Qəhrəman igidlərimizin qanı yerdə qalmadı

Mübaliğəsiz demək olar ki, bütün dünya 44 günlük Vətən müharibəsində Azərbaycanın gücünün, iradəsinin, birliyinin şahidi oldu. Düşmən 30 il ərzində işğal edilmiş torpaqlarda möhkəmlənib, istehkamlar qurub, səngərlər, sığınacaqlar qazmışdı. Bütün bunlara baxmayaraq, rəşadətli Azərbaycan hərbçiləri qəhrəmanlıq, peşəkarlıq, Vətən sevgisi göstərərək, bütün bu maneələri dəf edərək düşməni ağır və biabırçı məğlubiyyətə uğradıblar.

Qanlı döyüşlərdə Sərhəd Hüseynov da qorxmaz və igid əsgər kimi tanınıb. Döyüş əməliyyatlarının qızğın çağında, sentyabrın 29-da iki yaralı yoldaşını xilas edir, üçüncü yaralını da atəş altından çıxararkən Sərhəd düşmən tərəfindən vurulur.

Aprelin 21-də şəhidin 25 yaşı tamam olub. Ailəsi, əzizləri, dostları, həmyerliləri ad gününü onsuz qeyd ediblər. 1996-cı ildə Füzuli rayonunun Yağlıvənd kəndində dünyaya göz açan Sərhədi indi bütün ölkə tanıyır.

Uşaqlıqdan Sərhədin ən böyük arzusu hərbçi kimi torpaqlarımızı işğaldan azad etmək olub. O, həqiqi hərbi xidməti bitirdikdən sonra da müddətdən artıq Vətənin keşiyində dayanıb. Ermənistanın təxribatlarına qarşı əks-hücum əməliyyatlarında Sərhəd həmlə qrupunun tərkibində döyüşlərə atılıb. Onun döyüş yolu da elə ata-baba yurdu Füzulidən başlayıb. Gərgin döyüşlərdə düşmənə ağır zərbələr endirilməsində Sərhəd və döyüşçü yoldaşları əsl şücaət göstəriblər.

Şəhidin anası Sevda Həsənova deyir ki, övlad itkisi nə qədər ağır olsa da, təsəllim odur ki, şəhidlərimizin intiqamını qəhrəman ordumuz döyüş meydanında aldı. Şəhidlərimizin qanı yerdə qalmadı. Şəhidin əmisi Adil Həsənov da Sərhədin qəhrəmanlığı ilə fəxr etdiyini bildirir. Deyir ki, igid oğullarımızın qanı bahasına Qarabağ düşmən tapdağından azad olunub. İkinci Qarabağ müharibəsi bizim şanlı tariximizdir. Xalqımız bu müharibə ilə bağlı qürur hissi keçirir.

Sərhəd Hüseynov döyüşlərdə göstərdiyi şücaətə görə ölümündən sonra “Cəsur döyüşçü” və “Vətən uğrunda” medalları ilə təltif olunub. Hər bir şəhid ailəsi kimi Sərhədin də ailəsi dövlət qayğısı ilə əhatə olunub.

Salman ALIOĞLU

Respublika.- 2021.- 24 aprel.- S.4.