Azərbaycan dini Tolerantlıq, milli və etnik tolerantlıq məsələlərində çox böyük uğurlara nail olmuşdur

Dövlətimizin başçısı vurğulayıb ki, ölkəmiz öz dövlət müstəqilliyini bərpa etdikdən sonra millətlərarası münasibətlərə, milli və dini tolerantlığın möhkəmlənməsi işinə çox böyük diqqət verilmişdir.

Ölkəmizdə bütün millətlərin və dinlərin nümayəndələri tam qarşılıqlı anlaşma, milli həmrəylik şəraitində yaşayırlar. Azərbaycandakı dini dözümlülük millətlərarası münasibətlərin gərgin olduğu bir çox ölkələr üçün nümunədir. Bütün bunlar ümummilli lider Heydər Əliyevin müəyyənləşdirdiyi və hazırda dövlətimizin başçısı tərəfindən uğurla davam etdirilən siyasət sayəsində mümkün olmuşdur. Azərbaycan dünyada millətlərin, bütün dinlərin nümayəndələrinin bir ailə kimi yaşadığı ölkə kimi tanınır. Çoxmillətli, çoxkonfessiyalı ölkəmizin nümunə ola biləcək təcrübəsi artıq dünyanın bir çox ölkələrində öyrənilir və təqdir edilir. Beynəlxalq təşkilatlarda diskussiyaların mövzusu olur.

Azərbaycanın paytaxtında, Bakı şəhərində mədəniyyətlərarası dialoqun möhkəmlənməsi işinə böyük töhfə verən konfransın keçirilməsi də bu fikirlərimizi bir daha təsdiqlədi. Konfransın böyük və müsbət rolunu vurğulayan dövlətimizin başçısı İlham Əliyev bildirib ki, son illər ərzində Azərbaycan dini tolerantlıq, milli və etnik tolerantlıq məsələlərində çox böyük uğurlara nail olmuşdur: "Əslində, bizim ölkəmizdə bütün insanlar müxtəlif dövrlərdə, ictimai-siyasi quruluşundan asılı olmayaraq, həmişə bir ailə kimi yaşamışlar. Burada bütün dinlərin nümayəndələri həmişə dostluq, qardaşlıq şəraitində yaşamışlar".

Bu, bizim ölkəmizə xas olan çox mühüm bir amildir. Bu, ölkəmizdə sabitliyin, əminamanlığın davamlı olmasına təminat verən başlıca şərtlərdən biridir və ölkəmizin uğurla inkişafında çox mühüm rol oynayır.

Rəsmi Bakı, dövlət buna böyük önəm verir. Bu gün ölkəmiz sözün əsl mənasında dostluq, qardaşlıq məkanıdır. Azərbaycanda bütün xalqlar, dinlərin nümayəndələri bir ailə kimi yaşayırlar. Ölkəmizdə yaşayan bütün dinlərin nümayəndələri özlərini çox azad hiss edir və tam rahatlıqla fəaliyyət göstərirlər.

Artıq dünya birliyində Azərbaycanı bu baxımdan nümunə ölkə kimi dəyərləndirirlər. Son illərdə Bakıda keçirilən çoxsaylı dialoqlar, konfranslar forumlar dinlərarası münasibətlərin yaxşılaşmasına, sivilizasiyalararası dialoqun möhkəmlənməsinə böyük töhfədir. Ölkəmizdəki dini etiqad azadlığı və dözümlülüyün mühitini dünya ictimaiyyəti nüfuzlu beynəlxalq təşkilatlar, görkəmli din xadimləri dəyərli örnək kimi qiymətləndirirlər və Azərbaycanın tolerantlıq məkanı kimi dünyada gedən proseslərdə rolu böyükdür.

Cənab İlham Əliyev bildirib ki, Azərbaycan öz dövlət müstəqilliyini bərpa etdikdən sonra millətlərarası münasibətlərə, milli və dini tolerantlığın möhkəmlənməsi işinə çox böyük diqqət verilmişdir. Odur ki, xalqımız təhlükəsizlik, sülh şəraitində yaşayır. Ölkəmizdə vətəndaş cəmiyyətinin formalaşması və möhkəmlənməsi istiqamətində çox önəmli addımlar atılıb. Azərbaycanın inkişafı istiqamətində fikir ayrılığı yoxdur, cəmiyyətimiz ümumxalq amalları ətrafında birləşibdir. Dövlət başçısının bəyan etdiyi kimi bu Azərbaycançılıq fəlsəfəsi, müasirlik, öz tarixi köklərimizə, ənənələrimizə bağlılıqdır: "Eyni zamanda Azərbaycan dünyəvi dövlətdir. Azərbaycanda bütün dinlərin nümayəndələrinə çox böyük hörmət vardır. Yəni bizim ölkəmizi bu gün ictimai-siyasi baxımdan şərtləndirən amillər bunlardır".

Şərq və Avropa dövlətləri də bütün sahələrdə olduğu kimi, ölkəmizlə bu istiqamətdə əlaqələr qurmağa böyük maraq göstərir. Bunu Roma papasının, Vatikan nümayəndəliklərinin, Moskvanın və bütün Rusiyanın patriarxının, Qafqaz müftilərinin Azərbaycana səfərləri də təsdiqləyir.

Müstəqil Azərbaycan Respublikasının bütöv bir tarixi mərhələsi bilavasitə ümummilli lider Heydər Əliyevin adı ilə bağlıdır. Ulu öndər ictimai-siyasi həyatın bütün sahələrində, o cümlədən dövlət - din münasibətlərinin sivil prinsiplərə uyğun olaraq tənzimlənməsində, dini etiqad və vicdan azadlığının maneəsiz təminatında, dini-mənəvi, əxlaqi-etik dəyərlərin cəmiyyətin prioritet yaşayış normalarına çevrilməsində müstəsna xidmətlər göstərib. Bu sahədə ümümmilli liderin özündən sonra böyük siyasi iş və dövlətçilik təcrübəsi miras qoyduğunu vurğulamaq lazımdır. Odur ki, milli-mənəvi dəyərlərin tətbiq olunması, milli ənənələrimizə qayıdış prosesi ulu öndər Heydər Əliyevin siyasi hakimiyyətə qayıdışından sonra başlanmışdır.

Ölkəmizdəki tolerantlıq, başqa dinlərə xoş münasibət Azərbaycanın reallıqlarındandır. Bu, ölkəmizdə yaşayan bütün insanların həyat səviyyəsinə müsbət təsir göstərir. Bu gün Azərbaycanda dini abidələrin bərpasına, məscidlərin, kilsələrin, sineqoqların təmir və tikintisinə böyük diqqət göstərilir. Bu il Bibiheybət ziyarətgah kompleksinin əsaslı yenidənqurma və tikinti işlərindən sonra açılışı, Bakıda katolik kilsəsinin açılışı və istifadəyə verilməsi də Azərbaycanda tarixən formalaşmış milli-mənəvi mədəniyyətin, tolerantlıq ənənələrinin möhkəmləndiyini təsdiqləyir.

Bu amillərin hər bir ölkənin inkişafı üçün çox vacib olduğunu vurğulayan cənab İlham Əliyev bildirib ki, Azərbaycanda yaşayan bütün xalqların mədəni irsinə, tarixi irsinə çox böyük hörmətlə yanaşırıq: "Bakıda və ölkəmizin digər yerlərində qorunub saxlanılan bütün dinlərin məbədləri, abidələri və onların bərpası bunun əyani sübutudur".

Əlizadə Ş.

Respublika.- 2008.- 11 dekabr.- S.6.