Bizim gücümüz birliyimizdədir

Böyük türk dünyasını birləşdirən bizim tariximiz, ənənələrimiz, mədəniyyətimiz və dilimizdir

200 milyondan çox insanı birləşdirən türk dünyası böyük gücə malikdir. Son illər türk dünyasının əzəməti, dünyadakı rolu daha da artıb, mövqeləri möhkəmlənib.

Türkdilli dövlətləri bu gün dostluq, qardaşlıq və əməkdaşlıq münasibətləri birləşdirir. Ən yüksək zirvədə duran Türkiyə-Azərbaycan dostluğu və strateji tərəfdaşlığı bu münasibətlərə gözəl nümunədir. Bu münasibətləri birgə tarixi köklərimiz, etnik mənsubiyyətimiz, dilimiz, dinimiz, mədəniyyətimiz və ənənələrimiz kimi çox mühüm amillər şərtləndirir.

Ötən ilin noyabr ayında Bakıda Prezident İlham Əliyevin təşəbbüsü ilə keçirilən Türk dövlət və cəmiyyətlərinin XI dostluq, qardaşlıq və əməkdaşlıq qurultayı bu münasibətləri daha da möhkəmləndirib. Diasporlarımız arasında əlaqələri qırılmaz tellərlə bir-birinə bağlayıb. Yeni daha mütəşəkkil qüvvənin siyasi arenaya çıxdığı, istər Qərbdə, istərsə də Şərqdə cərəyan edən proseslərə təsir etmək imkanında olduğu göz qabağındadır.

Prezident İlham Əliyevin qeyd etdiyi kimi, bizi birləşdirən bizim tariximizdir, ənənələrimizdir, mədəniyyətimiz, dilimiz, kökümüzdür: "Bu, gələcək inkişaf üçün çox böyük bir əsasdır... Bu zəmin üzərində qurulan münasibətlər xalqların bir-birinə bağlı olmasından, maraqların üst-üstə düşməsindən asılıdır. Bizim aramızda, Türkiyə ilə Azərbaycan arasında dostluq, qardaşlıq münasibətləri bütün sahələrdə özünü büruzə verir. Həm xalqlarımız birdir, həm xalqlara rəhbərlik edən insanlar dostdur, qardaşdır, həm də qeyri-hökumət sektoru - millət vəkilləri, bütün elm adamları, ziyalılar bir-biri ilə sıx bağlıdır. Bu, bizim birliyimizi daha da gücləndirir".

Bu birlik ümumilikdə bütün türk dünyasının güclənməsinə böyük dəstək və töhfədir. Hazırda həm Azərbaycan, həm də Türkiyə ən sürətlə, dinamik inkişaf edən ölkələrdir, regionda aparıcı rola, mühüm çəkiyə malikdirlər. Ölkələrimizi eyni zamanda dünya miqyaslı qlobal enerji layihələri birləşdirir. Bakı-Tbilisi-Ceyhan, Bakı-Tbilisi-Ərzurum neft-qaz kəmərləri layihələri bölgənin uzunmüddətli inkişaf strategiyasının müəyyənləşdirilməsi baxımından olduqca böyük əhəmiyyət daşıyır. Təbii ki, gələcəkdə bir çox yeni möhtəşəm layihələrin reallaşması türk dünyasının daha da möhkəmlənməsinə xidmət edəcəkdir. Azərbaycanı və Türkiyəni Orta Asiya ilə birləşdirən yollar, enerji dəhlizləri barədə danışarkən dövlətimizin başçısı bununla dünyada tamamilə yeni situasiyanın yaranacağına əmin olduğunu bildirib: "Artıq Türkiyə və Azərbaycanın təşəbbüsü ilə ölkələrimiz və bütövlükdə bölgə üçün önəmli bir sıra layihələr həyata keçirilir. Onlardan biri də Bakı-Tbilisi-Qars dəmir yolunun tikilməsidir... Bu, bizi Türkiyə ilə dəmir yolu vasitəsilə birləşdirəcəkdir. Türkiyəni Orta Asiya ilə, bizim dəhlizdən keçməklə Asiyanı Avropa ilə birləşdirəcəkdir. Şübhəsiz ki, bunun çox böyük, həm iqtisadi, həm də siyasi önəmi var".

İldən-ilə daha da sürətlə, hərtərəfli inkişaf edən müstəqil Azərbaycan dövləti nəhəng türk dünyasının mərkəzində, geostrateji məkanda yerləşir. Bu baxımdan da Azərbaycan aparıcı mövqeyə malikdir və Türk dünyasının birləşməsində, möhkəmlənməsində lokomotiv rolunu oynayır. Bizim gücümüz daim yüksələn siyasi çəkimizdə və güclü iqtisadi potensialımızdadır. Təsadüfi deyil ki, bütün bu potensial və güc ilk növbədə, məhz Türk dünyasının tərəqqisinə yönəldilib.

Dünya şöhrətli yazıçı Oljas Suleymenovun təbirincə desək, "dünyada 40-dan artıq türkdilli xalq var. Tarix bizi Monqolustandan Aralıq dənizinədək əraziyə yaymışdır. Epoxaların məkanları xalqlarımızı bir-birindən ayırmışdır. Buna baxmayaraq, biz başlıca amalları eyni cür başa düşürük. Eləcə də ümumi bəlalarımızı eyni ağrı ilə qavrayır və ümumi sevincimizlə fəxr edirik. Ona görə də bütün türkdilli xalqlar sanki böyük türk superetnosunun, böyük Türk dünyasının diasporlarıdır. İndiki mərhələdə bütün güclərin, qüvvələrin bir yerə toplaşması vaxtı çatıb.

Xaricdə fəaliyyət göstərən türk və Azərbaycan diaspor təşkilatlarının əlaqələndirilməsinin, vətənlə güclü tellərin saxlanılmasının vacibliyi, bu prosesin daha da möhkəmləndirilməsi prioritet məsələ kimi ortaya qoyulub, həllini tapmaqdadır. Digər prioritet məsələ isə Türkiyə və Azərbaycana qarşı mütəşəkkil, böyük maliyyə imkanlarına malik olan dünya erməni lobbisi ilə mübarizədə qüvvələrin birləşdirilməsidir. Bu gün ermənilər Azərbaycanın torpaqlarını hələ də işğal altında saxlayırlar. Türkiyəyə qarşı əsassız iddialar irəli sürür, qondarma "soyqırımı"nı tanıtmağa cəhdlər göstərirlər. Dünyaya meydan oxuyan, iki əsrdən artıqdır ki, bütövlükdə türk xalqlarına qarşı genosid və etnik təmizləmə siyasəti yürüdən, Xocalıda əsl soyqırım törədən vəhşi ermənilər təəccüblü də olsa bizi soyqırımda ittiham edirlər. Təəssüf ki, dünya ictimaiyyəti ya buna göz yumur, ya da ermənilərin səsinə səs verirlər. Bunu ədalətsizliyin, mənəviyyatsızlığın zirvəsi adlandıran Prezident İlham Əliyev bildirib ki, bunun qarşısına ancaq öz gücümüzü çıxarmalıyıq. Biz güclənməliyik, hərtərəfli - hərbi, iqtisadi, siyasi cəhətdən, bütün cəhətlərdən və birgə fəaliyyət göstərməliyik!

Bu gün dünya birliyində və bölgədə Azərbaycan-Türkiyə münasibətlərinin inkişafından çox şey asılıdır. Ölkələrimizin birgə həyata keçirdiyi layihələr bölgədə və dünyada gedən proseslərdə həm Türkiyənin, həm də Azərbaycanın mövqeyini daha da möhkəmləndirib. Gələcək perspektivlərimiz də çox böyükdür. Türkiyənin dövlət başçısı Abdullah Gülün bu il Azərbaycana səfəri də ikitərəfli əlaqələrin genişlənməsi baxımından əhəmiyyətli rol oynayıb. Səfər zamanı keçirilən danışıqlarda, aparılan geniş və əhatəli müzakirələrdə bölgədəki vəziyyətlə bağlı prezidentlərin mövqeləri tamamilə üst-üstə düşüb. Bildirilib ki, Türkiyə və Azərbaycanın bölgədəki rolu və təsir imkanları genişlənir, gələcək birgə səylər nəticəsində regionumuzda sülh və sabitlik tamamilə bərqərar olacaqdır.

Cabbarov X.

Respublika.- 2008.- 17 dekabr.- S.1.