Biz Avropa Şurası ilə Azərbaycan arasında mövcud olan əməkdaşlıqdan razıyıq

Bakıda Avropa Şurasının təşəbbüsü ilə keçirilmiş "Mədəniyyətlərarası dialoq Avropa və onun qonşu regionlarında davamlı inkişafın və sülhün əsasıdır" mövzusunda konfransın ölkəmizin imicinin yüksəlməsində böyük əhəmiyyəti oldu. Konfransın məhz Bakıda baş tutması o demək idi ki, Azərbaycan dini tolerantlıq, milli və etnik tolerantlıq baxımından böyük nailiyyətlər qazanmış, dünya və Avropa dövlətləri arasında nümunə kimi tanınmışdır. Ölkəmizdə dinindən, milli mənsubiyyətindən, irqindən asılı olmayaraq bütün xalqların nümayəndələri mehriban dostluq və qardaşlıq şəraitində yaşayırlar.

Konfransın Bakıda keçirilməsinin bizim üçün önəmli hallarından biri də orada Avropa Şurasının üzvü olan, Avropa Mədəniyyət Konvensiyasını imzalamış dövlətlərin, Avropanın qonşu regionlarını təmsil edən 10 ölkənin, Ərəb Dövlətləri Liqası ölkələrinin Elm, Mədəniyyət və Təhsil Təşkilatının yüksək vəzifəli şəxslərinin, müxtəlif fondların və QHT-lərin təmsilçilərinin, 16 nazirin, 18 nazir müavininin, 10 nüfuzlu beynəlxalq təşkilatın nümayədələrinin, ümumilikdə isə 250 nəfərdən çox nümayəndənin iştirak etməsi idi.

Konfransda çıxış edən Azərbaycan Prezidenti İlham Əliyev bildirdi ki, "...Azərbaycan səkkiz ilə yaxındır ki, Avropa Şurasının üzvüdür.

Bu dövr ərzində ölkəmizdə gedən siyasi və iqtisadi islahatlar. Avropa Şurası qarşısında götürdüyü öhdəliklərin yerinə yetirilməsi nəticəsində Azərbaycan demokratik inkişaf baxımından çox sürətlə irəli getmişdir. Ölkədə aparılan siyasi və iqtisadi islahatlar, qanunun aliliyinin bərqərar olunması, Azərbaycanda mütərəqqi təcrübənin tətbiq edilməsi - bütün bunlar son illər ərzində baş vermiş mühüm hadisələrdir. Biz Avropa Şurası ilə Azərbaycan arasında mövcud olan əməkdaşlıqdan çox razıyıq. Əminəm ki, bu əməkdaşlıq gələcəkdə uğurla davam etdiriləcək və bizə əlavə imkanlar yaradacaqdır".

Azərbaycanın dünya və Avropa ölkələri arasında dini, milli və etnik tolerantlıq baxımından nümunəyə çevrilməsinin əsasları var. Xüsusi qeyd edilməlidir ki, son illər dövlətimizin rəhbəri İlham Əliyev ölkəmizdə mədəniyyət və turizm sahələrinin inkişafı və dünya miqyasında təbliği üçün yüzdən çox sərəncam və fərman verib. Son dörd il ərzində bu istiqamətdə 71 beynəlxalq saziş və konvensiya imzalanıb. Fərəh hissi ilə deməliyik ki, Heydər Əliyev Fondunun prezidenti, YUNESKO və İSESKO-nun xoşməramlı səfiri, millət vəkili Mehriban xanım Əliyeva maddi-mənəvi və mədəni irsimizin qorunması və dünyada təbliğ olunması sahəsində təqdirəlayiq fəaliyyət göstərir.

Dövlətimizin rəhbərinin və Heydər Əliyev Fondunun apardıqları məqsədyönlü fəaliyyətin nəticəsidir ki, Azərbaycan mədəniyyəti dünya mədəniyyətinin, habelə onun tərkib hissəsi olan İslam mədəniyyətinin daşıyıcılarından biri olduğuna görə Bakı şəhəri 2009-cu il üçün "İslam mədəniyyətinin paytaxtı" elan edilmişdir. Ona görə də Avropa Şurasının üzvü olan dövlətlərin mədəniyyət nazirlərinin Bakı konfransı nəinki Azərbaycanın və Qərbin, eyni zamanda Şərqin mədəni həyatında çox mühüm hadisə sayılır. Konfransda belə bir fikir də vurğulandı ki, Azərbaycanın yürütdüyü siyasətdə mədəniyyətlərarası dialoq böyük önəm kəsb edir və ölkə başçısının təşəbbüsü və rəhbərliyi altında həyata keçirilən tədbirlər həm ölkəmizin daxilində, həm beynəlxalq aləmdə dialoqun səmərəli inkişafına böyük töhfələr vermişdir. Məhz bu konfrans müxtəlif xalqlar və dövlətlər arasında dialoqu daha da möhkəmləndirməyə və daha da inkişaf etdirməyə yönəldilmiş fəaliyyətin uğurlu nəticəsidir. Bununla bərabər ölkəmizin tarixi, coğrafi vəziyyəti və müxtəlif nüfuzlu beynəlxalq təşkilatlarla sıx əməkdaşlıq etməsi bizim imkanlarımızı xeyli dərəcədə artırır.

Tədbir iştirakçılarına iqtisadi və siyasi sahələrdə qazanılan uğurlar barədə geniş məlumat verən Prezident İlham Əliyev bildirdi ki, "Azərbaycan xalqı rahat yaşayır, təhlükəsiz, sülh şəraitində yaşayır. Azərbaycanda vətəndaş cəmiyyətinin formalaşması və möhkəmlənməsi istiqamətində çox önəmli addımlar atılmışdır. Ölkəmizdə əsas inkişaf istiqamətləri ilə əlaqədar fikir ayrılıqları yoxdur, əksinə, bizim cəmiyyətimiz ümumxalq amalları ətrafında birləşibdir: Azərbaycançılıq fəlsəfəsi, müasirlik, öz tarixi köklərimizə, ənənələrimizə bağlılıq. Eyni zamanda, Azərbaycan dünyəvi dövlətdir. Azərbaycanda bütün dinlərin nümayəndələrinə çox böyük hörmət vardır. Yəni bizim ölkəmizi bu gün ictimai-siyasi baxımdan şərtləndirən amillər bunlardır".

Konfransın keçirildiyi "Gülüstan" sarayının foyesində təşkil olunmuş sərgidə ölkəmizin qədim və zəngin mədəniyyəti barədə kifayət qədər dolğun təsəvvür formalaşdıran eksponatlar iştirakçılarda ölkəmizə olan marağın xeyli artmasına səbəb oldu. Xüsusilə ümummilli liderimiz Heydər Əliyevin və Prezident İlham Əliyevin mədəniyyət və incəsənət sahələrinə göstərdikləri diqqət və qayğını əks etdirən fotoşəkillər qonaqlarda böyük maraq doğurdu.

İlyasov V.

Respublika.- 2008.- 14 dekabr.- S.1-2.