Siyasi şüurluluğun təkamülü

2024-cü il fevralın 7-də keçirilən növbədənkənar prezident seçkilərində qürura söykənən yüksək seçici fəallığı və milli təfəkkürdən qaynaqlanan üstün seçki mədəniyyəti bunu bir daha təsdiq etdi

Müstəqillik yolunda ən mühüm addımlardan biri də demokratikləşmədir. Bu yol ümumbəşəri dəyərlərə qovuşmaqdan, söz və fikir azadlığından, milli-mənəvi dəyərlərin müasir dövlətçilik tələblərinə uyğunlaşmasından keçir. Müstəqilliyin taleyi isə dövlətçiliyin formalaşdırılaraq möhkəmləndirilməsi, iqtisadiyyatın inkişaf modelinin hazırlanaraq dirçəldilməsi və milli-mənəvi dəyərlərin qorunub saxlanaraq inkişafı kimi üç amildən çox asılıdır. İlk iki amil obyektiv strateji fəaliyyət proqramına görə vasitə və təməl olsa da, ali məqsəd milli-mədəni və mənəvi dəyərlərin bərpası, xalqın özünüdərkidir. Ötən əsrdə insanların şüuru qeyri-dövlət mülkiyyət formasının mövcudluğuna uyğunlaşmadığından bazar iqtisadiyyatına keçid və azad iqtisadi rəqabətin inkişafı ciddi maneələrlə üzləşirdi. Ən böyük çətinliklər isə demokratik cəmiyyət quruculuğuna adekvat düşüncənin formalaşmaması ilə üzvi surətdə bağlı idi. Bu təbii prosesin əsas səbəbi eyni vaxtda bir neçə istiqamətdə keçid dövrünün yaşanması idi:

- müstəqil dövlətçiliklə bərabərhüquqlu dövlətlərarası münasibətlər sisteminə;

- bir ictimai-iqtisadi formasiyadan digərinə;

- totalitar cəmiyyətdən demokratik cəmiyyətə keçid.

Müstəqillik üçün iqtisadiyyatın inkişafı, dövlətçiliyin möhkəmləndirilməsi vacib şərtlərdən olsa da, son məqsəd deyil. Milli-mədəni, mənəvi dəyərlərin qorunması, xalqın öz mənliyinin sahibi olması üçün iqtisadiyyatın inkişafı ən mühüm şərtlərdəndir. İqtisadi inkişafı təmin etmək üçün dövlətçiliyin möhkəmləndirilməsi zəruridir. Dövlətçiliyin möhkəm təməli isə ictimai-iqtisadi sabitliyi təmin edərək yüksək nüfuzla beynəlxalq ictimai-iqtisadi əlaqələr sisteminə daxil olmaqla mümkündür. Göründüyü kimi, müstəqilliyin ali məqsədi üçün digər iki amilin varlığı zəruri və kafi şərtlər hesab olunur. Müstəqillik qazanan keçmiş İttifaq respublikalarından bəziləri real beynəlxalq münasibətlər sistemini, iqtisadi, siyasi və mədəni-mənəvi dəyərləri obyektiv qiymətləndirərək milli və ümumbəşəri maraqlar arasında optimal əlaqə, uyğunluq yaradaraq onların sintezinə əsaslanan ictimai-siyasi sabitliyə nail ola bildilər.

Ən mükəmməl demokratiya modeli

belə transplantasiya oluna bilməz

Qərbi kor-koranə təqlid etməyə çalışan ölkələrdən fərqli olaraq Azərbaycan müstəqil siyasət yeridərək dayanıqlı, stabil, demokratik cəmiyyət qurmaq əzmini nümayiş etdirdi. Belə məsuliyyətli bir dövrdə kənar təsirlərə uymamaq, yaradıcı əzmkarlıq, iradə nümayiş etdirmək artıq qərarlaşmış, stabil cəmiyyətlərdən fərqli olaraq ölkə başçısından daha böyük məsuliyyət tələb edir. Keçid dövründə ölkəmizə çox böyük dövlətçilik təcrübəsi olan, müdrik dövlət xadimi, fövqəladə insan ulu öndər Heydər Əliyevin rəhbərlik etməsi əlavə prioritet idi. Əks halda, formal müstəqillik olsa da, digər dövlətlərin təsiri altına düşmək və ya milli düşmənlərin ətəyindən yapışmaq qaçılmaz idi. Burada bəzi dövlətlərin subyektiv siyasi mövqeləri nisbətən asan izah olunsa da, regiondan uzaq olan dövlətlərin müdaxilələri xüsusi təhlil sayəsində daha böyük kontekstdə bəlli olur.

Başqalarının etdiklərini təkrarlamaqla böyük uğurlara nail olmaq mümkün olmadığından Azərbaycan həmin illərdə Heydər Əliyevin rəhbərliyilə müstəqil inkişaf yolunu müəyyənləşdirdi, iqtisadi islahatların da, dövlət quruculuğunun da, demokratiyanın da ölkəmizə uyğun öz modelini hazırladı. Xarici "məsləhətçilər" özlərinə xas olan standartlarla islahatlar və Qərb modelində demokratiya təklif edirdilər. Heydər Əliyev isə yaradıcı dövlət başçısı olduğundan Azərbaycanda demokratiyanın ictimai-siyasi tərəqqi kontekstində həyata keçirilməsinin zəruriliyini xüsusilə qeyd edirdi. Bizə demokratiya ixrac etmək istəyənlərə (hədiyyə belə etmək istəyənlər var idi) də böyük səbir, təmkin və məntiqlə yerli şəraiti və milli xüsusiyyətləri nəzərə almağın vacibliyini izah edirdi.

Ən mükəmməl demokratiya modellərinin süni transplantasiyasının əleyhinə olmaqla milli və dövlətçilik ənənələrinə əsaslanan təbii demokratik cəmiyyət qurmaq yolunu seçən Ümummilli Lider demişdir: "Demokratiyanı bir-iki gündə əldə etmək mümkün deyil. Demokratiya insanların şüurunda dəyişiklik deməkdir. Bu dəyişiklik heç bir inqilabla olmur, təkamül yolu ilə, tədricən gedir".

Ulu Öndər bununla xarici ekspertlərə izah edirdi ki, demokratiya kənardan transfer yolu ilə mümkün deyil. O, milli-mənəvi tərəqqinin, ictimai şüurun inkişafının qanunauyğun nəticəsi kimi yaranmalı, mentalitetə söykənməklə tədricən getməlidir. Ölkə inkişaf etdikcə, siyasi mədəniyyət yüksəldikcə, siyasi metodlar da dəyişir və cəmiyyət üzvləri partiyalar, ictimai təşkilatlarla öz iradələrini seçkilər vasitəsilə həyata keçirməyə çalışırlar. Demokratiya xalqın hakimiyyəti olmaqla siyasi şüurluluqla mütənasib inkişaf edir. Heydər Əliyev müstəqil dövlətçiliyin əsasını qoyduqdan sonra cəmiyyətin bütün təbəqələrinin düşüncə və mənafelərinin təmsil olunmasına imkan verən dinamik ictimai-siyasi stabillik yaratdı. Bu sabitliyin mövcud olduğu cəmiyyət plüralizm və əsl demokratiya zəminində formalaşmış cəmiyyətdir. Cəmiyyət sözsüz ki, bircins bir toplum deyil. Onda milli mənafeləri təmin etmək iqtidarında olan insanlarla yanaşı, analitik təhlil qabiliyyətindən məhrum olduqlarına görə təsirə düşən, təhrikə uyanlar da var. Həmçinin "demokratiyanı alma kimi bazardan almaq istəyənlər" də var, "dibçək demokratiyası" olmaq istəyənlər də.

Bu gün Azərbaycanda demokratikləşmə prosesi ilə paralel siyasi şüur və siyasi mübarizə mədəniyyəti də inkişaf etmişdir. Bunlardan birincinin ikincini qabaqladığı dövr artıq arxada qalıb. Hazırda dövlət quruculuğunda demokratik prinsiplər müntəzəm şəkildə təmin olunmaqla yanaşı, siyasi biliklərin və siyasi mədəniyyətin daha da inkişaf etməsi naminə ardıcıl və məqsədyönlü işlər görülür. Siyasi mədəniyyət yüksək olan ölkələrdə də partiyaların və ictimai təşkilatların iradəsi siyasi metodlarla, ən əsası da, seçkilər vasitəsilə həyata keçirilir.

Seçkidə hər bir vətəndaşın (siyasi xadim, ziyalı, alim, dünyaşöhrətli sənətkar, sadə qulluqçu, müəllim, həkim, mühəndis və b.) bir səsi var. Bu baxımdan da səsvermə mütəşəkkil xalqın deyil, əhalinin mövqeyini əks etdirir. Əhalinin pərakəndə strukturunun iradəsini ümumxalq iradəsi ilə kompensasiya etmək isə cəmiyyətin mütərəqqiyönümlü üzvlərinin əsas vəzifələrindən, məqsədlərindəndir. Dövlətçiliyin daha da möhkəmləndirilməsi mövqeyindən aparılan, analitik təhlilə, siyasi gerçəkliyin anladılmasına əsaslanan təbliğatın kütlə psixologiyasına istinad edən, populist xarakterli təbliğatdan daha effektli olması da bəllidir. Belə məqamlarda siyasi cəhətdən yetkin olmayan seçicilər, yəni öz mövqelərini şəxsi və məhəlli xarakterli mənafelərə əsasən bildirənlər təsadüfi təsir altına düşür, nəticədə ümummilli mənafe, müqəddərat baxımından aldanmış olurlar.

Məqsədləri ancaq siyasi dividend qazanmaqdan ibarət olan, populist çıxışlardan fərqli olaraq təhlilə söykənən siyasi gerçəkliyin və əsl həqiqətin seçicilərə çatdırılmasına əsaslanan mövqe ümumxalq mənafeyini ifadə edir. "Dibçək liderləri"ndən fərqli olaraq ən yaxşı siyasi liderlər süni surətdə deyil, siyasi həyatın özündə yetişir. Hazırda Azərbaycan demokratik mübarizəyə şərait yaradılmış böyük siyasət meydanıdır. Bu meydanda beynəlxalq aləmdə yaranan siyasi oriyentirləri nəzərə alaraq müstəqil siyasət apara bilən lider əsl milli-siyasi liderdir. Demokratik cəmiyyət quruculuğu ənənələrini yaşadan, müasir demokratikləşmə proseslərini əxz edən ölkəmizdə siyasi şüur, bilik və siyasi mübarizə, mədəniyyət paralel surətdə inkişaf etmişdir. Xalqın siyasi və hüquqi biliklərinin artırılması sahəsində həyata keçirilən tədbirlər demokratik prinsiplər əsasında yeni cəmiyyət qurulmasına, əhalinin siyasi şüurluluğunun təkamülünə gətirib çıxarmışdır.

1993 -cü ildən başlayaraq həyata keçirilən hüquqi dövlət quruculuğu, demokratiya, söz və mətbuat azadlığı, plüralizm, yeni iqtisadi münasibətlər, azad sahibkarlıq və s. ideyaların reallaşdırılması da siyasi biliklərin, siyasi mədəniyyətin inkişafında ardıcıl və məqsədyönlü işlərdəndir. Bütün bunlarla yanaşı, iqtisadi inkişaf səviyyəsi, rasional düşüncə üslubu, siyasi təfəkkür mədəniyyəti Azərbaycanın Avropa ölkəsi kimi təsbit olunmasına əsas verdi. Şərq ölkəsi sayılsaq da, XIX əsrin ortalarından başlayaraq ilk dünyəvi məktəblərin, teatrın, operanın, qəzetin, universitetin, parlamentin, digər hüquqi dövlət elementlərinin və s. yaranması məhz Azərbaycanda gerçəkləşmişdi. Bu, həmin zamanlarda Avropa ölkələri ilə sanki bərabər səviyyə idi. Ötən əsrin əvvəllərində də ümumbəşəri dəyərləri mənimsəmək, maariflənmək, elmi-texniki yeniliklərdən istifadə, cəmiyyətdə münasibətləri hüquqi normalarla tənzimləmək kimi vəzifələr sələflərimizin də əvvəldən inkişafda qərbyönümlü olduğunu təsdiq edir. Əsrin əvvəlində də bu yolu seçdik.

Hazırda Azərbaycan demokratik mübarizəyə şərait yaradılmış böyük siyasət meydanıdır. Bu meydanda beynəlxalq aləmdə yaranan siyasi oriyentirləri nəzərə alaraq müstəqil siyasət apara bilən lider əsl milli-siyasi liderdir. Demokratik cəmiyyət quruculuğu ənənələrini yaşadan, müasir demokratikləşmə proseslərini əxz edən ölkəmizdə siyasi şüur, bilik və siyasi mübarizə, mədəniyyət paralel surətdə inkişaf etmişdir. Xalqın siyasi və hüquqi biliklərinin artırılması sahəsində həyata keçirilən tədbirlər demokratik prinsiplər əsasında yeni cəmiyyət qurulmasına, əhalinin siyasi şüurluluğunun təkamülünə gətirib çıxarmışdır.

Qeyd edək ki, Avropanın özü də bizim kimi yeni əsrdə tərəqqi yolunu arayırdı. Qərb öz mütəfəkkirlərinin dediyi kimi, inkişafın mənbəyi əksliklərin vəhdətindədir ideyasına əməl etməyə başladı. İkinci Dünya müharibəsindən sonra hər bir şəxsin hüquq və azadlıqları haqqında düşünməyi vacib bilən Avropa bəşəriyyətin xilası üçün yeni cəmiyyət qurulması proqramını qəbul etdi. Ənənəvi rəqiblər və düşmənlər bütün problemləri nəzərə almadan sülh və əmin-amanlığın bərqərar olması naminə yeni xüsusi mənəvi-psixoloji mühitdə Avropa Şurasını yaratdılar. Məqsəd insanların layiq olduqları həyat şəraitini təmin etmək, hüquq və azadlıqlarının qorunması sahəsində uğurlar qazanmaq idi. Təxminən ötən yarım əsrdə eyni sivilizasiyanın, eyni dinin mənsubları böyük və spesifik dəyərlər sistemi formalaşdırdığından, yad meyarlara malik mədəniyyətlə əlaqə qurmaq böyük risk hesab olunurdu. Həmin dövrdəki tərəddüdlərin kökündə dayanan da bu idi.

Siyasi manevrlər, n-ölçülü standartlar

Müstəqil Azərbaycan dövlətinin seçdiyi strateji inkişaf yolu, qəbul olunan qanunlar (seçki haqqında, ölüm hökmünün ləğvi, amnistiyalar, hüquq və azadlıqların Konstitusiya səviyyəsində təsbiti və s.), cəmiyyət həyatındakı demokratik islahatlar ikinci türk dövlətinin Avropa ölkəsi kimi tanınmasını zəruri etdi. Baxmayaraq ki, siyasi, iqtisadi və sosial məsələlər baxımından vəziyyəti Azərbaycandan heç bir parametr üzrə yaxşı olmayan Ermənistan və Gürcüstanın AŞ-a qəbuluna razılıq tez bildirilsə də, Azərbaycan haqqında tərəddüdlərini dilə gətirməkdən belə çəkinmirdilər. Əsas səbəb islam ölkəsi olmağımız, Şərq dəyərlərinə sıx bağlılığımız, milli-mədəni ənənələrimizə sadiqliyimiz olsa da, bəhanə kimi demokratiya təəssübkeşliklərini qabardırdılar. Həmin dövrdə ölkə rəhbəri, böyük siyasi təcrübəyə malik ulu öndər Heydər Əliyev Azərbaycana qarşı yönəldilmiş bu iddiaların, tərəddüdlərin əsl səbəblərini çox dəqiq bildiyindən onların öz prinsiplərindən çıxış etməklə məsələnin həllinə nail olurdu.

Son iki əsr ərzində, daha dəqiq desək, XIX əsrin əvvəlindən ardıcıl olaraq ümumbəşəri dəyərlərə can atan ölkəmizin beynəlxalq qurumlarla əməkdaşlığa və üzvlüyə maraqlı olmasının əsas səbəbini Ümummilli Lider korrekt olaraq belə ifadə etmişdir: "Biz istəyirik həqiqətən Avropada təhlükəsizlik, sülh, əmin-amanlıq olsun, eyni zamanda öz problemimizin həllini, yəni Qafqazda əmin-amanlıq, sülh olmasını istəyirik".

Aydındır ki, ali məqsəd ərazilərimizin işğaldan azad olunması, öz dədə-baba torpaqlarından zorla çıxarılmış, deportasiya olunmuş əhalinin doğma yurdlarına qaytarılması idi. Həmin dövrdə də Avropanın siyasi coğrafiyasında islam ölkələrinin, əsasən də türk dövlətlərinin hesabına dəyişikliyin, genişlənmənin olmasını sevməyən, konkret əleyhinə olan siyasi qüvvələr və erməni lobbisi istəklərinə nail olmaq üçün xüsusi planlar işləyirdilər.

İqtisadi, elmi-texniki və mədəni inkişaf səviyyəsinə, demokratik dövlət quruculuğuna heç bir irad tuta bilməyənlər özləri tərəfindən saxtalaşdırılmış tarixə müraciət etməklə həmin müstəvidə sərbəst fəaliyyət göstərirdilər. Bu gün də belədir. Çünki hazırkı reallıq göz önündə olduğundan işğalçı ilə işğala məruz qalanı görmək çətin deyil. Ən yaxşı düşünülmüş feyk-nyuslar, dezinformasiyalar reallığı başqa halda, yanlış şəkildə verməkdə çətinliklə üzləşirlər. Lakin zaman oxunda əks istiqamətdə hərəkət etdikcə, ictimai rəyi çaşdırmaq asanlaşır. Səbəb isə tarixi faktların saxta təbliğatla dəyişdirilməsidir. Erməni tarixçiləri, lobbiçiləri saxta informasiya kampaniyası ilə tarixi keçmişi yalanla necə dəyişdirməyə nail olmaqda çox mahirdilər.

Təəssüflər olsun ki, dinc, stabil Avropaya nail olmaq üçün çalışan mütərəqqi, sülhsevər qüvvələrlə yanaşı, hələ də qlobal siyasi intriqa təfəkkürü ilə yaşayan, çoxqat pərdələnmiş, beynəlxalq miqyas almış bu vərdişlərindən qurtula bilməyənlərin istəyi erməni lobbisinin maraqları ilə adekvatlıq təşkil edir. Nəticədə "həqiqət onsuz da mənim tərəfimdədir" deməklə biz n-ölçülü standartlarla yaşayan dünya ilə siyasi manevrlərlə davranmadan tamaşaçı rolunda olan mütərəqqi qüvvələrlə eyni mövqeyi seçmiş olduğumuzdan böyük səylər nəticəsində əldə olunanlar təhlükə altına düşmüş olur. AŞPA-dakı Azərbaycan nümayəndə heyətinin fəaliyyətini qeyri-müəyyən müddətə dayandırması bunu təsdiq edir. Axı, siyasiləşmiş Qərb təfəkkürü intriqasız yaşaya bilmir. Biz də seçimimizi düzgün etməklə, daxil olduğumuz məkanın dilində siyasi manevrlərlə, n-ölçülü standartlarla danışmağa hazır olmalıyıq.

Yaşadığımız əsrə vaxtilə ədəbiyyat və mədəniyyət müstəvisində başlanmış müasirləşmə, avropalaşma prosesinin nəticəsi olaraq Avropa ölkəsi kimi qədəm qoyduq. Xatirimizdədir ki, bunu böyük fərəh hissi ilə qarşıladığımız həmin dövrdə ikinci xəbəri aldıq: Fransa senatının "erməni soyqırımı" haqqında qərarını Prezident Jak Şirak təsdiq edib. Səbəbkarlar Azərbaycanın yeni əsrə uğurla, qələbəylə qədəm qoymasını istəməyən qüvvələr idi. Bu, həm də bir xəbərdarlıq, eyforiyaya qapılmamaq işarəsi olmaqla, qədəm qoyduğumuz yolun hamar olmayacağını təsdiq edirdi. AŞPA-da baş verən proseslər digər tərəfdən də Azərbaycanın ərazi bütövlüyünü, suverenliyini təmin edən Zəfərimizin həmin qüvvələr tərəfindən qəbul edilə bilməməsi ilə bağlıdır. Xalqımızın da ölkəni Qalib edən Müzəffər lideri ətrafında yenidən yumruq kimi birləşəcəyi, prezident seçkilərində onu yüksək səs faizi ilə seçəcəyi bəlli idi. Çünki liderimiz bizə təkcə yurdumuzu deyil, ruhumuzu, qürurumuzu qaytarıb. Bunu dəyərləndirən əhali yüksək seçici fəallığı, siyasi şüurluluq və siyasi mədəniyyət sayəsində Azərbaycanı olduğu kimi deyil, istədikləri kimi görmək istəyənlərə "Osmanlı tokatı"nın şokunu hiss etdirdi. Demokratiyadan dəm vuranlara, sonda müxtəlif ölkələri idarə etmək məqsədilə demokratiya tövsiyə edənlərə bir nümunə oldu. Necə deyərlər - "ölkələrə öyüd verənlərə xalqımız ustad demokratiya dərsi" yaşatdı.

Seçki mədəniyyətinin qələbəsi,

“demokratiya təəssübkeşləri”nin məğlubiyyəti

Yeni çağırışlar ideyası ilə insanları, xüsusilə gəncləri "vahid dəyərlər" ətrafında birləşdirməyə, kosmopolit nəsil yetişdirməyə çalışanların məqsəd və məramı dəyişmir. Qloballaşma termini dünya leksikonundan çıxarılsa da, forma, mübarizə üsulları dəyişsə də, mahiyyət dəyişmir. Yəni əsrin əvvəlində AŞ-a qəbul zamanı tərəddüdlərin kökündə əvvəldə dediyimiz amillər dayansa da, ancaq demokratiya təəssübkeşliyini qabardırdılar. Bu gün də Azərbaycanın yaratdığı reallıqları qəbul edə bilmədiklərini, dini təəssübkeşliklərini çox ustalıqla pərdələməklə, belə demək mümkünsə, "qablaşdırmanı" - formanı dəyişməklə prezident seçkilərində müşahidəçi kimi dəvət olunmamalarını səbəb gətirirlər. Əslində Azərbaycanın AŞPA qarşısında seçkilərə müşahidəçi dəvət etmək öhdəliyi yoxdur. Bu, onların hegemonluq uğrunda mübarizə iddiasından qaynaqlanır. Müasir Azərbaycan azad, sabit, güclü iqtisadi potensiala malik, özünə güvənən ölkədir. Vətəndaşları da qalib olmaqla gələcək həyatlarını özləri müəyyənləşdirməkdə israrlı, qürurlu və fəaldırlar. Hegemonluq və ağalıq iddiasında olanların demokratiya adı ilə icad etdikləri qadağalar hörümçək toruna bənzəyir. Burada zəiflər ilişib qalır, güclülər isə yırtıb çıxırlar.

Prezident İlham Əliyev fevralın 14-də Milli Məclisdə keçirilən andiçmə mərasimində demişdir: "Əgər əvvəlki illərdə, xüsusilə işğal dövründə bizi çaşdırmaq üçün, yəni, gözdən pərdə asmaq üçün müəyyən vədlərlə cəlb etməyə çalışırdılarsa, indi o maskalar da yırtıldı və açıq-aydın burada ayrıcı xətlər müşahidə olunur. Biz o ayırıcı xətləri çəkməmişik, biz bu ayrıcı xətlərin əleyhinəyik".

Məhz qlobalistlərin, "ağalıq" iddiasında olanların hədəfi də "mənalı", "təmtəraqlı" proqramlar, fondlar adı altında dağıdıcı missiya həyata keçirməkdir. İlk növbədə gəncləri öz kökündən, tarixindən, milli dəyərlərdən uzaqlaşdırmaqla zombiləşdirmək istəyirlər. Unudurlar ki, zəngin mədəniyyəti, tarixi, ədəbiyyatı, dili, bir sözlə, milli dəyərləri olan xalqın övladları nəsillərarası mənəvi körpünü mühafizə etməklə müstəqil ölkəsini kənar və yad təsirlərdən öz lideri ilə birgə qorumağa qadirdir. Məhz milli ruh, milli ləyaqət və vətənpərvərlik də mümkün olmayanı reallığa çevirən bütün xalqımızın iştirak etdiyi Vətən müharibəsində Böyük Qələbənin əldə olunmasına səbəb oldu.

Dünyanın bəzi aparıcı ölkələrinin informasiya məkanında hazırda ermənilərin psevdonağılları üstünlük təşkil etsə də, ona inam yoxdur. Lakin o nağıllar həmin ölkələrin və bəzi beynəlxalq təşkilatların siyasi maraqları ilə harmoniya təşkil edir, üstəlik, erməni lobbisinin ianələri də burada əsas rol oynayır. Buna görə də Azərbaycan dünyada bəlkə də nadir ölkələrdəndir ki, daim şər-böhtan, informasiya hücumuna məruz qalır, bu yöndə beynəlxalq miqyaslı aparıcı media qurumlarını da kampaniyaya cəlb edirlər. 44 günlük Vətən müharibəsində həqiqəti deməyimiz, ümumi davranış qaydalarına riayət etməyimiz böhtan, yalan və təhqirlərə qalib gəldi. İlk növbədə, tərbiyə, bilik, müasir texnologiyalara çıxışın olması informasiya məkanında da üstünlüyü təmin etdi.

Uzun illərdir Azərbaycana qarşı aparılan informasiya təxribatları indi də davam etdirilir və qeyd etdiyimiz kimi, dünyanın öncül informasiya agentliklərindən və təsisatlardan "məharətlə" istifadə olunur. Bütün proseslərdə də aparıcı rol ermənilərə məxsusdur. Yalan məlumat formalaşdırılır, əlaltılar, konkret desək, dünyanın aparıcı, öndə olan qeyri-hökumət təşkilatları vasitəsilə həmin məlumatlar ətrafında müzakirələr, təhlillər aparılır, emal olunur və bir həqiqət kimi cəmiyyətə, insanların şüuruna ötürülür. Əfsuslar olsun ki, belə texnologiyalar bu gün də işləyir, aktivdir. Və feyk-nyus çağdaş dövrümüzdə siyasi mübarizənin ən populyar üsuluna çevrilib. Bu səbəbdən də ABŞ-ın sabiq Prezidenti Donald Tramp "Washington Post" və "New York Times" qəzetlərini feyk-nyus adlandırıb. Anti-Azərbaycan mövqeyində dayanan, əsasən supergüclərin maliyyələşdirdiyi QHT-lər sırasında "Freedom House", "Amnesty International", "Human Rights Watch" Sorosun nəzarətində olan qurumlarla birlikdə bu məsələlərdə daha fəaldırlar.

Vaxtilə inqilab, çevriliş etmək cəhdləri zamanı həmin təşkilatlar Qarabağ məsələsindən istifadə edirdilər. Bu da tarixi Zəfərdən sonra sonuncu arqument kimi əllərindən çıxıb. İndi yeni üsullar axtarır, erməni lobbisi ilə birgə yeni planlar cızırlar.

AŞPA-da Azərbaycan nümayəndə heyətinə qarşı olan münasibət anti-Azərbaycan "aysberqi"nin görünən tərəfidir, formadır. Məzmun isə hiss olunmayacaq tərzdə pərdələnib. Bütün sahələrdə məğlub olduqlarından ən cılız üsullara əl atırlar. Həmin "aysberq" F.Şvabe, C.Borrel, R.Menendes kimi keçmişi ləkəli və erməni lobbisinin ianələrindən qidalananların timsalında zühur edir. İş o yerə çatıb ki, AŞPA üzvü F.Şvabe ATƏT-in və digər Avropa təşkilatlarının Azərbaycanda keçirilən prezident seçkilərini izləmək üçün dəvət olunmasına qısqanclıqla yanaşdığını gizlədə bilmir.

Seçkinin nəticələrinə irad tutanlar virtual deyil, real həyatda yaşadığımızdan, milli adət-ənənələrə, Vətənə bağlılığımızdan bixəbər olduqlarından unudurlar ki, xalqı arxasınca aparmaq istəyən kvaziliderlərdən fərqli olaraq, əsl liderin arxasınca xalq özü gedir. Qürura söykənən yüksək seçici fəallığı və milli təfəkkürdən qaynaqlanan üstün seçki mədəniyyəti nümayiş etdirməklə xalqımız bunu bir daha təsdiq etdi. Dövlətin və xalqın gələcəyi ilə bağlı məsuliyyəti öz üzərinə götürən, taleyüklü mərhələdə vaxtında və düzgün qərarlar qəbul edərək, qətiyyətli addımlar atmaqla tarixi missiyanı yerinə yetirənlər xalqın əsl liderinə və siyasi fenomenə çevrilir. Məhz tarixi ədaləti bərpa etməyə qadir belə liderin ətrafında sıx birləşən Azərbaycan xalqı 7 fevralda həm də bütün dünyaya öz sözünü dedi. Çoxəsrlik milli dövlətçilik tariximizin qızıl dövrü kimi xarakterizə olunan son 20 ildə ölkəmiz silsilə qələbələr, uğurlar qazanmaqla iqtisadi inkişaf parametrlərinə görə dünyada lider mövqelərə malik oldu. Vətən müharibəsində Azərbaycan Prezidenti, Müzəffər Ali Baş Komandan İlham Əliyevin rəhbərliyi ilə qazanılan parlaq qələbələr, ərazilərimizin tam bərpası, suverenliyimizin təmini firavan gələcəyə doğru zəfər yolunun davamlı olmasına əsas verir. Siyasi məharəti, yüksək mənəvi keyfiyyətləri, məğrurluğu, kommunikasiya bacarığı sayəsində həm ölkəmizdə, həm də beynəlxalq aləmdə nüfuzlu şəxsiyyətlər arasında rəğbət və böyük nüfuz qazanan Prezident İlham Əliyev dünyanın ən çətin, mürəkkəb münaqişələrindən birini həll edərək tarix yaradan dövlət xadimi, yenilməz sərkərdədir. Azərbaycanın dünya miqyasında fövqəladə bir nümunə göstərməsi, ədaləti öz gücü ilə bərpa etməsi beynəlxalq səviyyədə marağa səbəb olmaqla bir çox xalqların dillər əzbəri olmuşdur.

Hərbi əməliyyatlarımız dünyanın aparıcı ali hərbi məktəblərində öyrənilir, xalqımızın əyilməz ruhu, əzmkarlığı, iradəsi də digər ölkələrin rəhbərləri səviyyəsində təqdir olunur. Bu barədə Prezident İlham Əliyevin 2022-ci il dekabrın 24-də Qərbi Azərbaycandan olan bir qrup ziyalı ilə görüşündə dedikləri daha yerinə düşər: "İkinci Qarabağ müharibəsindən keçən bu iki ildən bir qədər çox vaxt ərzində mənim xarici həmkarlarımla çoxlu görüşlərim olub və deyə bilərəm ki, onların mütləq əksəriyyəti soruşurdu, bu necə oldu, siz bu Qələbəyə necə nail oldunuz? Mən də deyirdim ki, bunu izah etmək üçün gərək siz bizim həyatımızı yaşayasınız, bu otuz ili yaşayasınız". Bəli, Azərbaycanın regionda yeni reallıqlar yaratmağı üçün 30 il+44 gün+23 saat lazım oldu.

Burada bir ibrətamiz hekayəti yenidən xatırlayaq: Bir dəfə zəngin bir insan məşhur bir rəssama yüksək qiymətə yaxşı rəsm əsəri yaratmağı sifariş verir. Az sonra haqqı alınmaqla əsər təqdim olunur. Lakin xəbis, xain xislətli birisi rəsm əsərini sifariş edənə çatdırır ki, bu rəsm çox qısa müddətə ərsəyə gəldiyindən niyə qarşılığında bu qədər haqq ödədiniz? Vəziyyətə təəccüblənən, bir az da təəssüf edən zəngin insan rəssamdan əsərin nə qədər vaxt ərzində hazır olduğunu soruşanda rəssam deyir: 30 il+5 saat. Zəngin insan eyhamı anlayır. Yəqin ki, cənab Prezidentimizin fikirlərindəki eyham da xarici həmkarlarına aydın olub.

Hümbət MUSAYEV

Respublika.- 2024.- 15 fevral, №34.- S.9.