GƏNCƏNİ YENİLƏŞDİRƏN 18 SƏFƏR

"Bu, mənim Gəncəyə Prezident kimi 18-ci səfərimdir. Belə çıxır ki, orta hesabla hər il Gəncədə səfərdə oluram. Elə illər olub ki, iki dəfə olmuşam. Həm ona görə ki, Gəncə Azərbaycanın ikinci şəhəridir və bu şəhərə daim diqqət həmişə yüksək səviyyədə olub. İkincisi, ona görə ki, bir çox layihələr Gəncə şəhərində icra edilib və bu layihələrin icrası davam edir. Gəncə şəhərinin kompleks inkişaf planı həm təsdiqlənib, həm də uğurla icra edilir. On səkkiz ildir ki, mən ölkə Prezidentiyəm və 18 dəfə Gəncədə olmuşam".

İlham ƏLİYEV,

Azərbaycan Respublikasının Prezidenti.

Gəncənin ilk dirçəlişi 70-80-ci illərdə ulu öndər Heydər Əliyevin Azərbaycana rəhbərlik etdiyi dövrlərdən başlamış, o illərdə Gəncənin güclü iqtisadi potensialının təməli qoyulmuşdur. Gəncəlilərin yaddaşında həmin vaxtlar böyük yüksəliş illəri kimi xatırlanır. Lakin SSRİ-nin dağılması və o vaxtki səriştəsiz rəhbərliyin laqeydliyindən bu qədim şəhər iflic vəziyyətə düşmüşdür. Ümummilli lider Heydər Əliyevin xalqın təkidli xahişi ilə hakimiyyətə qayıdışı və dövlət rəhbərinin səfərindən az bir müddət sonra, Gəncə yenidən dirçəlməyə başladı. Ulu Öndər deyirdi: "Gəncə hər bir vətənpərvər azərbaycanlı üçün doğma və əzizdir".

Ölkə Prezidenti cənab İlham Əliyevin diqqət və qayğısı nəticəsində Gəncənin sürətli inkişafına nail olundu. Dövlət başçımızın Gəncəyə hər bir səfəri, şəhərin sosial-iqtisadi həyatında böyük rol oynadı. Gəncə simasını dəyişdi, yeniləşdi və müasirləşdi. Dövlət başçısı cənab İlham Əliyev Gəncəyə növbəti səfəri zamanı demişdir: "Mən yenidən Gəncəyə gəlmişəm. Bizim görüşlərimiz mütəmadi xarakter daşıyır. Mən çox şadam ki, hər dəfə Gəncəyə gələndə burada yeniliklər görürəm. Görürəm ki, şəhər abadlaşır, quruculuq işləri gedir və şəhər müasirləşir. Bu məni çox sevindirir. Çünki bizim hamımız üçün əziz, doğma şəhərdir. Azərbaycanın qədim şəhəridir, ölkəmizin ikinci şəhəridir. Biz hamımız çalışaq ki, Gəncədə gedən quruculuq, abadlıq işlərinə öz köməyimizi göstərək. Hər halda mən bunu edirəm və çox şadam ki, görülən işlərin çox gözəl nəticələri də vardır. İş olan yerdə həmişə nəticə də olur".

Gəncənin qədimliyinin, zəngin tarixinin, ənənəvi memarlıq üslubunun qorunub saxlanması ən ümdə məsələlərdən olmuşdur. Artıq ilk tarixi abidələrdən olan Cavad xan məqbərəsi, VIII əsrə aid tarixi memarlıq abidəsi - xalq arasında Göy günbəz, Göy məscid, yaxud Göy İmam kimi tanınan "İmamzadə" kompleksi, XVII əsr Azərbaycan memarlığının şah əsərlərindən sayılan Şah Abbas məscidi və ya Gəncə Cümə məscidi, Gəncə darvazası kompozisiyası, Cəmərd Qəssab türbəsi və s. bərpa olundu. Gəncənin intensiv inkişafını təmin edəcək başlıca amillərdən olan yeni müəssisələr açılıb. Beynəlxalq standartlara cavab verən aeroport inşa olunub, müasir diaqnostika mərkəzləri istifadəyə verilib, polad istehsal edən nəhəng Gəncə Polad Kompleksi və alüminium istehsal edən DET-AL Alüminium zavodu işə düşüb. Bütün bunlar ölkə Prezidentinin qeyri-neft sektorunun inkişafına yönəlmiş siyasətinin real nəticəsi və bariz nümunəsidir. Tam əminliklə deyə bilərik ki, cəmi bir neçə il ərzində intensiv inkişaf edən Gəncə artıq Avropa şəhərləri ilə müqayisə edilən bir məkana çevrilib.

Bəli, dövlət başçısı qədirbilən gəncəlilərə qürur hissini, sabitliyi, əmin-amanlığı və sabaha inamı qaytardı. Ölkə Prezidentinin hər bir səfəri yadda qalmaqla, Gəncənin simasını dəyişdi. Dünya standartlarına cavab verən "Majestic Palace" oteli, möhtəşəm "Gəncə Mall" Ticarət Mərkəzi, Azərbaycan Dövlət Aqrar Universitetinin yeni inşa olunan yataqxana kompleksi, "Grand Qafqaz" Ticarət Kompleksi, Mirzə Şəfi Vazeh Muzeyi, Əziz Əliyev adına mədəniyyət və istirahət parkı, analoqu olmayan Heydər Əliyev Park Kompleksi, əzəmətli "Zəfər tağı", "Gəncə çayı"nın sahilində füsunkar gözəlliyə malik istirahət parkı, milli ornamentlərlə zəngin olan, yaraşıqlı Gəncə Dövlət Filarmoniyası, Uşaq əyləncə mərkəzləri və sairə ölkə Prezidentinin Gəncə sakinlərinə diqqət və qayğısının bariz nümunəsidir. Gəncə Dövlət Filarmoniyasının yeni inşa edilmiş binasının istifadəyə verilməsi dövlət başçımızın Azərbaycan musiqi mədəniyyətinə verdiyi növbəti töhfə və göstərdiyi qayğının təzahürü idi.

Gəncədə sosial-iqtisadi layihələrin uğurla reallaşdırılması nəticəsində yeni iş yerlərinin yaradılması öz bəhrəsini vermişdir. Hazırda "DET-AL" Alüminium zavodunun məhsulları dünyaya ixrac olunur.

Ölkə Prezidenti cənab İlham Əliyevin Gəncəyə növbəti səfəri yaddaqalan oldu. Bu, ölkə rəhbərinin Azərbaycanın ikinci böyük şəhəri - Gəncəyə 18-ci səfəri idi. Bu illər ərzində şəhər elektrik enerjisi ilə tam təchiz edilib. 10 yarımstansiya tikilib və ya təmir edilib. Qazlaşdırma layihəsi tam icra edilib. Hazırda, içməli su layihəsi icra edilməsi ilə Gəncənin içməli su və kanalizasiya problemləri birdəfəlik həll olunacaq. Gəncəyə Bakıdan dəmir yolu xətti tam modernləşdirilib və xəttə sürətli qatarlar buraxılıb. Möhtəşəm Gəncə Dövlət Dram Teatrının yeni binası istifadəyə verilib. Gəncədəki Yeni ASAN Mərkəzi - daha bir mərkəzin açılışı şəhər sakinləri və ətraf rayonların əhalisinə yüksək səviyyədə xidmət edəcək. Xüsusilə qeyd etmək lazımdır ki, "ASAN Xidmət" mərkəzinin işçiləri əsasən şəhid ailəsi üzvləri və qazilərdir. "Azərbaycan Dəmir Yolları" QSC-nin Gəncə lokomotiv deposu istismara verilib. Yeni depoda 75 nəfər işlə təmin olunacaq. Gəncə İdman Sarayında tikinti işləri gedir. Bu, Azərbaycanda olan ən böyük idman sarayıdır. Müharibə zamanı raket zərbələri nəticəsində evləri dağıdılmış vətəndaşlara dəstək, evlərin bərpası, yeni evlərlə təminatı da dövlətin sosial prioritetlərindəndir. Eyni zamanda, ölkə rəhbəri cənab İlham Əliyev Gəncəyə səfəri zamanı Gəncə Memorial Kompleksinin də təməlini qoyub.

Hazırda, Gəncə İdman Sarayının tikintisi davam edir. Burada güləş məktəbi, boks məktəbi, həmçinin əl oyunları üçün - basketbol, voleybol, həndbol zalları 50 metrlik üzgüçülük hovuzu, yardımçı otaqlar və zallar, otel mövcuddur. Ölkə başçısı səfər çərçivəsində bildirmişdir ki, "Əlbəttə ki, şəhərin əhalisi artır. Əhalinin bu artımına və müasir tələblərə uyğunlaşmaq üçün biz, əlbəttə ki, əlavə addımlar atırıq və atacağıq. Eyni zamanda, hazırda Daşkəsən rayonunda dağ-mədən sənayesinin uğurla inkişafı da böyük dərəcədə Gəncədəki infrastrukturla bağlı olacaq. Çünki orada həm qızıl yataqları, həm də dəmir filizi yataqları mövcuddur. Bu işlərin sürətləndirilməsi üçün əlavə göstərişlər verilib. Dəmir filizi yataqlarından səmərəli istifadə etmək üçün zəncirvari sənaye klasteri yaradılmalıdır. Əlbəttə ki, Gəncənin də burada xüsusi rolu olacaqdır. Bir sözlə, Regionların Sosial-İqtisadi İnkişafı Dövlət proqramlarının icrası nəticəsində Gəncə şəhəri həmişə xüsusi yerə malik olubdur. Bu gün də belədir, sabah da belə olacaq".

Qeyd olunan innovativ inkişaf, demokratikləşmə yolunda atılan addımlar Cənubi Qafqazın ən nüfuzlu ölkəsi kimi tanınan Azərbaycanımızın bütün sahələrdə dinamik inkişaf etdiyini bir daha təsdiqləyir. Bəli, son 18 ildə uğurla həyata keçirilən siyasi islahatlar, demokratik inkişafla bağlı önəmli qərarların, beynəlxalq standartlara cavab verən qanunların qəbul edilməsi, iqtisadi sahədə liberallaşma siyasətinin məntiqli nəticəsi ölkəmizi beynəlxalq aləmdə etibarlı tərəfdaşa çevirmişdir. Bu illərdə Azərbaycanın dinamik inkişafı təmin edilmiş , ölkəmiz bütün sahələr üzrə, demək olar ki, yeni mərhələyə qədəm qoymuşdur. Bu gün, Azərbaycan, sözün əsl mənasında, müstəqil siyasət aparan ölkələrdən birinə çevrilib. Ərazisi, əhalisi o qədər də böyük olmayan ölkələrə diqqət yetirsək, müstəqil siyasət aparmaq iqtidarında olan dövlətlər bir o qədər də çox deyil. Azərbaycan tam müstəqil siyasət aparan dövlətdir. Bizim siyasətimiz milli maraqlar üzərində qurulub və bu siyasətin mənbəyi xalqın maraqlarıdır. Bu siyasət Azərbaycan xalqı tərəfindən dəstəklənir və müdafiə olunur. Eyni zamanda, bu uğurların əsas səbəblərindən biri də "xalq-iqtidar" vəhdətidir. Son 18 il ərzində iqtisadi, siyasi, mədəni sahələrdə qazanılan uğurlar, xarici siyasətdəki nailiyyətlər beynəlxalq aləmdə də etiraf olunur. İqtisadi inkişafımız dünya miqyasında rekord səviyyədədir. Bu, dünya miqyasında analoqu olmayan inkişafdır. Bu inkişaf böyük valyuta ehtiyatlarımızın formalaşdırılmasına əlverişli şərait yaratmışdır.

Dünyanı bürüyən böhran zamanında makroiqtisadi sabitliyin qorunub saxlanılması, qeyri-neft sektorunun nəzərəçarpacaq dərəcədə artması dövlətin həyata keçirdiyi inkişaf kursunun səmərəliliyinin əyani göstəricisidir.

Zabit XƏLİLOV

Respublika .- 2022.- 3 fevral.- S.6.