Cəmiyyət əlilləri sevindirdi

Dünya müsəlmanlarının mənəvi birlik rəmzi olan müqəddəs Qurban bayramı münasibətilə ölkəmizin hər yerində geniş tədbirlər keçirildi. Bu tədbirlərdən biri də Xətai rayonunda yerləşən "Səadət" şadlıq sarayında Pənah Əlilləri Müdafiəsi Cəmiyyəti tərəfindən təşkil olunmuşdur.

Bayram tədbirində çıxış edən cəmiyyətin sədri Gülbəniz Bayramova ilk öncə bütün əlilləri bu əlamətdar gün münasibətilə təbrik etdi. Bildirdi ki, Pənah Əlilləri Müdafiəsi Cəmiyyəti 1998-ci ildən fəaliyyət göstərir. Cəmiyyətin fəaliyyətinin əsas məqsədi əlillərin məişət və sosial problemlərinin həlli, onların sağlamlığının qorunması, həyat səviyyəsinin yaxşılaşdırılması istiqamətində işlər görməkdir. Fəaliyyətə başladığımız vaxtdan bəri əlil olan insanlara maddi və mənəvi yardımlarımızla yanaşı, onların digər problemlərinin həllində, iş yerləri ilə təmin olunmalarında, müalicələrinin vaxtlı-vaxtında aparılmasında öz köməkliklərimizi göstərmişik. Hər il ölkəmizdə qeyd olunan bütün bayramlarda əlillərimizə bayram süfrələri açmış, onlara yardımlarımızı paylamışıq.

Hazırda cəmiyyətimizin 9873 nəfər əlil üzvü vardır. Bunlardan 1000 nəfəri regionlardan olan əlillərdir. Həmçinin cəmiyyətə üzv olmaq istəyənlərin sayı ilbəil artır.

Biləsuvardan, İmişlidən, Oğuz, Saatlı rayonlarından müraciət edənlər var. Onu da qeyd edim ki, üzvlərimizdən 450 nəfəri yataq xəstələridir ki, onların içərisində I qrup əlillər, əmək qabiliyyətini itirmişlər də çoxdur.

Gülbəniz xanım çıxışında onu da bildirdi ki, Pənah Əlilləri Müdafiəsi Cəmiyyəti 3 dekabr Beynəlxalq Əlillər Günü münasibətilə Opera və Balet Teatrında daha çox regiondan olan 4 minə yaxın əlillər üçün xeyriyyə konserti də təşkil etmişdir.

Bugünkü bayram tədbiri isə həmin konsertdən yığılan vəsait hesabına həyata keçirilir. Burada iştirak edən 300 nəfər əlilə bayram süfrəsi ilə yanaşı ərzaq yardımları da paylanacaqdır.

G.Bayramova çıxışının sonunda ölkə başçısına, YUNESKO və İSESKO-nun xoşməramlı səfiri, millət vəkili Mehriban xanım Əliyevaya daima əlillərə, aztəminatlı ailələrə, kimsəsiz uşaqlara göstərdikləri diqqət və qayğıya görə öz dərin minnətdarlığını bildirdi. Daha sonra cəmiyyətin fəaliyyətində öz maddi və mənəvi köməkliklərini əsirgəməyən Azərbaycan Dövlət Neft Şirkətinin neft və qaz sənayesi işçiləri Həmkarlar İttifaqının rəhbərliyinə, Rabitə və İnformasiya Texnologiyaları Nazirliyinə, Bakı Telefon Rabitəsi İstehsalat Birliyinin sədrinə və bütün xeyirxah insanlara öz təşəkkürünü bildirdi.

Xətai Rayon İcra Hakimiyyətinin, Xətai Rayon YAP-ın, Rabitə və İnformasiya Texnologiyaları Nazirliyinin nümayəndələrinin iştirak etdikləri bu tədbirdə həmçinin, xalq artisti Canəli Əkbərov, Yusif Mustafayev, Əlikram Bayramov, aşıq Telli Borçalı və başqaları maraqlı ifaları ilə əlilləri sevindirdilər.

Hüseynova G.

Respublika.- 2008.- 11 dekabr.- S.11.