Ümumdünya Qida Gününə həsr olunan tədbir

Azərbaycan Dövlət Aqrar Universitetində (ADAU) BMT-nin Ərzaq və Kənd Təsərrüfatı Təşkilatı (FAO) və Kənd Təsərrüfatı Nazirliyi (KTN) yanında Aqrar Kredit və İnkişaf Agentliyi (AKİA) ilə birgə 16 oktyabr - Ümumdünya Qida Gününə həsr olunmuş “Qlobal ərzaq təhlükəsizliyində aqrar təhsilin və təlimin rolunun gücləndirilməsi” mövzunda tədbir keçirilib.

Tədbir torpaqlarımızın bütövlüyü uğrunda canından keçən şəhidlərin əziz xatirəsinin bir dəqiqəlik sükutla yad edilməsi ilə başlayıb.

AZƏRTAC-ın bölgə müxbiri xəbər verir ki, universitetin Tədris işləri üzrə prorektoru, dosent Anar Hətəmov çıxış edərək, Ümumdünya Qida Gününün təsis olunmasında əsas məqsədin dünyada aclıqdan və qida çatışmazlığından əziyyət çəkən insanlara diqqətin ayrılması, ərzaq itkisi və tullantısının azaldılmasına dair qlobal maarifləndirmənin aparılması və hər kəs üçün sağlam qidalanmanın təmin edilməsinin vacibliyini vurğulamaq olduğunu bildirib.

Aqrar Kredit və İnkişaf Agentliyinin (AKİA) Beynəlxalq təşkilatlar və maliyyə qurumları ilə əməkdaşlıq sektorunun müdiri Teymur Nağıbəyli AKİA tərəfindən icra olunan “Aqrar Məşğulluğun Artırılması - AMAL” və “Qadınların iqtisadi gücünün artırılması - WEP” layihələri, FAO-nun Azərbaycan Ofisinin Əməliyyatlar üzrə mütəxəssisi Elməddin Namazov FAO-Azərbaycan tərəfdaşlıq proqramı çərçivəsındə icra olunan layihələr barədə, Aqrar Tədqiqatlar Mərkəzinin Tədqiqatlar Departamentinin rəhbəri Pərviz Əliyev “Dayanıqlı ərzaq sistemləri”, Türkiyənin Ege Universitetinin professoru İsmail Türkan “Post-genom dövründə bitki biologiyasının inkişafı”, ADAU-nun Bağçılıq kafedrasının dosenti Abbas İsmayılov “Biomüxtəlifliyin qorunmasının qida təhlükəsizliyində rolu” mövzusunda çıxışlar ediblər.

Sonra tələbələrin sualları mütəxəssislər tərəfindən cavablandırılıb.

Z. Cəmşidoğlu

Respublika.- 2021.- 20 oktyabr.- S.12