Əlillərə qayğı diqqət mərkəzindədir

Nəsimi rayonunda son illərdə digər sahələrlə yanaşı, talelərinə əlillık payı düşmüş insanlara hər cür qayğı göstərilir, onlarla icra hakimiyyətində yaddaqalan tədbirlər keçirilir və üzləşdikləri problemlər öz müsbət həllini tapır.

Bu günlərdə rayon icra hakimiyyətinin təşəbbüsü ilə Beynəlxalq Əlillər Günü münasibətilə geniş tədbir keçirildi. Mərasimdə rayon ərazisində məskunlaşan əlillər, həmçinin ictimaiyyətin nümayəndələri iştirak edirdilər.

Tədbirdə çıxış edən rayon icra hakimiyyəti başçısının birinci müavini Qərib Məmmədov ilk öncə mərasimdə iştirak edən insanları salamladı və qeyd etdi ki, 1993-cü ilin dekabr ayından BMT-nin Baş Assambleyasının qərarı ilə dekabrın 3-ü Beynəlxalq Əlillər Günü kimi qeyd olunur. Vurğulamaq lazımdır ki, dünyada yüz milyonlarla insan əlillikdən əziyyət çəkir. Prezident İlham Əliyevin qayğı və diqqəti sayəsində ölkəmizdə əlillikdən əziyyət çəkən insanlar dövlət qayğısı ilə əhatə olunmuşlar. Qeyd etmək lazımdır ki, Nəsimi rayonunda da əlillərə qayğı diqqət mərkəzindədir, bu sahədə məqsədyönlü iş aparılır. Şübhəsiz ki, gələcəkdə vəziyyət daha da yaxşılaşdırılacaq, əlillərə göstərilən diqqət müasir tələblər səviyyəsinə qaldırılacaqdır.

Bayram əhval-ruhiyyəli tədbirdə 250 nəfər əlilə maddi yardım göstərildi. Həmin insanlar dövlət qayğısı ilə əhatə olunduqlarına görə rayon rəhbərliyinə minnətdarlıqlarını bildirdilər.

Mərasimdə H.Sarabski adına mədəniyyət evinin incəsənət ustaları maraqlı proqramla çıxış etdilər.

Aslan Q.

Respublika.- 2008.- 4 dekabr.- S.7.