Hər birimizin qəlbində əbədi yaşayan lider

Düz beş il bundan öncə, 2003-cü il dekabr ayının 12-də ümummilli liderimiz, türk dünyasının ulu öndəri, Azərbaycan xalqının böyük oğlu Heydər Əlirza oğlu Əliyev vəfat etdi. Həmin vaxtdan beş il ötməsinə baxmayaraq, bu günə kimi, bundan sonra da ulu öndərimiz hər birimizin qəlbində əbədi yaşayacaqdır. Ulu öndərimizin özündən sonra qoyub getdiyi əvəzsiz xidmətləri, respublikamızın çiçəklənməsində, dünya arenasında tanınmasında, inkişafında böyük rolu danılmazdır. Heydər Əliyevin sağlığında ikən müəllimlərə, həkimlərə, mədəniyyət işçilərinə, idmançılarımıza, gənclərimizə göstərdiyi diqqət və qayğısının nəticəsidir ki, bu gün həmin insanlar ümummilli liderimizi ən gözəl xatirələrlə anırlar. Beynəlxalq Təhsil Kompleksinin, T.Hüseynov adına 134 saylı orta məktəbin direktoru Sara Xanlarova öz ürək sözlərini bizimlə söhbətində bu cür ifadə etdi:

- Ümummilli liderimiz Heydər Əliyevin böyük kədərlə andığımız vəfatının 5-ci ildönümüdür. Elmə, təhsilə yüksək qiymət verən dövlət başçıları bununla nəinki öz ölkələrinin iqtisadi və mədəni yüksəlişini təmin edir, həm də bəşəriyyətin tərəqqisinə böyük töhfələr vermiş olurlar. Ulu öndərimiz Heydər Əliyev epoxasında da milli təhsilin inkişafı, ölkənin intellektual potensialının zənginləşdirilməsi, təhsil quruculuğu sahəsində aparılan islahatlar Azərbaycanın tərəqqisinin əsası oldu.

Dünya şöhrətli dahi şəxsiyyət olan Heydər Əliyevin ölkəmizə rəhbərlik etdiyi dövrdə xüsusilə təhsilə, Azərbaycan müəllimlərinə töhfələri olduqca çox olmuşdur. Milli tariximizin ən yaddaqalan məqamları, maarifimizin intibahı, təhsilimizin uğurları məhz onun adı və fəaliyyəti ilə bağlıdır. Ümummilli liderimiz Heydər Əliyevin qurub yaratdığı müstəqil Azərbaycan dövlətinin təhsil siyasəti həm də pedaqoji nəzəriyyədir, milli təhsilimizin ideya əsasıdır. Ötən əsrin 70-80-ci illərini haqlı olaraq Azərbaycan təhsilinin intibah dövrü adlandırırlar. Heydər Əliyev hələ o zaman özünəməxsus müdriklik və uzaqgörənliklə dərk edirdi ki, elm və təhsil millətin gələcəyidir. Elmin, təhsilin inkişafı, milli-mənəvi dəyərlərə həssas münasibət, müəllimə yüksək qayğı müstəqil Azərbaycan dövlətinə rəhbərliyi dövründə də ulu öndərimiz Heydər Əliyevin fəaliyyətinin əsasını təşkil etmişdir.

Böyük öndərin qayğısı nəticəsində hər il ənənəvi olaraq milli kadr potensialının, müxtəlif ixtisaslar üzrə mütəxəssis kontingentinin yaradılması məqsədilə SSRİ-nin nüfuzlu ali məktəblərinə azərbaycanlı gənclərin oxumağa göndərilməsi əbədi liderimizin uzaqgörənliyinin nəticəsi idi. Müstəqillik illərində Heydər Əliyevin tarixi qayıdışından sonra milli təhsil sisteminin bərpası, yeni şəraitin tələblərinə uyğun olaraq inkişaf etdirilməsi, təhsilin milli tərəqqimizin güclü amilinə çevrilməsi məqsədilə bu sahədə geniş islahatlara başlanıldı. 1999-cu il iyun ayının 15-də qəbul olunmuş "Azərbaycan Respublikasının təhsil sahəsində İslahat Proqramı" Azərbaycanda təhsilin inkişafına güclü təkan verdi.

Heydər Əliyevin milli təhsil sahəsində başladığı islahatlar bu gün onun zəngin həyat yolunu, məktəbini keçmiş, Heydər Əliyev irsini mükəmməl bilən Heydər Əliyev Fondunun prezidenti, YUNESKO və İSESKO-nun xoşməramlı səfiri, millət vəkili Mehriban xanım Əliyeva çox böyük uğurla davam etdirməkdədir.

Mən də, bu gün özümü xoşbəxt sayanlar sırasında hesab edirəm. Çünki məhz ümummilli liderimizin Azərbaycan Respublikasına Prezidentlik fəaliyyəti dövründə təhsil sahəsində rəhbər vəzifədə çalışmışam. Mənim üçün ən əlamətdar, böyük həyəcan və sevinc içərisində xatırladığım günlərdən biri isə 1999-cu ildə keçirilən Azərbaycan müəllimlərinin qurultayıdır. Həmin gün keçirilən qurultayda əbədi Prezidentimiz Heydər Əliyev iştirak etmişdi. Həmin əlamətdar gün ömrümün ən parlaq səhifəsinə çevrildi. O gözəl günü hər dəfə xatırladıqca sevinc hisslərilə yanaşı, ulu öndərimizin həmin qurultayda bütün müəllimləri, bütün məruzəçiləri bir-bir, böyük səbrlə, həvəslə necə dinlədiyi də yadıma düşür. Bu bir daha sübut edir ki, Heydər Əliyev xalqının vurğunu idi, millətinin yolunda hər bir əziyyətə dözürdü.

Bu gün bütün Azərbaycan xalqı çox xoşbəxtdir ki, ümummilli liderimiz, türk dünyasının ulu öndəri, xalqımızın böyük oğlu Heydər Əliyev özündən sonra xalqını, millətini, ölkəsini sevən layiqli davamçısını qoyub getdi. Heydər Əliyev məktəbinin, idarəçiliyinin mükəmməl bilicisi, ulu öndərin apardığı uğurlu daxili və xarici siyasətinin layiqli davamçısı, ölkəmizin başçısı İlham Əliyev Azərbaycan xalqının işıqlı gələcəyinin yeganə təminatçısına çevrildi. Bu gün dövlət başçımızın məqsədyönlü, uğurlu daxili və xarici siyasətinin nəticəsidir ki, ölkəmizin iqtisadiyyatı getdikcə güclənir, sosial rifah halı yüksəlir, dünyada kifayət qədər tanınır.

Hüseynova G.

Respublika.- 2008.- 12 dekabr.- S.10.