Humanitar yüklərin daşınması üçün alternativ yol mövcuddur

İyulun 26-dan etibarən Ermənistan növbəti şouya start verib. Ermənilər bu dəfə Azərbaycanla razılaşdırılmadan yük maşınlarını Qarabağa keçirmək üçün Laçın postuna yaxın ərazidə cəmləşiblər. Bunun səbəbi isə ondan ibarətdir ki, guya Qarabağın erməni əhalisi ağır humanitar böhran yaşayır. Halbuki, Azərbaycan tərəfi hələ iyulun 15-də humanitar yüklərin daşınması üçün Ağdam-Xankəndi yolunu təklif kimi gündəmə gətirmişdi.

Avropa İttifaqı Şurasının prezidenti Şarl Mişelin vasitəçiliyi ilə Azərbaycan Prezidenti İlham Əliyev və Ermənistanın baş naziri Nikol Paşinyan arasında Brüsseldə baş tutan üçtərəfli görüşün növbəti raundunda müzakirə edilən məsələlərdən biri də Xankəndiyə Ağdam vasitəsilə humanitar yardımların daşınması olub. Dövlətimiz növbəti dəfə Qarabağın erməni sakinlərinə qarşı humanist addım atıb. Bununla da Azərbaycan öz erməni vətəndaşlarına hər cür dəstək verməyə hazır olduğunu bəyan edib.

Hətta üçtərəfli görüşdən sonra mətbuata açıqlama verən Şarl Mişel özü də qeyd edib ki: "Mən Laçın yolunun açılmasının vacibliyini vurğuladım. Mən Azərbaycanın Ağdamdan humanitar yardımları təmin etmək istəyini də qeyd etdim. Mən hər iki variantı vacib hesab edirəm və əhalinin ehtiyaclarının təmin olunması üçün hər iki tərəfdən humanitar yardımların çatdırılmasını dəstəkləyirəm".

Ancaq ermənilərin Azərbaycanın belə humanist yanaşmasını hay-həşirlə qarşılaması, elə erməni xislətini göstərir. Burada qeyd edilməli olan digər bir məqam da rusiya sülhməramlılarının məsələyə qeyri-obyektiv yanaşmasıdır. Suveren ərazilərimizdə müvəqqəti yerləşdirilən sülhməramlı kontingentin dəstəyilə separatçı qüvvələrin etiraz aksiyalarına başlamasının ən böyük səbəbi də Brüssel görüşündə müzakirə olunan Ağdam-Xankəndi yolunun istifadə olunması təklifi olub. Ermənilərin onlara təklif olunan yeni humanitar yoldan imtina etməsinin ən böyük səbəbi regionda yaranan yeni reallıqlarla barışmamasıdır. Onlar hələ də 2020-ci ildən qabaqkı dövrdə olduqlarını zənn edirlər. Separatçı rejim illərdir Qarabağdan Ermənistana və ya əks istiqamətdə sorğu-sualsız hərəkət edib. İndi isə onların belə bir şansı olmadığından əllərində əsir saxladıqları erməni sakinlərindən siyasi məqsədlər üçün istifadə edirlər. Xunta rejimi və Ermənistan birdəfəlik anlamalıdır ki, artıq dövrü-zaman dəyişib, Azərbaycan ərazi bütövlüyünü bərpa edib.

2020-ci ildə İkinci Qarabağ müharibəsində qazanılmış qələbədən sonra əsası qoyulan digər bir məsələ də ermənilərin reinteqrasiya prosesi oldu. Lakin Ermənistan dövləti və separatçı rejim başda olmaqla, bəzi xarici dairələr də, reinteqrasiya prosesinə ciddi əngəl törətməyə çalışırlar. O səbəbdən də həmin qüvvələr dinc sakinlərin Ağdam-Xankəndi yolundan istifadəsini qadağan edirlər. Hətta onlar nümayişkarcasına həmin yolun Əsgəran hissəsini beton hissələrlə bloklayaraq əhalinin bu yoldan giriş-çıxış etməsinə mane olurlar. Elə buradan da görünür ki, "gərgin humanitar vəziyyət" və ya "blokada" tipli xəbərlər tirajlamaq siyasi manipulyasiyadan başqa bir şey deyil. Təəccüblüdür ki, dünya birliyi son hadisələrə görə qondarma rejimə heç bir təzyiq göstərmir. Heç kim onlardan erməni etnik azlıqlarını əsir kimi saxladıqlarının haqq-hesabını sormur.

Bunun əvəzində isə bəzi təşkilat və siyasi dairələr son günlər Azərbaycana qarşı qərəzli çıxışlar etməkdə davam edir. Beynəlxalq Qırmızı Xaç Komitəsindən sonra Avropa İttifaqının xarici əlaqələr və təhlükəsizlik siyasəti üzrə ali nümayəndəsi Jozep Borelin erməni tərəfinin yaydığı saxta təbliğat və siyasi manipulyasiyalara əsaslanaraq, Laçın yolunu "blokada" adlandırması Qərbin adəti üzrə Azərbaycan-Ermənistan məsələsinə ikili yanaşma sərgiləməsidir.

Dövlətimiz isə bütün bunlara cavab olaraq bir daha hər kəsə bəyan etdi ki, humanizm pinsiplərinə sadiqlik Azərbaycanın əsas yol xəritəsidir. İyulun 27-də Qarabağın erməni əhalisinin Beynəlxalq Qırmızı Xaç Komitəsinin (BQXK) vasitəçiliyi ilə Həkəri çayının üzərində Azərbaycan Ermənistan sərhədində fəaliyyət göstərən Laçın dövlət sərhədindən buraxılış məntəqəsindən sərbəst keçidinə növbəti dəfə şərait yaradılıb. Qarabağdan Ermənistana hərəkət edən 7 nəqliyyat vasitəsi və 34 şəxsin buraxılış məntəqəsində qaydalara uyğun olaraq yoxlanıldıqdan sonra keçidi təmin edilib. Həmin 34 şəxsin 11-i Beynəlxalq Qırmızı Xaç Komitəsinin üzvü, 12-si tibbi ehtiyacı olan şəxslər və onları müşayiət edən 10 ailə üzvü, eləcə də 1 nəfər tibb heyəti olub.

Beləliklə, son hadisələr belə deməyə əsas verir ki, Ermənistan və onu idarə edənlər beynəlxalq aləmdə Azərbaycanın yüksələn nüfuzuna zərbə vurmağa çalışırlar. Ona görə də qarşımızda duran düşmənin hər cür şərəfsizliyə əl ata biləcəyini yaddan çıxarmamalı, bütün hadisələrə səbir və dözümlə qarşılıq verməliyik.

Musa BAĞIRLI

Respublika.- 2023.- 28 iyul.- S. 1; 5.