Məqsədimiz iqtisadi inkişafa öz töhfəmizi verməkdir

25 aprel - Sahibkarlar Günüdür

“...Azərbaycanda biznes mühiti yaxşılaşır, sərmayə qoyuluşu üçün daha yaxşı şərait yaradılır, həm yerli, həm xarici sərmayələr dövlət tərəfindən lazımi səviyyədə qorunur”.

İlham ƏLİYEV,

Azərbaycan Respublikasının Prezidenti.

Azərbaycanın ən yeni tarixinə nəzər salsaq, onun hər bir məqamı ümummilli lider Heydər Əliyevin həyat və fəaliyyəti ilə qırılmaz şəkildə bağlıdır. Xalqın təkidli xahişi ilə ikinci dəfə Ali hakimiyyətə qayıdan ulu öndər tərəfindən həyata keçirilən sistemli tədbirlər nəticəsində ölkəmizdə siyasi və makroiqtisadi sabitliyə nail olunmuş, sahibkarlar sinfinin formalaşması üçün real hüquqi baza yaradılmış, dövlət tərəfindən özəl sektora hərtərəfli dəstək göstərilməsi tədbirlərinin həyata keçirilməsinə başlanılmışdır.

Ümummilli liderin sahibkarlarla keçirilən görüşləri özəl sektorun təmsilçilərinə yüksək diqqətin təzahürü idi. 2002-ci ilin 25 aprel tarixində yerli və may ayında xarici iş adamları ilə keçirilən görüşlərdə sahibkarlığın inkişafı yolları araşdırılmış, bu inkişafa mane olan əngəllərin aradan qaldırılması üçün konkret tədbirlər müəyyənləşdirilmiş, 2002-2005-ci illər üçün Azərbaycanda sahibkarlığın inkişafı ilə bağlı Dövlət Proqramı təsdiq edilmişdir.

Məhz bu görüşlərin Azərbaycan sahibkarlığının inkişafında mühüm tarixi əhəmiyyətini, habelə ölkənin iqtisadiyyatında sahibkarların artan rolunu, məşğulluğun təmin olunmasında sahibkarlığın inkişafının əhəmiyyətini nəzərə alaraq, Azərbaycan Respublikasının Prezidenti cənab İlham Əliyevin 21 aprel 2016-cı il tarixli Sərəncamına əsasən 25 aprel - Sahibkarlar Günü kimi təsis edilmişdir.

Bu gün Azərbaycan biznes mühitinin əlverişliliyi, sahibkarların rahat işləməsi üçün ən çox islahatlar aparan ölkələrdən biridir. Ölkədə qeyri-neft sektorunun, xüsusilə də regionlarda kiçik və orta sahibkarlığın inkişafı istiqamətində mühüm işlər görülür. Bazar iqtisadiyyatına keçid dövrünü 2007-ci ildə uğurla başa vurmuş Azərbaycanda iqtisadi inkişaf və sabitliyin təmin edilməsində sahibkarlar sinfinin rolu müstəsnadır. Bu reallığı nəzərə alan ölkə Prezidenti milli iqtisadi inkişaf modelinin reallaşdırılmasında özəl sektorun həlledici rolunu daim önə çəkir, güclü sahibkarlar sinfinin daha da inkişaf etməsinə, onların cəmiyyətdəki mövqelərinin güclənməsinə çalışır. Prezident İlham Əliyev tərəfindən müəyyənləşdirilmiş iqtisadi inkişaf strategiyası nəinki ölkəmizin tərəqqisində mühüm rol oynayır, həmçinin bir model olaraq iqtisadi inkişaf baxımından nümunəyə çevrilməkdədir. Davamlı olaraq həyata keçirilən kompleks islahatlar, inzibati prosedurların sadələşdirilməsi, qanunvericiliyin təkmilləşdirilməsi, investisiya mühitinin yaxşılaşdırılması tədbirləri və dəstək mexanizmlərinin tətbiqi sahibkarlığın inkişafını daha da sürətləndirmişdir.

Azərbaycanın iqtisadi sahədə böyük uğurları ölkəmizdə aparılan siyasətin və həyata keçirilən islahatların əhəmiyyətini qlobal pandemiya dövründə də aydın nümayiş etdirir. Dünyanın aparıcı iqtisadi-maliyyə reytinq mərkəzlərinin Azərbaycanla bağlı iqtisadi, sosial və digər sahələrdə yüksək reytinqlər müəyyənləşdirməsi Prezident İlham Əliyevin rəhbərliyi ilə ölkəmizdə aparılan ardıcıl və sistemli iqtisadi siyasətin, islahatların məntiqi nəticəsidir.

2020-ci il ölkəmizdə böyük Zəfər ili kimi yadda qaldı. Ali Baş Komandan İlham Əliyevin rəhbərliyi altında Müzəffər Ordumuzun şücaəti sayəsində 44 gün ərzində haqq savaşımız qələbə ilə başa çatdı, 30 illik işğala son qoyuldu, tarixi ədalət öz yerini tapdı.

Mən də Vətənimizin ərazi bütövlüyünün bərpası uğrunda Birinci Qarabağ müharibəsində döyüşərək qazi olmuşam. İndi qürurla fəxr edirəm ki, keçmiş döyüşçü kimi müharibə veteranıyam.

2021-ci il isə ölkəmiz qarşısında tam yeni dövrün başlanğıcı kimi xarakterizə edilə bilər. Bu gün həm də postmüharibə dövrünün ilk mərhələsini yaşamaqdayıq. Qarşıda tam yeni bir dövr dayanır - böyük quruculuq, inkişaf dövrü... Düzdür, bu o qədər də asan proses deyil. Ən azından ona görə ki, düşmən 30 il ərzində işğaldan azad edilmiş ərazilərimizi darmadağın edib. Azərbaycan hər şeyi yenidən başlayacaq və ona görə də bu dövr şərəfli dövr olacaq.

Bu səbəbdən də Prezident İlham Əliyev ilk növbədə işğaldan azad edilmiş ərazilərimizin bərpası və yenidən qurulması məsələsini strateji vəzifə olaraq müəyyənləşdirib. Bu ərazilərdə dayanıqlı məskunlaşma üçün müasir və layiqli həyatın təmin edilməsi, bütün sahələrdə quruculuq-bərpa və abadlıq işlərinin aparılması lazımdır. İlin əvvəlində Prezidentin imzaladığı növbəti mühüm sərəncamla “Azərbaycan 2030: sosial-iqtisadi inkişafa dair Milli Prioritetlər” proqramında nəzərdə tutulmuş inkişaf kursunun Qarabağa Böyük Qayıdışın təmin edilməsi proqramı kimi müəyyənləşməsi İlham Əliyevin bu məsələyə nə qədər böyük önəm verdiyini göstərdi.

Yeni dönəmdə əsas hədəflərdən biri də işğaldan azad edilmiş ərazilərimizə investisiyaların cəlb edilməsidir. Prezident iştirak etdiyi bütün konfranslarda, keçirdiyi görüşlərdə tərəfdaş ölkələrə, şirkətlərə mesaj ünvanlayaraq onları Qarabağa investisiya qoymağa dəvət edir. Çünki Vətən müharibəsinədək Azərbaycan bütün investorlar üçün ən cəlbedici məkanlardan biri sayılırdı. Bu gün isə bütün sahibkarlar üçün daha yaxşı imkanlar yaradılıb. İşğaldan azad edilmiş ərazilərimizdə istənilən infrastruktura investisiyanın yatırılması böyük iqtisadi dividend gətirə bilər.

Göründüyü kimi, qarşıdakı dövrdə ölkəmiz qarşısında böyük quruculuq, abadlıq işləri dayanır. Bu da əlbəttə ki, Azərbaycan tarixinə dirçəliş ili kimi düşərək yaddaşlarda əbədi qalacaq.

Ötən il dünyanın siyasi, iqtisadi mənzərəsi həm də ziddiyyətli olması ilə yadda qaldı. Koronavirus pandemiyasının yaratdığı problemlər üzündən 2020-ci il dünya iqtisadiyyatı üçün “itirilmiş il” hesab oluna bilər.

Məhz pandemiya ilə mübarizə tədbirləri dövlətlərin iqtisadiyyatına mənfi təsirlərini göstərdi və sosial çətinliklər xalqların həyatına, dövlətlərin fəaliyyətinə təsirsiz ötüşmədi. Azərbaycan iqtisadiyyatında müəyyən ləngimələr yaşansa da, Prezidentin reallaşdırdığı qabaqlayıcı tədbirlər, islahatlar ölkəmizin bu çətinlikdən çox az itki ilə çıxmasını şərtləndirdi.

Sevindirici haldır ki, inkişaf etmiş dövlətlərin aciz vəziyyətə düşdüyü pandemiya şəraitində də Azərbaycan inkişaf kursunu davam etdirir.

Son illərdə təbii fəlakət və digər hadisələr nəticəsində zərərçəkmiş sahibkarlara dəymiş ziyanın dəqiq hesablanaraq kompensasiya ödənilməsi, eyni zamanda onlara güzəştli şərtlərlə kreditlərin verilməsi sahibkarlar tərəfindən böyük rəğbətlə qarşılanmışdır.

Təsadüfi deyil ki, koronavirus pandemiyasının təsirindən yaranmış dərin maliyyə böhranı bir sıra ölkələrdə iqtisadiyyatın tənəzzülə uğramasına və sosial gərginliyin artmasına gətirib çıxardığı bir vaxtda, belə bir çətin şəraitdə Azərbaycan hökuməti ölkə sahibkarları üçün dəstək mexanizmlərini işə salmış, pandemiyadan zərər çəkən iqtisadi fəaliyyət sahələrinə Vergi Məcəlləsində güzəştlər edilmişdir. Eyni zamanda pandemiyanın sahibkarlara və iqtisadiyyata mənfi təsirlərinin azaldılmasına yardım məqsədilə Sahibkarlığın İnkişafı Fondu vasitəsilə maliyyə dəstəyi də olunmuşdur.

Pandemiyadan zərərçəkmiş sahələrdə fəaliyyət göstərən sahibkarlara dəstək məqsədilə ötən ilin iyun ayından iki proqramın - kredit-zəmanət və faizlərin subsidiyalaşdırılması mexanizmlərinin tətbiqinə başlanılıb. Kredit-zəmanət mexanizmi çərçivəsində yeni biznes kreditlərinin ayrılması, müraciətlərin onlayn rejimdə qəbul edilməsi üçün ölkədə ilk dəfə olaraq Elektron Kredit Platforması yaradılıb və sahibkarların istifadəsinə verilib. Pandemiya nəticəsində iqtisadiyyatın müxtəlif sektorlarında, o cümlədən özəl bölmədə nəzərə çarpan qeyri-müəyyən vəziyyət iş adamlarının müəyyən çətinliklər yaşamasına, onların potensialının azalmasına səbəb olub. Önləyici tədbirlər çərçivəsində bu dövrdə kiçik və orta sahibkarlığın potensialının artırılması istiqamətində ucuz maliyyə resurslarına əlçatanlığı, kreditlərin verilməsi və müxtəlif dəstəkləyici tədbirlərin göstərilməsi təmin edilib, habelə daha da əlverişli investisiya şəraiti yaradılıb.

Pandemiyanın mənfi təsirlərinin qarşısının alınması üçün Prezidentin təşəbbüsü ilə təsis edilmiş Azərbaycanda Koronavirusla Mübarizəyə Dəstək Fonduna, “Qarabağ Dirçəliş Fondu”na və “YAŞAT” fonduna maliyyə dəstəyinin həyata keçirilməsinə sahibkarlar da qoşularaq yüksək həmrəylik nümayiş etdirmişlər.

Bu günlərdə İqtisadiyyat Nazirliyinin Sahibkarlığın İnkişafı Fondu “Sahibkarlıq subyektlərinin maliyyə resurslarına çıxış imkanlarının genişləndirilməsi” mövzusunda vebinar keçirib. Qeyd edilib ki, hazırda sahibkarların maliyyə resurslarına çıxış imkanlarının genişləndirilməsi məqsədilə Fond tərəfindən yeni maliyyə mexanizmləri, kreditlərin verilməsi şərtləri işlənib hazırlanır və yaxın gələcəkdə sahibkarlar bu məhsul və xidmətlərdən istifadə imkanı əldə edəcəklər.

Mən də bir sahibkar kimi ölkəmizdə çalışan bütün həmkarlarımı bu əlamətdar gün -Sahibkarlar Günü münasibətilə təbrik edir, dövlətimizin iqtisadi qüdrətinin yüksəlməsi üçün bütün qüvvələrini səfərbər edərək fəaliyyətlərində uğurlar arzulayıram.

Rafiq QARAYEV,

“RR Şirkətlər qrupu”nun rəhbəri,

Qarabağ qazisi

Respublika.- 2021.- 25 aprel.- S.7.