Məktəbdənkənar tədris mərkəzləri təhsilin inkişafında öz xidmətlərini əsirgəmir

Neftçala rayonunda məktəbdənkənar təhsilin vəziyyəti ilə bilavasitə yerlərdə tanış olarkən gördük ki, həmin tədris ocaqlarının kollektivləri dövlətin ümumi təhsil sistemində həyata keçirdiyi tədbirləri, xüsusən ölkə başçısının 21 avqust 2004-cü il tarixli sərəncam və fərmanından irəli gələn vəzifələri layiqincə yerinə yetirmək üçün əzmlə çalışırlar.

Rayon Texniki Yaradıcılıq Mərkəzində olarkən öyrəndik ki, 1984-cü ildən fəaliyyət göstərən bu tədris müəssisəsində 120 dərnək var. Mərkəzin direktoru, təcrübəli pedaqoq Salman Abdullayev bildirdi ki, cari tədris ilində rayonun 22 məktəbində təşkil edilmiş dərnəklərə 1800 nəfər şagird cəlb olunmuşdur. Həmin dərnəklərə 76 nəfər rəhbərlik edir ki, onların da 48 nəfəri ali, 28 nəfəri orta ixtisas təhsilli müəllimlərdir.

Neftçala şəhəri, Həsənabad, Xıllı və Bankə qəsəbə, Astanlı, Mirqurbanlı, Kürkənd, Aşağı Qaraimanlı, Kürqarabucaq, Aşağı Surra, Qırmızıkənd, Xolqarabucaq, Xolqaraqaşlı, Xəzər kənd məktəblərində, "Muğan" liseyində, internat məktəbdə fəaliyyət göstərən dərnəklərin işləri müasir tələblər səviyyəsində qurulmuşdur. Şagirdlər gəmi, təyyarə və avtomobil modelçiliyi, intellekt, foto, sağlam həyat tərzi, informatika, elektrotexnika və radiotexnika, texniki ekologiya və digər dərnəklərdə öz bilik və bacarıqlarını artırırlar.

Son vaxtlar ərzində Texniki Yaradıcılıq Mərkəzində uşaq, yeniyetmə və gənclərin maraq, meyil və yaradıcılıq qabiliyyətlərinin inkişaf etdirilməsi məqsədilə əl işlərindən ibarət sərgi yaradılmış, yarışlarda əldə edilmiş mükafatların nümayişi təşkil olunmuşdur. Mərkəz vaxtaşırı olaraq məktəblərdəki dərnəklərlə əlaqə saxlayır, onların fəaliyyəti öyrənilib müzakirə edilir, dərnək rəhbərlərinin hesabatları dinlənilir, onlara əməli metodiki köməklik göstərilir. Texniki Yaradıcılıq Mərkəzi Zaqatala şəhərində keçirilən festivalda yaxşı nümunə göstərərək xüsusi sertifikat almışdır. Şagirdlərdən Adil Bəşirov, Rüxsarə Ramazanova, Azad Dadaşov, Elman Babayev, Nurlan Əliyev, Kənan Yoldaşov, Vüsal Mirzəyev, Elnur Cəfərov, Aqil Ağahüseynov və Samir Fətullayev müxtəlif növlər üzrə zona və respublika yarışlarında qalib gələrək xüsusi mükafatlara layiq görülmüşlər.

Rayondakı Uşaq Yaradıcılıq Mərkəzi 1992-ci ildən fəaliyyətə başlamışdır. Akif Həsənovun rəhbərlik etdiyi bu tədris müəssisəsi şagirdlərin mənəvi və fiziki tərbiyəsində, onların bədii və texniki imkanlarının üzə çıxarılmasında, asudə vaxtlarının təşkilində əvəzsiz rol oynayır. Burada tədris üçün hər cür şərait yaradılmış, nümunəvi metodiki guşə təşkil olunmuş, ulu öndər Heydər Əliyevin, Azərbaycanın Milli qəhrəmanlarının, Böyük Vətən müharibəsi qəhrəmanlarının, 20 yanvar və Qarabağ müharibəsi şəhidlərinin, tarixi şəxsiyyətlərin, görkəmli ədəbiyyat və incəsənət xadimlərinin, alimlərin həyat və fəaliyyəti barəsində sərgilər və fotostendlər tərtib edilmişdir.

Geniş və işıqlı məşğələ otaqlarında 11 adda 59 dərnək fəaliyyət göstərir. Bu dərnəklərə 1485 uşaq və yeniyetmə cəlb olunmuşdur. Qruplar texniki, bədii yaradıcılıq və metodiki şöbələr üzrə təşkil olunmuşdur. Mərkəzin binasındakı 7 dərnəkdə 105, 17 ümumtəhsil məktəbindəki 53 dərnəkdə 1380 şagird məşğələlərə cəlb edilmişlər. Diyarşünaslıq, ölkəşünaslıq, sağlam həyat tərzi, informatika, bacarıqlı əllər, bədii qiraət və başqa dərnəklərdə uşaqlar daha həvəslə məşğul olurlar.

Müəssisədə ciddi əmək intizamı var, proqramlar və iş planları dəqiq yerinə yetirilir, məşğələ jurnalları vaxtında və dürüst tərtib edilir.

Şagirdlər IV uşaq musiqi festivalında, əl işləri və "Ekologiya uşaqların gözü ilə" respublika müsabiqələrində layiqli nəticələr əldə etmişlər. Təşkil olunan viktorinalar, disputlar, yubiley gecələri, görüşlər həmişə maraqla qarşılanır.

22 il bundan əvvəl yaradılmış Ekoloji Tərbiyə və Təcrübəçilik Mərkəzi rayonun təhsil sistemində ən qabaqcıl müəssisələrdən hesab olunur. Mərkəzin binası bu yaxınlarda keyfiyyətlə təmir olunub, yeni avadanlıqlarla təchiz edilmişdir.

Diktor Vaqif Həsənlinin məlumatına görə burada 12 adda fəaliyyət göstərən 31 dərnəyə 465 şagird cəlb edilmişdir. Dərnəklərdən 9-u orta məktəblərdədir. "Akvarium-balıqçılıq", "Bitkiçilik", "Əhali və ətraf mühit, "Bitkilər və ətraf mühit", "Xəzərin ekologiyası", "Gülçülük", "Məişət ekologiyası", "Dərman bitkiləri", "Heyvanların mühafizəsi", "Gülçülük və ailə" dərnəkləri xüsusilə fərqlənirlər.

Mərkəzdə geniş miqyasda maarifləndirmə işi aparılır, bacarıqlı və istedadlı şagirdlərin aşkar edilməsinə xüsusi diqqət yetirilir, müntəzəm olaraq müsabiqələr keçirilir. Xəzər-sahili rayonların məktəbliləri arasında Ümumdünya Yer Gününə həsr olunmuş müsabiqədə rayonun 29 məktəblisi sertifikat və diplomlara layiq görülmüşdür. Ümumtəhsil məktəblərində "Su həyatdır", "Vətənimizi yaşıllıqlar diyarına çevirək" devizi altında keçirilən tədbirlər, ekoloji tərbiyə mövzusunda rəsm müsabiqəsi maraqlı və cəlbedici olmuşdur. İçməli suya qənaət, yaşıllaşdırma sahəsində aparılan işlərin əksəriyyətinin təşəbbüsçüsü də məhz bu məktəbdənkənar müəssisənin kollektivi olmuşdur. Son vaxtlar mərkəzin yaşıllıq zonası xeyli genişləndirilmişdir.

Rayon Uşaq Gənclər İdman Məktəbinin qazandığı uğurlar da sevindiricidir. Məktəbin direktoru Abdulhəsən Dadaşov söhbət əsnasında bildirdi ki, burada 90 qrupda 53 məşqçinin rəhbərliyi altında 1082 şagird idmanın müxtəlif növləri ilə məşğul olur. Məşqlər əsasən şəhər stadionunda, Bankə qəsəbəsindəki boks üzrə idman zalında, ümumtəhsil məktəblərinin idman bazalarında keçirilir.

Məktəbin idmançıları son vaxtlar bir sıra yarışların qalibi olmuşlar. Gənclər arasında boks üzrə respublika yarışlarında Həsənağa Həsənov, Murad Novruzov, Qurban Qurbanov, Vüqar Həziyev, Samir Əcəmov, Təbriz Musayev və başqaları müxtəlif çəki dərəcələrində çıxış edib mükafata layiq görülmüşlər. Bu il futbol üzrə zona yarışlarında birinci yeri tutan rayon məktəblilərinin komandası final yarışlarına vəsiqə almışdır. May ayında Bakı şəhərində keçirilən atletika turnirində Rüfanə Həsənova 200 metr məsafəyə qaçışda ikinci yeri tutmuşdur. Ümumiyyətlə, məktəbin 200 nəfərə yaxın yetirməsi idmanın müxtəlif növləri üzrə kütləvi idman dərəcəsi və birinci dərəcə idman normalarını yerinə yetirmişdir.

Şəhərin mərkəzində yenicə təmirdən çıxmış yaraşıqlı Uşaq Gənclər Şahmat Məktəbinin binası diqqəti xüsusilə cəlb edir. Resublika Prezidenti cənab İlham Əliyev və onun xanımı Mehriban Əliyeva rayonda olarkən bura baş çəkmiş, məktəblə tanış olmuşlar. Bu görüş məktəbin kollektivinin xatirəsində silinməz izlər buraxmışdır.

Məktəbdə bütün məşğələlər təkmilləşdirilmiş proqramlar üzrə aparılır. Zəngin kabinet sistemi, geniş akt zalı, yarış zalı, əyani vasitələr, maqnit lövhələri, şahmat saatları, müxtəlif dərslik və metodiki ədəbiyyat, qəzet və jurnallar məşqçi müəllimlərin və şagirdlərin ixtiyarındadır. Sürətli internet kanalı, elektron poçtu şagirdlərin yaxın köməkçisidir. Müntəzəm olaraq qarşılıqlı dərslərin keçirilməsinə xüsusi diqqət yetirilir, respublikanın və xarici ölkələrin analoji məktəbləri ilə sıx əlaqə saxlanılır, onların qabaqcıl təcrübəsindən geniş istifadə olunur.

Burada kiçik yaşlı uşaqlar arasında şahmatın öyrədilməsinə başlanılmışdır. Məktəbin direktoru İmanbaxış Şirəliyev qeyd etdi ki, cari tədris ilində 44 qrupda 593 şagird məşğələlərdə iştirak edir, onlarla 21 məşqçi müəllim məşğul olur.

Əlamətdar və tarixi günlərə həsr olunmuş turnirlər müntəzəm olaraq keçirilir. Son vaxtlarda Şirvan, Salyan, Biləsuvar, Masallı, Astara və digər rayonların komandaları ilə keçirilmiş yoldaşlıq yarışlarında şagirdlər yüksək yerləri tutaraq mükafatlandırılmışlar. Məktəbin yetirməsi Zaur Nəsirov respublika yarışlarında fərqlənmişdir. Bakı, Lənkəran, Zaqatala, Quba, Astara, Ucar, Masallı rayonlarında təşkil olunmuş zona yarışlarının nəticələri də Neftçalanın gənc və yeniyetmə şahmatçıları üçün uğurlu olmuşdur.

Bir sözlə, Neftçala rayonunun təhsil işçiləri məktəbdənkənar tədris ocaqlarını milli təhsilimizin inkişaf etdirilməsində müstəqil respublikamızın adına layiq gənc nəsil yetişdirməkdə rolunu yüksək qiymətləndirirlər. Rayonun məktəbdənkənar müəssisələrin kollektivləri təhsil islahatının həyata keçirilməsində qarşıya qoyulmuş vəzifələri layiqincə yerinə yetirmək həvəsi ilə işləyir, bütün imkanlardan maksimum istifadə etməyə çalışırlar.

Mustafayev S.

Respublika.- 2008.- 17 dekabr.- S.5.