Zamanı qabaqlayan dahi insan

Ümumilli liderimiz Heydər Əliyevin xalqı və Vətəni qarşısında tarixi xidmətləri misilsizdir.

Çoxəsrlik dövlətçiliyimiz tarixində xüsusi yeri olan Heydər Əliyevin fəaliyyəti öz mahiyyəti və əhəmiyyəti etibarilə Azərbaycanın hüdudlarından çox-çox kənara çıxır. Dünyanın nüfuzlu siyasətçiləri, görkəmli ictimai-siyasi xadimləri ulu öndərimiz Heydər Əliyevi yalnız Azərbaycanın deyil, bəşəri miqyaslı lider, hələ sağlığında ikən zəmanəmizin canlı əfsanəsi adlandırmışlar. Ümummilli lider Heydər Əliyev zamanı qabaqlayan, onun fövqündə dayanan elə dahi şəxsiyyətdir ki, o, yalnız öz dövrü üçün yaşamayıb, yalnız öz dövrünün qayğıları ilə məşğul olmayıb. Dünyada cərəyan edən proseslərə təsiri baxımından daim seçilən və qlobal dünyanın ən aktual çağırışlarına cavab verən bu dahi şəxsiyyət nəinki zəmanəmizin, eləcə də bəşəriyyət tarixinin ən görkəmli siyasi və dövlət xadimləri sırasında şərəfli yer tutub.

Azərbaycanı bəşəriyyətin beşiyi olan nadir ölkələrdən biri, xalqımızın isə nadir bir irsin varisi adlandıran ulu öndərimiz Heydər Əliyev deyirdi: "Hər bir Azərbaycan vətəndaşı bu irsə layiq olmağa çalışaraq böyük bir tarixi keçmişi, zəngin mədəniyyəti, yüksək mənəviyyatı olan ölkəmizin, həm dünəninə, həm bu gününə, həm də gələcəyinə dərin bir məsuliyyət hissi ilə yanaşmalıdır". Ümummilli liderimiz bu şərəfli missiyanı uğurla yerinə yetirərək Azərbaycanın tarixi keçmişini bərpa etdi, milli-mənəvi irsini, dəyərlərini özünə qaytardı, milli adət-ənənələrini yaşatdı, ölkəmizi bütün dünyaya tanıtdı.

Tanınmış rus jurnalisti Oleq Sıqanov Heydər Əliyev fenomeninə çox yüksək qiymət verərək yazır: "Uğurla inkişaf edən hər bir ölkə öz inkişafının müəyyən ideyasına—millətin mənəviyyatının hərəkətverici qüvvəsi kimi çıxış edən, gələcəyə çox güclü bir motiv olan ideyaya möhtacdır. Lakin ümummilli ideyalar öz-özünə, heç nədən yaranmır. Heykəltəraş incəsənət əsərlərini gildən yapdığı və ya qranitdən yonduğu kimi, mənəvi və intellektual liderlər də milli ideyanı yaratmaq üçün millətin bütün yaradıcı və tarixi potensialına istinad edirlər. Heydər Əliyev lazımi vaxtda Azərbaycan üçün elə bir nadir, zəruri bənd, ziyalılar sinfinin hakimiyyət zirvəsinə çatmış elə bir nümayəndəsi olmuşdur ki, o, özünün fenomenal siyasi keyfiyyətləri sayəsində nəinki yeni milli ideyanı - müasir dövrün çağırışlarına adekvat olan yeni Azərbaycan dövlətçiliyi ideyasını ifadə etməyə, həm də millətin ən geniş, bu ideyanı həyata keçirən siyasi və intellektual qüvvələrini - gözəl idarəçiləri və Azərbaycanı mütərəqqi inkişaf orbitinə çıxarmağa qabil olan cəsarətli novatorları öz ətrafında birləşdirməyə və onları bu ideyanın həyata keçirilməsinə yönəltməyə nail olmuş nümayəndəsi olmuşdur. Əliyev hətta çoxlarının bu uğura inanmadığı, tarixin üfüqləri, tarixi perspektiv siyasi qeyri-sabitlik xaosunun təsiri ilə aradan qalxdığı vaxtlarda da bunu edə bilmişdir". Həqiqətən də ulu öndər Heydər Əliyev çoxlarının, bəzən isə hətta heç kəsin edə bilmədiyi işləri öz dərin biliyi və bacarığı, polad iradəsi sayəsində həyata keçirməyə müvəffəq olmuşdur. Onda peşəkar siyasətçiyə və dövlət başçısına xas olan bütün nadir keyfiyyətlərlə yanaşı, fitri qabiliyyət vardı, qarşıya qoyduğu məqsədə doğru nə qədər maneələr törədilsə də, qətiyyətlə irəliləyirdi. Hesablamalarında yanılmır, atdığı hər hansı addımın nəticəsini qabaqcadan görə bilir, auditoriyanı ələ almağı və müsahibini inandırmağı bacarırdı. İncə diplomatik manevrlər, gözlənilməz gedişlər, siyasətdə ardıcıllıq ona daim uğur gətirib. Prezidentin uğuru isə bilavasitə dövlətin uğuru deməkdir.

Azərbaycan tarixinin önəmli və əbədi xatırlanacaq, Vətənin və xalqın taleyi baxımından çox mühüm bir mərhələsi, ötən əsrin 60-cı illərinin sonlarından başlanan və XXI əsrə adlayan bütöv bir qərinəsi ulu öndərimiz Heydər Əliyevin adı və fəaliyyəti ilə bağlıdır. Təsadüfi deyil ki, 1969-1982-ci illərdə həyatımızın bütün sahələrində baş vermiş köklü dəyişikliklər öz miqyasına görə Azərbaycanın quruculuq salnaməsinin ən dolğun səhifələrini təşkil edir. Azərbaycanın müstəqilliyinin və dünya iqtisadiyyatına dərin inteqrasiyası proseslərinin hazırkı möhkəm təməli məhz Heydər Əliyev tərəfindən həmin illərdə yaradılmış potensiala əsaslanır.

Ulu öndərimiz hələ ötən əsrin 70-ci iliərindən başlayaraq Azərbaycanın inkişafı və tərəqqisi, insanların firavan yaşaması üçün nə mümkün idisə, hamısını etmişdi. Harada, hansı vəzifədə və hansı şəraitdə işləməsindən asılı olmayaraq, həmişə öz xalqı ilə birlikdə idi. Onun qayğısı ilə yaşayırdı. Ulu öndərimiz Azərbaycanı tarixin ən çətin sınaqlarından məharətlə çıxararaq müstəqil dövlətçiliyimizi qurdu, onu beynəlxalq aləmdə tanıtdı. 1993-cü ilin ortalarında dərin böhran içərisində çabalayan ölkəni intensiv inkişaf yoluna çıxardı. 1993-cü ilin iyununda müstəqilliyini yenidən itirmək təhlükəsi, vətəndaş müharibəsi ilə üz-üzə qaldığı bir vaxtda xalqımız öz taleyini yalnız Heydər Əliyevə etibar etdi. Xalqın təkidi və xahişi ilə hakimiyyətə qayıdan Heydər Əliyev Vətənini və xalqını başının üstünü almış bütün bəlalardan hifz edib qorudu, qanunçuluğu bərpa etdi və cəmiyyəti vahid məfkurə ətrafında birləşdirdi. Təsadüfi deyil ki, Heydər Əliyevin hakimiyyətə gəlişi ilə milli birliyin təmin edildiyi günü xalqımız özünün əsl xilaskarı şərəfinə Azərbaycanın müasir tarixinə Milli Qurtuluş Günü kimi yazmışdır.

Ümummilli liderimiz Heydər Əliyev güclü daxili potensiala malik yeni milli dövlət sistemi yaratdı. İqtisadi tənəzzül tədricən inkişaf mərhələsi ilə əvəzləndi. Heydər Əliyevin Azərbaycan tarixindəki rolunu çox dürüst müəyyənləşdirən Türkiyənin sabiq prezidenti Süleyman Dəmirəlin sözlərini xatırlayaq: "Çörçill ingilis millətinə 40 il xidmət etdi, ancaq bu, xidmətin sonunda, 1940-cı ildə lazım oldu. O zaman Çörçillin edəcəyi xidməti göstərəcək ikinci adam yox idi. Bəşər tarixində insanlar hər zaman millətinə xidmət edir, ancaq bəzən lazım olurlar. Ruzveltin 1942-ci ildə, de Qollun 1958-ci ildə, Adenaurun 1946-cı ildə lazım olduğu kimi... Heydər Əliyev Azərbaycan millətinə çox xidmət etmişdir, amma 1993-cü ildə lazım idi. Onun gördüyü işi görəcək başqa heç kim yox idi. Yaxşı ki o vardı". Ulu öndərimizin şəxsiyyətinə və fəaliyyətinə ən məntiqi qiymətin ifadəsi sayılan sözlərdir...

1994-cü ildə Heydər Əliyevin milli neft strategiyasının reallaşmasını təmin edən "Əsrin müqaviləsi"nin imzalanması xalqımızın öz maddi sərvətlərinin, xüsusən də neftin həqiqi sahibinə çevrilməsinin təntənəsi sayıla bilər. Bu müqavilə çərçivəsində həyata keçirilən genişmiqyaslı layihələr, Bakı-Tbilisi-Ceyhan neft, Bakı-Tbilisi-Ərzurum qaz kəmərlərinin reallaşması, Azərbaycanın neft və qazının dünya bazarlarına çıxarılması, nəhəng karbohidrogen yataqlarının kəşfi və istismarı ölkəmizin tarixində yeni dövr açmış, dinamik inkişafın təməlini təşkil edərək müstəqilliyimizin iqtisadi bünövrəsinin möhkəmlənməsi və Azərbaycanın bu gün dünyada analoqu olmayan templə davamlı inkişafı üçün möhkəm zəmin yaratmışdır.

Ümummilli liderimiz Heydər Əliyev müstəqilliyimizin möhkəmləndirilməsində neft amilinin rolunu dürüst müəyyənləşdirərək deyib: "Neft Azərbaycanın müstəqilliyinin möhkəmlənməsi, iqtisadiyyatın digər sahələrinin inkişaf etdirilməsi, xalqın rifahının yüksəldilməsi kimi ali məqsədlərimizin uğurla həyata keçirilməsi üçün güclü vasitədir, ən əlverişli mənbədir. Tam qətiyyətlə demək olar ki, bu vasitədən səmərəli və məqsədyönlü istifadə etməklə biz yaxın gələcəkdə Azərbaycan ən yüksək həyat səviyyəli ölkələrdən birinə çevirə biləcəyik". İndi xalqımız milli neft strategiyasının real bəhrələrini görür. Müstəqil Äzərbaycan dövləti öz inkişafının keyfiyyətcə yeni mərhələsini yaşayır. İnsanların rifah halı günbəgün daha da yaxşılaşır. Maaşlar, pensiya və müavinətlər müntəzəm olaraq artırılır, sosial problemlər öz müsbət həllini tapır.

Neft amili qeyri-neft sektorunun inkişafına güclü təkan verərək Azərbaycanın hərtərəfli və davamlı tərəqqisini təmin edir.

Ulu öndərimizin onillik prezidentliyi dövründə gördüyü saysız-hesabsız işlərin hamısını sadalamaq, sadəcə mümkün deyil. Əsası odur ki, demokratiya, insan hüquqlarının qorunması, siyasi, iqtisadi, mədəni və həyatımızın digər sahələrinin sürətli inkişafı bir sözlə, demokratik, hüquqi və dünyəvi dövlətin yaradılması, dünyadakı nüfuzunun durmadan artması məhz Heydər Əliyevin misilsiz xidmətləridir. Müstəqil dövlətçiliyimizin Heydər Əliyev tərəfindən formalaşdırılan mənəvi-ideoloji əsası dünya azərbaycanlılarının həmrəyliyinin möhkəmləndirilməsində, Azərbaycan diasporunun formalaşmasında və güclənməsində həlledici rol oynayıb. Nəticədə, azərbaycançılıq məfkurəsı şuurlara hakım kəsilib. Dövlətimizin başçısı İlham Əliyevin qeyd etdiyi kimi, Heydər Əliyevin adı bu gün bölgədə və dünyada layiqli mövqe qazanmış Azərbaycan dövlətinin rəmzi kimi səslənir.

Ulu öndərimiz Heydər Əliyevin əbədiyyətə qovuşmasından 5 il ötür. Bu illər həm də xalqımız üçün sınaq illəri idi. Sevindirici haldır ki, ümummilli liderimizin siyasi kursu bu gün Azərbaycanın və regionun yeni praqmatik, Avropa tipli lideri İlham Əliyev tərəfindən qətiyyətlə və uğurla davam etdirilir. Yaradılmış möhkəm təməl üzərində Azərbaycan artıq daha yüksək zirvələri fəth etməkdə, dünyanın ən önəmli dövlətlərindən biri kimi tanınmaqdadır.

Ulu öndər Heydər Əliyevin anım gününü hər il milyonlarla insan yad edir. Fəxri Xiyabanda bu dahi insanın məzarına baş çəkənlərin ardı-arası kəsilmir. Bu kədərli anım günündə xalq bir daha həmrəylik nümayiş etdirərək Heydər Əliyevin ruhu qarşısında mənəvi borcunu ödəyir. Dünya şöhrətli ictimai-siyasi xadim Heydər Əliyevin xatirəsi qəlblərdə əbədi yaşayacaq, onun müdrik siyasi kursu Azərbaycanı daim uğurlara doğru aparacaqdır.

Cabbarov X.

Respublika.- 2008.- 12 dekabr.- S.1, 3.