Soydaşlarımız vahid ideya ətrafında birləşmişlər

Biz Ukraynanın paytaxtı qədim Kiyev şəhərində olarkən dəfələrlə milli diasporumuzun təşəkkül tapmasında böyük xidmətləri olan, Bakıda doğulub boya-başa çatan, SSRİ əməkdar idman ustası, Azərbaycanın və keçmiş SSRİ-nin əməkdar məşqçisi, sərbəst güləş üzrə SSRİ və Avropa birinciliklərində 14 dəfə qalib gəlmiş, veteranlar arasında dünya çempionu Oleq Krapivinlə görüşümüz olmuşdur. O, yaşadığı ölkədə Oleq bakılı kimi məşhurlaşmışdır. Bu genişqəlbli insanın ürəyi daim Vətənindədir, o, həmişə bakılı olması ilə fəxr edir, yaşadığı ölkədə Azərbaycan həqiqətlərinin dünya xalqlarına çatdırılmasına maksimum səy göstərir. Oleq 5 il öncə Kiyev şəhərində diaspor fəallarının toplantısında ilk geniş müsahibəni "Respublika" qəzetinə vermiş, ayrı-ayrı vaxtlarda Azərbaycan televiziyasında Oleq Krapivinlə bağlı maraqlı süjetlər efirə getmişdir.

Ukrayna Azərbaycanlıları Konqresinin həyata keçirdiyi elə bir tədbir olmaz ki, orada həmyerlimiz Oleqin xidmətləri diqqəti cəlb etməsin. O, milli diasporumuzun təşəkkül tapmasında həmişə dəyərli təkliflər irəli sürür, öz tövsiyələrini verir. Xüsusilə Dağlıq Qarabağla bağlı söhbət gedəndə heç nədən çəkinmədən Azərbaycan xalqına qarşı zaman-zaman xəyanət toru hazırlayan erməni daşnaklarını, habelə onların havadarlarını tənqid edir. Vurğulayır ki, Azərbaycan çoxmillətli bir ölkədir. Bu gün Azərbaycan ərazisinin 20 faizindən çoxunu mənfur "qonşularımız" olan erməni terrorçuları işğal altında saxlayır. Zaman Azərbaycanın xeyrinə işləyir. Şübhəsiz ki, haqq-ədalət zəfər çalacaq. Heydər Əliyev siyasi kursunun layiqli davamçısı Prezident İlham Əliyevin titanik səyi nəticəsində erməni tapdağında olan torpaqlar geri qaytarılacaqdır.

Milli öndərimiz Heydər Əliyev ayrı-ayrı vaxtlarda Kiyev şəhərində səfərdə olarkən Oleq Krapivinlə şəxsən görüşüb söhbət etmiş, onun Azərbaycan diasporu ilə bağlı fəaliyyətini yüksək qiymətləndirmişdir. Oleq ümummilli liderimiz Heydər Əliyevlə görüşünü həyatının ən gözəl və yaddaqalan anı hesab edir.

Məlumdur ki, bu gün dost Ukraynada 500 mindən çox azərbaycanlı yaşayır. Həmvətənlərimizin daha çox məskunlaşdığı yer Kiyev şəhəridir. Kiyevdə çoxsaylı azərbaycanlı alimlər, ziyalılar, mədəniyyət xadimləri, tanınmış iş adamları vardır. Həmyerlilərimizin vahid bir ideya ətrafında birləşdirilməsinə ciddi səy göstərilir, milli diasporumuz monolit qüvvəyə çevrilir. Qeyd etmək lazımdır ki, hazırda Ukrayna Azərbaycanlıları Konqresi Kiyev şəhər təşkilatının sədri, həmyerlimiz - Bakı şəhərində dünyaya göz açmış, uşaqlıq illəri mavi Xəzərin nəğməli sahillərində keçmiş, hər an qəlbi Azərbaycan eşqi ilə döyünən Oleq Krapivindir. O çalışır ki, Kiyev şəhərindəki bütün diaspor fəalları təşkilatın ətrafında sıx birləşsin və mütəşəkkil qüvvəyə çevrilsin. Həmvətənlərimiz azsaylı xalqların nümayəndələri arasında öncül sırada getsin, azərbaycanlıların hüquqları qorunub saxlanılsın.

UAK-ın Kiyev şəhər təşkilatının tədbirlər planına uyğun olaraq yaxınlarda 31 dekabr - Dünya Azərbaycanlılarının Həmrəyliyi Günü ilə bağlı geniş tədbir keçiriləcək, 20 Yanvar, Xocalı faciəsi və Mart qırğını ilə bağlı keçiriləcək anım mərasimlərində videokasetlər, kitab və jurnallar nümayiş etdiriləcəkdir.

Dünyanın müasir demokratik inkişaf mərhələsində diasporun əhəmiyyəti danılmazdır. Bu mənada, Ukrayna Azərbaycanlıları Konqresi Kiyev şəhər təşkilatının fəaliyyəti ümidvericidir. Təşkilatın ətrafında sıx birləşmək, milli birliyə nail olmaq soydaşlarımızın strateji məqsədidir. Onlar çalışırlar ki, dünya azərbaycanlılarının Bakıda keçirilmiş II qurultayında qarşıya qoyulmuş vəzifələr əməli işə çevrilsin, dövlətimiz dünya birliyində özünəməxsus yer tutsun.

Aslan Q.

Respublika.- 2008.- 13 dekabr.- S.5.