Türkiyə Respublikasının yaranmasının 98-ci ildönümü qeyd olunub

 

 

 

Gəncədə Türkiyə Respublikasının elan olunmasının 98-ci ildönümü münasibətilə Məhsəti Gəncəvi Mərkəzində tədbir təşkil olunub. Tədbirdə Gəncənin, Şəmkir və Samux rayonlarının icra hakimiyyəti başçıları, Türkiyənin və Gürcüstanın Gəncədəki baş konsulları, şəhər ictimaiyyətinin nümayəndələri və ziyalılar iştirak ediblər. Tədbirdə şəhidlərin xatirəsi bir dəqiqəlik sükutla yad edilib, Azərbaycan və Türkiyə respublikalarının Dövlət himnləri səsləndirilib.

 

Gəncədəki Baş konsul Zeki Öztürk Türkiyə Res­publikasının Prezidenti Rəcəb Tayyib Ərdoğanın Cümhuriyyətin 98-ci ildönü­mü münasibətilə Türkiyənin xarici ölkələrdəki diplo­matik nümayəndəliklərinə göndərdiyi məktubu oxuyub. O bildirib ki, builki bayram digərlərindən fərqli olaraq Azərbaycanın işğal altın­da olan torpaqlarını azad etməsindən sonra qeyd edilən ilk bayramdır . "İkinci Qarabağ müharibəsində Azərbaycanın yanında olduq,torpaqların azad olunmasına birlikdə sevin­dik, şəhidlər üçün birlikdə kədərləndik, 44 gündən son­ra Azərbaycanın tarixi zəfərini də birlikdə qeyd etdik.

 

Ölkə prezidentləri 2021-ci il iyunun 15-də türk dünya­sının mədəniyyət paytaxtı olan Şuşada dostluq və qardaşlığımızı gücləndirəcək, əlaqələrin daha da inkişa­fına səbəb olacaq Şuşa Bəyannaməsini imzaladı­lar. Əlavə olaraq, Türkiyə Prezidentinin Azərbaycana bu günlərdə etdiyi səfər bir daha göstərdi ki, bizim birli­yimiz əbədi və sarsılmazdır. Çünki bu birliyin hədəfində hansısa üçüncü xalqlar və dövlətlər yox, sülh, sabitlik, təhlükəsizlik və rifah daya­nır", – deyə o əlavə edib.

 

Gəncə Şəhər İcra Hakimiyyətinin başçısı Niyazi Bayramov Türkiyə Cümhuriyyətinin elan olunmasının 98-ci ildönümü münasibətilə tədbir iştirak­çılarını və qardaş Türkiyə xalqını təbrik edib. O, qardaş Türkiyə xalqına firavanlıq və yeni nailiyyətlər arzula­yıb. "Ölkələrimiz arasında münasibətlər M.K. Atatürkün və ulu öndər Heydər Əliyevin ifadə etdikləri "Azərbaycanın kədəri kədərimiz, sevinci se­vincimizdir" və “Bir millət, iki dövlət” prinsipi üzərində qu­rulub. Azərbaycan Prezidenti İlham Əliyevin dediyi kimi, Türkiyə və Azərbaycan iki qardaş ölkə kimi hər zaman bir-birinin yanındadır.

 

İstər 44 günlük Vətən müharibəsi dövründə, istərsə də ondan əvvəlki dövrdə Türkiyə daim Azərbaycanın yanında olub. Hər iki ölkənin birliyi artıq qardaşlıq və əsl tərəfdaşlıq simvoluna çev­rilib. İnanırıq ki, bu birlik və qardaşlıq əlaqələri sarsılmaz və əbədi olacaqdır", – deyə Niyazi Bayramov qeyd edib.

 

Zabit Xəlilov

 Respublika.- 2021.- 2 noyabr.- S.12