İgidlik və şücaət nümunəsi

Azərbaycanın ərazi bütövlüyü uğrunda gedən Vətən müharibəsində döyüşlərdə qəhrəmancasına şəhid olan Beyləqan rayonunun Kəbirli kəndində anadan olmuş Yusifli Müzəffər Ziyəddin oğlunun doğum günü məzarı yanında anıldı.

Anım mərasimində rayon icra hakimiyyətinin başçısı Asif Ağayev, hüquq-mühafizə orqanlarının rəhbərləri, şəhidin yaxınları və rayon ictimaiyyətinin nümayəndələri şəhidin məzarını ziyarət etdilər. Yusifli Müzəffər Vətən müharibəsi zamanı Füzuli və Cəbrayıl rayonları və işğal altında olan bir çox ərazilərimizin alınmasında iştirak edib. Qəhrəman döyüşçü oktyabrın 9-da Füzuli döyüşləri zamanı şəhidlik zirvəsinə ucalıb və Beyləqan rayonunun Kəbirli kəndində dəfn olunub.

Mərasim iştirakçıları Müzəffərin, eləcə də, Kəbirli kənd şəhidlərinin məzarlarını ziyarət etmiş, önünə gül dəstələri düzmüş, ruhuna dualar ediblər. İcra başçısı Asif Ağayev şəhidin atası ilə söhbətində Vətənimizin bütövlüyü uğrunda canından keçən belə bir igidi böyüdüb, boya-başa çatdırdıqları üçün onlara təşəkkür etmişdir.

Azərbaycan Prezidenti İlham Əliyevin müvafiq sərəncamları ilə ölkəmizin ərazi bütövlüyünün təmin edilməsi uğrunda döyüş əməliyyatlarında iştirakına, hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyinə, şəxsi igidlik və şücaət nümayiş etdirdiyinə görə Yusifli Müzəffər Ziyəddin oğlu ölümündən sonra “Vətən uğrunda”, “Cəbrayılın azad olunmasına görə”, “Xocavəndin azad olunmasına görə”, “Füzulinin azad olunmasına görə” və “ İgidliyə görə” medalları ilə təltif edilib. Şəhid ailəsi dövlətin onlara göstərdiyi diqqət və qayğıya görə minnətdarlığını ifadə etmişdir.

Ərəstun ABDULOV

Respublika .- 2021.- 5 noyabr.- S.9.