Azərbaycan-Türkmənistan münasibətləri əməkdaşlığın geniş spektrini əhatə edir və möhkəm təmələ əsaslanır

Prezident İlham Əliyev bu münasibətlərin təkcə ölkəmiz üçün deyil, bütün Mərkəzi Asiya, Xəzər, Qafqaz regionu üçün və daha artıq coğrafi məkan üçün böyük əhəmiyyət kəsb etdiyini vurğulayıb.

Bu gün Azərbaycanın və Türkmənistanın ikitərəfli münasibətlər, regional əməkdaşlıq, regional təhlükəsizlik problemlərinə yanaşmalarında ortaq cəhətlər çoxdur. Qeyd edək ki, xalqlarımız əsrlər boyu fəal əlaqələr saxlamışlar və hazırda müstəqil dövlətlərimiz arasında münasibətlər bu möhkəm tarixi zəmin üzərində qurulur. Xalqlarımız Azərbaycanla Türkmənistan arasında indiki və gələcək nəsillərin qarşılıqlı surətdə zənginləşməsinin əsasını təşkil edən dil, mədəniyyət və mənəviyyat ümumiliyini yüksək qiymətləndirir. Azərbaycan Prezidenti İlham Əliyevin Türkmənistana yüksək səviyyədə keçən səfəri də bir daha təsdiqlədi ki, tərəfdaşlığımızın möhkəm təməli var və bu əməkdaşlıq yaxşı perspektivləri olan böyük gələcəyə istiqamətlənmişdir.

Türkmənistanda Prezident İlham Əliyevin bu səfərini ikitərəfli münasibətlərin daha da möhkəmlənməsi və qarşılıqlı surətdə faydalı tərəfdaşlıq üçün geniş imkanlar yaradılması baxımından yüksək dəyərləndirirlər. Buna böyük önəm verən Prezident Qurbanqulu Berdiməhəmmədov bildirib ki, biz dövlətimizin və xalqlarımızın mənafeyi naminə, habelə bütövlükdə beynəlxalq birliyin mənafeyi naminə ikitərəfli münasibətlərin ən səmərəli yollarını tapmağı qarşımıza məqsəd qoymuşuq: "Müasir dövrün əsas problemləri haqqında, ilk növbədə sülh, təhlükəsizlik və davamlı inkişaf, məsələləri bəşəriyyətə qarşı təhdid və hədələrə qarşı mübarizə məsələləri barədə baxışlarımızın oxşar olması və ya üst-üstə düşməsi mühüm amildir".

Xəzərin sülh və əmin-amanlıq dənizinə çevrilməsi, regionda yeni enerji və nəqliyyat-kommunikasiya layihələrinin həyata keçirilməsi hər iki xalqın rifahının yüksəldilməsinə yönəlibdir. Azərbaycan-Türkmənistan münasibətləri əməkdaşlığın geniş spektrini əhatə edir və möhkəm təmələ əsaslasnır. Belə ki, dövlət başçılarının qəbul etdiyi qərarlar, müvafiq qurumlara verilən tapşırıqlar qarşılıqlı anlaşma və qardaşlıq ruhunda operativ şəkildə yerinə yetirilir. Bu həm də ondan irəli gəlir ki, ortaq tariximiz, ortaq mədəniyyətimiz, ortaq köklərimiz və dillərimizin oxşarlığı xalqlarımızı bir-birinə bağlayır. Cənab İlham Əliyev bunun çox vacib olduğunu vurğulayıb və bəyan edib ki, münasibətlərimizi bu baza üzərində qururuq: "Bu gün bu münasibətlər təkcə bizim ölkələr üçün deyil, bütün Mərkəzi Asiya, Xəzər, Qafqaz regionu üçün və bəlkə də, daha artıq coğrafi məkan üçün çox böyük əhəmiyyət kəsb edir".

Bu baxımdan Türkmənistanın Türkmənbaşı şəhərində Azərbaycan Prezidenti İlham Əliyevin, Türkiyə Prezidenti Abdullah Gülün və Türkmənistan Prezidenti Qurbanqulu Berdiməhəmmədovun üçtərəfli görüşünün keçirilməsini xüsusi vurğulamaq olar. Bu, türk dünyasında münasibətlərin inkişafına böyük töhfədir.

İki ölkə arasında ticarət-iqtisadi əlaqələrin potensialı da böyükdür.

Bu ilin 10 ayı ərzində qarşılıqlı əmtəə dövriyyəsinin həcmi 490,8 milyon ABŞ dollarına bərabər olmuşdur. Bu, keçən ilin müvafiq göstəricisi ilə müqayisədə təqribən 8 dəfə çoxdur və bu gün Azərbaycan Türkmənistanın ticarət-iqtisadi münasibətlər saxladığı dünya ölkələri arasında 6-cı yeri tutur.

Hazırda enerji təhlükəsizliyi məsələlərinin bütün dünyanı narahat etdiyi bir vaxtda həm Azərbaycan, həm də Türkmənistan özünün enerji təhlükəsizliyini tamamilə təmin etmişdir. Bununla yanaşı, Azərbaycan və Türkmənistan başqa ölkələrin enerji təhlükəsizliyinin təmin edilməsində də mühüm rol oynayırlar.

Azərbaycan və Türkmənistan arasında nəqliyyat sahəsində əməkdaşlıq məsələlərinin müzakirə edildiyini və imzalanan sənədlərin real konkret işlər, real layihələr demək olduğunu bildirən cənab İlham Əliyev bəyan edib ki, indi Xəzər dənizi regionunda nəqliyyat sahəsində əməkdaşlığı genişləndirmək üçün çox böyük potensial vardır: "Hazırda Azərbaycanı dəmir yolu vasitəsilə Türkiyə və Avropa ilə eləcə də Xəzər dənizi vasitəsilə Mərkəzi Asiya ilə birləşdirəcək Bakı-Tbilisi-Qars dəmir yolu tikilir. Ümid edirəm ki, bu yeni ipək yolu iki ildən sonra bizim hamımızın sərəncamında olacaq və hamımız ondan istifadə edəcəyik. Burada iqtisadi səmərə də var və təbii ki, regional əməkdaşlıq da. Bu əməkdaşlıqdan hər kəs yalnız qazanacaqdır."

Prezident İlham Əliyevin Türkmənistana yüksək səviyyədə keçən səfərinin nəticələri xalqlarımızın tarixi dostluq və qardaşlıq ənənələrinə sadiqliyini, hər iki ölkənin səmərəli əməkdaşlıqda maraqlı olmasını təsdiq etdi.

Əlizadə Ş.

Respublika.- 2008.- 3 dekabr.- S.5.