Rabitə sistemi dinamik inkişaf edir

6 dekabr Rabitə və İnformasiya Texnologiyaları sahəsi işçilərinin peşə bayramı günüdür

Son illər Azərbaycan iqtisadiyyatının inkişaf edən sahələrindən biri də informasiya-kommunikasiya texnologiyaları sahəsidir. Davos İqtisadi Forumunun "Texnoloji inkişaf hesabatına əsasən, hazırda Azərbaycan bu sahədə inkişaf sürətinə görə MDB məkanında birinci, dünyada isə 127 ölkə arasında 67-ci yeri tutur. “Rabitə və İnformasiya Texnologiyalarının 2005-2008-ci illərdə inkişafı üzrə Dövlət Proqramı”'nın uğurla həyata keçirilməsi informasiya cəmiyyətinin formalaşmasına və ölkə iqtisadiyyatının inkişafına səbəb olmuşdur. Bu gün respublikamızda əhaliyə yüksək səviyyədə telefon rabitəsi və internet xidmətlərinin göstərilməsi istiqamətində genişmiqyaslı işlər görülmüşdür. Qeyd etmək lazımdır ki, son beş il ərzində bu sektor üzrə gəlirlərin artımı dünya göstəricilərini 3 dəfə üstələyərək, illik 30-35 faiz təşkil etmişdir.

Hazırda ölkənin ən ucqar məntəqələri də müasir rabitə və İKT xidmətləri ilə təmin olunmuşdur. Respublikamızda telefonlaşdırma tam başa çatdırılmışdır. Son 5 ildə rabitə xidmətlərinin həcmi 3 dəfə, internet xidmətlərinin həcmi 12 dəfə, qlobal internet şəbəkəsinə çıxış tutumunun həcmi 40 dəfə artmışdır. Artıq ölkə üzrə internet istifadəçilərinin sayı 1,5 milyonu ötmüşdür ki, hazırda bu istiqamətdə bir neçə layihə uğurla həyata keçirilir.

Onu da qeyd edək ki, Azərbaycan rabitə sisteminin dinamik inkişafında, bu sektorun dünya rabitə sisteminə uğurla inteqrasiya olunmasında və müasir dünya standartları səviyyəsinə çatdırılmasında paytaxtımızda fəaliyyət göstərən rabitə müəssisələrinin rolu olduqca böyükdür. Bu müəssisələr öz işlərini müasir tələblər səviyyəsində quraraq ölkə əhalisinə keyfiyyətli telefon rabitə xidməti göstərirlər. Belə müəssisələrdən biri də son zamanlar öz peşəkar fəaliyyətləri ilə əhalinin rəğbətini qazanmış Nizami Telefon Qovşağıdır. 6 dekabr rabitə və informasiya texnologiyaları sahəsi işçilərinin peşə bayramı gününü böyük uğurlarla qeyd edən qovşaq kollektivi, təcrübəli və peşəkar rabitəçi, rabitə ustası, Nizami Telefon Qovşağının rəisi Fətulla Seyidovun rəhbərliyi və öz işinə ciddi münasibəti sayəsində 2008-ci ilin ötən dövrü ərzində böyük uğurlar qazanaraq peşə bayramlarını yüksək əhval-ruhiyyə ilə qarşılayırlar. Bütün bunlar barədə bizimlə söhbətində ətraflı məlumat verən qovşaq rəisi, rabitə ustası Fətulla Seyidov dedi:

- 6 dekabr rabitə və informasiya texnologiyaları sahəsi işçilərinin peşə bayramını yüksək iqtisadi göstəricilərlə qarşılayan əmək kollektivimiz 2008-ci ilin ötən dövründə səylə çalışmış, Bakı Telefon Rabitəsi İstehsalat Birliyinin qovşaq qarışısında qoyduğu plan-tapşırıqları uğurla yerinə yetirmişdir. Onu xüsusi qeyd edim ki, qazandığımız bütün uğurlara rabitə və informasiya texnologiyaları naziri, akademik Əli Abbasovun və BTRİB-nin rəisi Beytulla Hüseynovun kollektivimizə göstərdikləri mütəmadi diqqət və qayğının sayəsində nail olmuşuq. Göstərilən bu diqqətə cavab olaraq ildən-ilə uğurlarımızın sayı artır, ölkə rabitə müəssisələri arasında öncül mövqeyimizi qoruyub saxlayırıq. Təsadüfi deyil ki, rabitəçilərin 6 dekabr peşə bayramı günü ilə əlaqədar Rabitə və İnformasiya Texnologiyaları Nazirliyi səviyyəsində keçirilən ən peşəkar kabel calayıcısı, ən peşəkar kross işçisi və montyor adı uğrunda respublika üzrə birliklər arasında keçirilən, BTRİB-nin və Aztelekom İB-nin aparıcı mütəxəssislərinin qoşulduğu yarışda BTRİB birinci yerə layiq görülmüşdür. Telekommunikasiya üzrə "ən peşəkar kross işçisi, montyor və kabel lehimləyicisi" yarışması üzrə 1-ci yerə layiq görülmüş BTRİB-nin Nizami Telefon Qovşağının kross işçisi Almaz Muradova və Xətai Telefon Qovşağının kabel calayıcısı Elşən Sarıyev RİTN tərəfindən "Rabitə ustası" fəxri adı ilə təltif edilmiş və hər iki qalib 500 manat həcmində pulla mükafatlandırılmışlar.

Telekommunikasiya üzrə "ən peşəkar kross işcisi, montyor və kabel lehimləyicisi" müsabiqəsində 2-ci yerə layiq görülmüş Nizami Telefon Qovşağının xətt montyoru İsmayıl Hüseynov RİTN "Diplomu" ilə təltif olunmuş, 300 manat məbləğində pulla mükafatlandırılmışdır.

Nizami Telefon Qovşağının kollektivi 2008-ci ilin ötən 9 ayında yüksək iqtisadi göstəricilərə nail olmuşlar. Hesablanmış tarif gəliri üzrə proqnoz 112,9 faiz yerinə yetirilmişdir. Hesablanmış tarif gəliri üzrə əhaliyə göstərilən xidmətlər proqnozuna 115,4 faiz əməl olunmuşdur. Qovşaq üzrə 7122 ədəd telefon çəkilmiş, 286 ədəd SDMA aparatı satılmış, 908 ədəd ADSL qoşulmuşdur. Mənfəət proqnozu da 142,4 faiz yerinə yetirilmişdir. İnvestisiya qoyuluşu planı 100 faiz icra edilmişdir.

İlin əvvəlindən qovşaq üzrə montaj edilmiş tutum əhalinin tələbatını nəzərə alaraq 11520 nömrə artırılmışdır.

Hazırda qovşağın montaj edilmiş abunə tutumu 148946 nömrədir ki, bunlardan 47,7 faizi analoq tipli ATS-lərin, 52,3 faizi elektron tipli ATS-lərin payına düşür.

Nizami Telefon Qovşağının kollektivi 2008-ci ili yüksək iqtisadi göstəricilərlə başa vuracaq, rabitə və informasiya texnologiyaları naziri Əli Abbasov və Bakı Telefon Rabitəsi İstehsalat Birliyinin rəisi Beytulla Hüseynovun bizə göstərdikləri etimada cavab olaraq daha əzmlə çalışacaq, ölkə iqtisadiyyatının inkişafına bundan sonra da öz layiqli töhfəmizi verəcəyik.

Sadıqov Ə.

Respublika.- 2008.- 6 dekabr.- S.2.