Sağlam ailə - sağlam gələcəkdir

Hazırkı elmi-texniki tərəqqi, bunun əsasında iqtisadiyyatın inkişafı, habelə yaşadığımız cəmiyyətin demokratik əsaslarının getdikcə təkmilləşməsi və s. dünyanın sürətli dəyişməsinə səbəb olmuşdur. Bütün bu dəyişikliklərdə cəmiyyətin əsas aparıcı qüvvəsi sayılan gənclərin rolu, yeri, təsiri şübhəsizdir.

Ölkə Prezidentinin 2007-ci ili Gənclər ili elan etməsi, 2 fevral Gənclər Gününün təsisi gənclərimizə olan qayğı və diqqətin təzahürüdür. Respublika Prezidenti ölkənin gənclər təşkilatının nümayəndələri ilə görüşündə demişdir: "Gənclərin Azərbaycan cəmiyyətində rolu çox böyükdür. Azərbaycanın dövlət müstəqilliyi uğrunda mübarizə aparan da, bu müstəqilliyi bərpa edən də gənclər olmuşdur".

Bu gün ölkə Prezidentinin qətiyyəti, prinsipiallığı, bacarığı sayəsində gənclərimizin hərtərəfli, sağlam bir vətəndaş kimi formalaşması üçün çox mühüm işlər görülür. Bu gün cəmiyyətin əsas aparıcı qüvvəsi gənclərdir.

Yeni əsrdə tibb elminin inkişafı hər bir insanın özünə və sağlamlığına münasibətini dəyişir. Sağlamlığının dəyərini anlayan insanlar daha müasir tibbi avadanlıqlarla təchiz olunmuş, ən yeni laborator metodların tətbiq olunduğu klinikalarda müayinə və müalicə olunmağa üstünlük verirlər.

Bu missiyanı uğurla yerinə yetirən tibb müəssisələrindən biri də "Sağlam Ailə" klinikasıdır. Klinikanın rəhbəri Vüqar Eyvazovla söhbətimizdə də məhz həmin məsələyə aydınlıq gətirildi:

—Respublikamızda ilk molekulyar laboratoriyalardan birinin fəaliyyət göstərdiyi "Sağlam Ailə" özəl tibb mərkəzi 5 ilə yaxındır ki, əhalinin xidmətindədir. Əsasən gənclərin reproduktiv sağlamlığı ilə məşğul olan klinikamızda infeksion xəstəliklərin erkən diaqnostikası, sonsuzluqla bağlı problemi olan gənclərə androloq və ginekoloqların poliklinik xidmətləri, yeni ailə quranlara və valideyn olmağı planlayan gənclərə müxtəlif "CHEK-UP" müayinə paketləri və bir sıra digər xidmətlər təklif olunur.

Bizim ən başlıca məqsədimiz artıq bir müddətdir ki, həyata keçirdiyimiz "Azərbaycan genefondunun keşiyində" layihəsinə uyğun olaraq gənclər arasında yeni müayinə mədəniyyətini təbliğ etməkdir. Gənclər mütləq ailə qurmazdan əvvəl bir sıra müayinələrdən keçməlidirlər. Klinikamızın təklif etdiyi "Mən ailə qururam", "Mən ana olmaq istəyirəm", "Mən ata olmaq istəyirəm " adlı layihələr var ki, gənclər seçim edərək ətraflı müayinə oluna bilərlər.

Bizim fəxrlə haqqında danışacağımız sahələrdən biri də məhz hamilə qadınlar üçün klinika tərəfindən təklif olunan xüsusi müayinələrdir: hamiləlik testləri, dölün dopler USM, TORCH infeksiyalarının PZR müayinəsi, urogenetal xəstəliklərin və hepatitlərin erkən diaqnostikası və s. bu xidmətə aiddir. Cəmiyyətin gələcəyi naminə "Sağlam Ailə" klinikası bu sahəyə xüsusi diqqət yetirir.

Laboratoriyamıza ən son texnologiyaları tətbiq etməklə yanaşı, mütəxəssislərimizin də inkişafına xüsusi diqqət yetiririk. Hər il Moskva MDM-də (Molekulyar Diaqnostika Mərkəzi) bizim mütəxəssislər ixtisasartırma kursları keçirlər.

Qarşımızda duran başlıca məqsəd isə sağlam gələcəyə, evliliyə qədəm qoyan cütlüyün övlad dünyaya gətirmək istəyinə yardımçı olmaqdır. Burada ilk növbədə söhbət gənclərimizin maarifləndirilməsindən, həyata hazırlığından gedir. Yaxın qohumları ilə ailə quranlar çoxdur. Bunun sonrakı nəticəsi isə müxtəlif fəsadlar törədir. Çox vaxt belə ailə quranların dünyaya gətirdikləri körpədə fiziki qüsurlar olur.

XXI əsrin dinamik inkişafı insan sivilizasiyası qarşısında bir sıra əxlaqi, mənəvi problemlər qoyur ki, onların həlli bəlkə də bütövlükdə cəmiyyətin gələcəyini təmin edir. Qloballaşma nəticəsində bu gün yeniyetmələr geniş informativ məkana malikdirlər. İnternet, televizor, müxtəlif nəşrlər, gənclərin zehni lazımlı-lazımsız bir çox informasiyalarla yüklənməkdədir.

Uşaq hələ ana bətnində tərbiyə olunmağa başlayır. Lakin öncə bu adi həyat normaları və ictimai həyat qaydaları əsasında aparılırsa, fərd böyüdükcə onun tələbləri də, təlim-tərbiyəsi də istiqamətini dəyişir. Yeniyetməlik dövrünə çatan gənc çox şey bilmək istəyir, lakin məhz nəyi bilməli olduğunu təyin edə bilmir. Bu məqsədlə Azərbaycanda ilk dəfə olaraq www.pcr.az saytı yaradılmışdır. Açığını deyək ki, bu gün əhalinin, o cümlədən də gənclərin tibb sahəsində maariflənməsinə çox böyük ehtiyac var. Azərbaycan dilində sizi maraqlandıran bütün tibbi suallara bu saytda cavab tapa bilərsiniz. Klinikamızda gəncləri məlumatlandırmaq uçün vaxtaşırı treninqlər və konsultasiyalar keçirilir. Qeyd etmək istəyirəm ki, bu tədbirlər tam ödənişsizdir.

Hüseynzadə Ə.

Respublika.- 2008.- 20 dekabr.- S.4.