Hüseynova ilə söhbət zamanı deyir ki, düşmənin məqsədi sakinləri qorxutmaq, ruh düşkünlüyü yaratmaqdır. Lakin buna nail ola bilməyəcək. Kənd hər gün artilleriya atəşinə məruz qalsa da, sakinlər evlərindədirlər. Hamıda yüksək əhval-ruhiyyə, qələbəyə böyük inam var.

Ermənistan silahlı qüvvələri cəbhəyanı ərazilərdəki yaşayış məntəqələrini, mülki infrastruktur obyektlərini ağır artilleriya qurğularından intensiv atəşə tutmaqda davam edir.

Həmin gün düşmənin növbəti hədəfi Ağcabədi rayonunun Sarıcalı və Taynaq kəndləri olub. Artilleriya atəşi nəticəsində Sarıcalı kəndində bir ev tamamilə yanıb. Taynaq kəndi ərazisindəki yeməkxanaya top mərmisinin düşməsi nəticəsində 2006-cı il təvəllüdlü İsgəndərov Fərid Dilafətoğlu dağıntılar altında qalaraq həlak olub, mülki infrastruktur obyektlərə ziyan dəyib.

Ermənistanın silahlı qüvvələri beynəlxalq hüququn norma və prinsiplərini kobud şəkildə pozaraq, dinc əhaliyə qarşı terror əməllərini davam etdirərək Ağcabədi şəhərini raket atəşinə tutub. Şəhərə atılan raketlərdən biri partlamayıb. Qalan iki raketdən biri həyətyanı sahəyə düşərək evdə dağıntılara səbəb olub, digəri isə başqa bir evə düşüb. Yaşadıqları evə raket düşməsi nəticəsində şəhər sakinləri 1994-cü il təvəllüdlü İbrahimov Elşən Mehdi oğlu və qardaşı qızı 2015-ci il təvəllüdlü İbrahimova Ayan Rövşən qızı müxtəlif bədən xəsarətləri alaraq xəstəxanaya yerləşdiriliblər. Eyni zamanda, evə külli miqdarda ziyan dəyib.

Cəbhə bölgəsində insanların əhval- ruhiyyəsi çox yüksəkdir, adamlar ordumuzun qələbəsinə inanırlar, fəal vətəndaş mövqeyi nümayiş etdirirlər və deyirlər ki, ermənilər işğal etdikləri torpaqlardan it kimi qovulacaqlar.

Mərmidən, güllədən qorxmayaraq öz evlərində yaşayan adamların və xalqımızın inamı Azərbaycan Respublikasının Prezidenti İlham Əliyevin oktyabrın 4-də “Əl-Ərəbiyə” televiziya kanalına verdiyi müsahibədəki fikirlərlə üst-üstə düşür.

“Biz öz ləyaqətimizi müdafiə edirik, biz öz müstəqilliyimizi müdafiə edirik. Dünyada heç bir ölkənin bizim işlərimizə müdaxilə etməyə haqqı yoxdur və onlar bunu başa düşməlidirlər. Öz ərazi bütövlüyünü bərpa etmək Azərbaycanın maraqlarına xidmət edir. Azərbaycanın bir milyon insanı öz doğma torpaqlarına qayıdacağı vaxtı gözləyir və biz hökumət olaraq bunu təmin edəcəyik. Biz insanlarımızı öz vətəninə qaytaracağıq, şəhərlərimizi bərpa edəcəyik, kəndlərimizi bərpa edəcəyik. Biz işğal olunmuş bütün ərazilərdə Azərbaycan bayrağını qaldıracağıq”.

Salman ALIOĞLU

Respublika.- 2020.- 7 oktyabr.- S.10.