Təhsilin səmərəliliyi artırılır

Son illər həyatımızın bütün sahələrində olduğu kimi, təhsildə də geniş islahatlar aparılır. Bunun nəticəsidir ki, təhsildə uğurlu göstəricilərimizin sayı ildən-ilə artır. Sabirabad rayonunda da təhsil sahəsində məqsədyönlü iş aparılır. Rayonda 85 ümumtəhsil məktəbi, 22 uşaq bağçası, 5 məktəbdənkənar müəssisə fəaliyyət göstərir. Rayon üzrə 28.460 şagirdin təlim-tərbiyəsi ilə 2.381 nəfər müəllim məşğul olur. Bu il ali məktəblərə qəbul olunan 193 nəfər məzundan 7 nəfəri 600-dən yuxarı, 28 nəfəri 500-dən yuxarı bal toplayıb. 685 bal toplayan 2 nəfər sabirabadlı gənc Prezident təqaüdünə layiq görülüb.

"Yeniləşən Azərbaycana yeni məktəb" layihəsi Sabirabadda müvəffəqiyyətlə həyata keçirilir. Son illərdə rayonda yeni məktəblərin sayı durmadan artır. Hazırda Bala Həşimxanlı kəndində 480 yerlik yeni məktəb binasının inşası davam etdirilir. Rayon təhsil şöbəsinin müdiri Məleykə Həsənova əməkdaşımızla söhbət zamanı dərs ilinin gedişi barədə danışdı:

—Rayonumuzda 2008-2009-cu dərs ilinin müvəffəqiyyətlə başa çatması üçün təhsil müəssisələrinin əsaslı və cari təmirinə xüsusi diqqət yetirilmişdir. 2008-ci ilin büdcəsində ayrılmış 110.500 manat vəsait hesabına Ələmbəyli, Dadaşbəyli kənd orta, Xankeşən kənd əsas, Qəfərli kənd ibtidai məktəbləri, şəhər 5 saylı uşaq bağçası və idman məktəbinin binalarının əsaslı təmir edilməsi planlaşdırılmışdı. Hazırda təhsil müəssisələrində təmir işləri yekunlaşmaq üzrədir.

Eyni zamanda Çöl-Ağammədli kənd əsas məktəbində 180 şagird yerlik məktəb binası, rayon təhsil şöbəsi üçün yeni inzibati bina tikilməsi və N.Nərimanov adına şəhər 2 saylı, həmçinin qəza vəziyyətində olan M.Müşfiq adına şəhər 4 saylı orta məktəbində əsaslı təmir işləri görülür və davam edir. Qaralar kənd əsas məktəbində iş adamlarının hesabına əsaslı təmir işləri görülmüşdür.

Məlum olduğu kimi şəhər mərkəzində yerləşən təhsil müəssisələrinin istilik sistemi və qazanxanaları uzun müddətdir ki, işləmədiyi üçün tamam yararsız hala düşmüşdür. Bu məqsədlə təhsil şöbəsi təhsil naziri Misir Mərdanova köməklik məqsədi ilə rəsmi müraciət etmişdir. Nazirlikdən şəhər mərkəzində yerləşən məktəblərin qazanxana və istilik sistemlərinin əsaslı təmirinə vəsait ayırmışdır.

Rayon təhsil şöbəsinin daxili imkanları hesabına Qaraqaşlı, Axtaçı-Muğan, Nəsimi kənd orta məktəblərinin həyətyanı sahələri məftil tor ilə hasarlanmışdır.

Maddi-texniki bazanın möhkəmləndirilməsi məqsədi ilə məktəblərə kifayət qədər yemək stolu, çarpayı, televizor, musiqi aləti, idman malları, bel, vedrə, çən və elektrik lampaları verilmişdir.

Uzun müddətdir ki, məktəblərdə telefon xəttinin olmaması və yaxud işləməməsi səbəbindən təhsil ocaqları ilə müntəzəm əlaqə saxlamaq problemi var idi. Bu problem də aradan qaldırılır. Hazırda 10 məktəbə yeni telefon xətti çəkilib və bu iş davam etməkdədir. Elektrik şəbəkəsində nasazlıqlar aradan qaldırılmışdır. Bu məqsədlə 1983 metr elektrik naqili alınıb təhsil müəssisələrinə verilib. Qaratəpə və Mürsəlli kənd orta məktəblərində elektrik transformatoru tərmir edilib.

Payız-qış mövsümünə hazırlıqla əlaqədar ən vacib məsələlərdən biri müəssisələrin qızdırılması vəziyyətidir. Ayrılmış illik vəsaitdən 112.410 manatı sərf edilmiş, 70850 manatına isə maye və odun yanacağı alınıb istifadə ediləcəkdir. Qış mövsümünə hazırlıqla əlaqədar əlavə 400 ədəd salyarka və 100 ədəd odun sobası alınıb yaxın günlərdə məktəblərə paylanacaqdır.

Təhsilin səmərəliliyini və keyfiyyətini yüksəltmək üçün ilk növbədə lazımı baza olmalıdır. Sevindirici haldır ki, ölkəmizdə gedən iqtisadi inkişaf belə bir bazanın yaradılmasına imkan verir. Biz bu imkanlardan gələcəkdə daha yaxşı istifadə etməyə çalışacağıq.

Hüseyn T.

Respublika.- 2008.- 21 dekabr.- S.7.