Mədəniyyət paytaxtımız bu dəfə meydanı media nümayəndələrinə verdi

Ötən ilin may ayında Cıdır düzündə keçirilən "Xarıbülbül" musiqi festivalını xatırlayıram. Dünyanın bir çox yerlərindən gəlmiş iştirakçıların bir-birindən maraqlı çıxışları, milli musiqimizin şah əsərləri açıq səma altında düzənlənən səhnədən ətrafa yayıldıqca uzaqdan-uzağa hər bir seyrçi qürur hissi keçirirdi. Musiqinin çalarları dəyişdikcə təbiət də coşurdu. Göy üzündə dolmuş buludlar da bir anın içərisində günəşi bağrına basıb yerə tələsirdi. O da öz nəğməsini oxuyurdu. Bu yerlərin təbiəti belədir, nazlıdır, şıltaqdır, hərarətlidir. Şuşada baş tutan tədbirlərin havasına hava qatır. Ölkə başçımızın iştirak etdiyi tədbirlər isə daha maraqlı, möhtəşəm olur, elə Şuşanın havasına köklənir həmişə...

İyulun 21-də "4-cü Sənaye İnqilabı dövründə Yeni Media" mövzusunda Şuşa Qlobal Media Forumuna dünyanın bir çox ölkəsindən olan həmkarlarımız toplaşmışdı. Dövlət başçımız yenə sözə meydan vermişdi: "Mən çox şadam ki, sizi bu gün burada görürəm, çox sağ olun bizim dəvətimizi qəbul etmisiniz və Şuşa Qlobal Media Forumunda iştirak edirsiniz. Bu, bizim ölkəmiz üçün və əlbəttə, Qarabağ bölgəsi üçün çox möhtəşəm bir tədbirdir".

Təbii ki, ilk sual qardaş Türkiyənin "TRT World"un təmsilçisi Bora Bayraktardan gəldi: "...zənninizcə, biz bir yerdə nələri etməliyik, Türkiyə ilə əməkdaşlıq baxımından ən aktual məsələlər hansılardır?", - sualına dövlət başçısı ətraflı, dolğun cavab verərək fikrini belə tamamladı: "Əlbəttə, mən bütün məsələləri açıqlamaq istəməzdim, ancaq bu məlumdur ki, qarşıdan gələn illərdə Türkiyə və Azərbaycan regionda daha önəmli rol oynayacaqdır. Əlbəttə ki, bu potensialdan istifadə edəcəyik ki, ölkələrimizi daha da yaxınlaşdıraq".

Azərbaycan Prezidenti iki qardaş ölkənin münasibətlərindən danışarkən qeyd etdi ki, bu münasibətlər dostluq və qardaşlıq əlaqələri üzərində qurulub və bu, çox gözəl təməldir. Dövlət başçısı İkinci Qarabağ müharibəsində Türkiyənin mənəvi, siyasi dəstəyindən, müxtəlif sahələrdəki uğurlu əməkdaşlıqdan danışdı, Türkiyənin regionda sabitləşdirici rol oynadığını bir daha dünyanın diqqətinə çatdırdı.

TASS Agentliyinin təmsilçisi Mixail Qusmanın sualları da müəyyən məqamlara aydınlıq gətirmək üçün bir körpü oldu. Rusiya-Azərbaycan münasibətləri, 2022-ci il fevralın 22-də Moskvada iki ölkə arasında imzalanan müttəfiqlik Bəyannaməsinin perspektivləri barədə sualı da dövlət başçısı siyasi sayıqlıqla cavablandırdı. Ermənistan-Azərbaycan münaqişəsinin aradan qaldırılması, münasibətlərin normallaşdırılması istiqamətində Rusiyanın rolundan danışdı: "Dünyada Rusiya-Ukrayna müharibəsinin başlanmasından, o cümlədən İkinci Qarabağ müharibəsindən sonra vəziyyət bizim regionda dramatik şəkildə dəyişdiyi üçün, əlbəttə, müxtəlif qiymətləndirmələr, müxtəlif təhlillər və müxtəlif rəylər qaçılmazdır. Lakin yenə də imkandan istifadə edərək demək istəyirəm ki, hər halda, belə məqamlar Azərbaycan rəhbərliyinin siyasi iradəsinə təsir etmir. Ona görə düşünürəm ki, münasibətlərimizin gələcəyi də ötən illərdə olduğu kimi, belə müsbət və uğurlu olacaqdır".

Dövlət başçısı Forumda bir çox sualları cavablandırdı, çağırışlar etdi. "TRT World" Araşdırmalar Mərkəzinin rəhbəri Tarek Çerkauidinin: "Növbəti 10 ildə Şuşanı necə görmək istəyirsiniz?", - sualına cavab da ətraflı oldu: "...Şuşaya səyahət edən insanlar burada tez-tez dəyişikliklərin şahidi olurlar. Çünki bu şəhər gündən-günə gözəlləşir... Ümid edirəm ki, qonaqlarımız burada özlərini rahat hiss edirlər...".

Bəli, bu, doğrudan da belədir. Şuşaya ayaq basan hər bir əcnəbi onun gözəlliyinə heyran olur. Media Forumu çərçivəsində iştirakçılar da Şuşa şəhərinin tarixi məkanları və əsrarəngiz təbiətilə tanış olublar. Qonaqlar əvvəlcə Şuşa qala divarlarını ziyarət edib, onun tarixi barədə məlumat ala biliblər. Sonra onlar Azərbaycanın tanınmış şəxsiyyətləri Natəvan, Bülbül və Üzeyir Hacıbəyovun güllələnmiş heykəllərinin yerləşdiyi Şuşa şəhər mərkəzi meydanına gəliblər. Şuşa Şəhəri Dövlət Qoruğu İdarəsinin əməkdaşı qonaqlara şəhər və güllələnmiş heykəllər barədə məlumat verib. Xurşidbanu Natəvanın evi, Xan qızı bulağı, Şuşa qalasının Gəncə qapısı, Yuxarı Gövhər Ağa məscidi, Mehmandarovların malikanə kompleksi və Qazançı kilsəsində də olan iştirakçılara, həmçinin gəzinti zamanı işğal dönəmində mədəniyyət abidələrimizə ermənilər tərəfindən vurulan ziyan, qədim artefaktlarımızın saxtalaşdırılması barədə də məlumat verilib.

Daha sonra qonaqlar Cıdır düzünə gəlib, buradan açılan əsrarəngiz mənzərəni seyr edib, başı dumanlı dağlara salamlarını çatdırıblar. Bir sözlə, zəngin təəssüratla ayrılıblar Şuşadan. Getməzdən öncə fikirlərini də bölüşüblər...

NTV-nin xarici xəbərlər departamentinin rəhbəri Əhməd Yeşiltəpə deyib: "Şuşa şəhərinə gələrkən yolda iki fərqli mənzərə ilə rastlaşdım. Bir tərəfdə ermənilərin törətdikləri vandallıqlar, digər tərəfdə isə Azərbaycanın bərpa etdiyi Şuşa şəhəri var. Ötən gün Prezident İlham Əliyev Forum iştirakçıları ilə görüşü zamanı dünyaya bu torpaqların Azərbaycanın olduğunu, bu səbəbdən sahib çıxdıqlarını və yenidən inşa etdikləri mesajını verdi".

Şuşa Qlobal Media Forumunda iştirak edən "Economyfirst Limited London" şirkətinin direktoru Klaus Jürgens heyranlığını dilə gətirib: "Qazançı kilsəsini bərpa etmək və onun əzəmətini qoruyub saxlamaqla Azərbaycan öz sülhsevərliyini göstərir. Bu əraziləri məhv etmək və ya talamaq əvəzinə bərpa edərək bütün dünyaya belə vəziyyətdə necə davranmağın lazım olduğunu nümayiş etdirir. Bu məsələlərə hörmətlə yanaşmaq çox gözəl ideyadır, düzünü desəm, çox təsirləndim".

Şuşa bir daha öz gözəlliyi ilə gələnləri heyran etdi. Bu möhtəşəm tədbir tarixin yaddaşına yazıldı, gələcək nəsillərə ərməğan üçün. Dövlət başçısı dünyaya nümayiş etdirdi ki, Şuşanın infrastrukturu inkişaf etdirilir, ermənilərin dağıtdığı şəhər yenidən qurulur. Şuşanın sabahından danışarkən dediyi kimi: "...Şuşanın Baş planı möhtəşəmdir, hesab edirəm ki, 3-4 il ərzində bu şəhər təkcə Azərbaycanın və Qafqazın deyil, dünyanın ən gözəl şəhəri olacaqdır...".

Zümrüd QURBANQIZI

Respublika.- 2023.- 26 iyul.- S. 1; 3.