Oxucularla görüş

Çağdaş Azərbaycan ədəbiyyatının tanınmış nümayəndəsi, Azərbaycan Yazıçılar Birliyinin nəşri olan "Azərbaycan" ədəbi-bədii jurnalının poeziya şöbənin müdiri, şair Qəşəm Nəcəfzadənin yaradıcılığı şeir sevərlərə yaxşı tanışdır. İndiyədək onun 19 kitabı işıq üzü görüb. 2007-ci ildə Holandiyada keçirilən 38-ci benəlxalq poeziya festivalında ölkəmizi təmsil edən ilk şairdir. Həmin mötəbər poeziya bayramından sonra Qəşəm müəllimi holland, alman, rus, ingilis, fransız, Tavan, Tamil (Şri-Lanka, Malayziya, Sinqapur, Hindistanın bir hissəsi) dillərində oxuyurlar. Şair üç dildə olan internet saytlarında (www.qeshemnecefzade.net) Azərbaycan, ingilis, rus oxucuları ilə görüşür. Belə görüşlərdən biri bu günlərdə Türkiyədə baş tutub. Qardaş ölkənin "Bengü" yayım evində şairin "Savaş, ayaqqabı, ölüm" adlı şeirlər kitabı gözəl bir tərtibatla çap olunub. Topluya onun son illərdə yazdığı şeirlər daxil edilib. Türkiyə ədəbi mətbuatında, xüsusən "Kardeş Kalemler" dərgisində şairin şeirlərinin son vaxtlar müntəzəm dərci yeni kitabı ortaya qoymaq zərurətini yaratdı. Kitabın redaktoru və Türkiyə türkcəsinə çevirəni tanınmış alim, tərcüməçi və pedaqoq Fəti Gədiklidir.

Kitabın annotasiyasında deyilir: "Qeşem Necefzade Azərbaycan şiirində yeni bir ufuktur. Şair, bin yıllık klassik hecenin dışına çıxaraq serbest vezinde, söz vadisinde kalemini ustalıqla oynatıyor.

Qeşem, bizim hergün yanından geçtiyimiz hiçbir olağanüstülüğü olmayan nesnelere başqa bir açıdan bakılabileceğini şiirle ortaya koyuyor".

Qəşəm Nəcəfzadə deyir: "Kitabı yayım evi öz vəsaiti hesabına çap edib. Bütün məsələlər üç ay içərisində reallaşıb. Türkiyə başqalarına baxanda bizə bir köynək yaxındı. Bu, türkiyəli şair qardaşlarımızın Azərbaycan ədəbiyyatına diqqətidir. Kitabda əməyi keçən insanlara dərin təşəkkürümü bildirirəm".

Qəşəm Nəcəfzadənin digər bir toplusu Tehranda "Yaşmaq" yayım evində nəfis şəkildə çap edilib. Kitab "Ölülər bizə gülür" adlanır. Nəşriyyatın öz hesabına nəşr etdiyi bu kitabda şairin müxtəlif illərdə yazdığı şeirləri toplanıb. Kitabın redaktoru istedadlı şair və naşir Səid Muğanlıdır. Üz qabığının tərtibatçısı Ayxan, şeirləri ərəb qrafikası ilə yazan və ön sözün müəllifi Səttar Mahmudoğludur.

Bundan əlavə, Tehranda "Səhər" musiqi qrupunun buraxdığı alboma Qəşəm Nəcəfzadənin öz səsi ilə şeirləri daxil edilib. İnternet saytlarının və mətbuatın yazdığı xəbərlərə görə, həm albom, həm də "Ölülər bizə gülür" şeirlər kitabı İranda maraqla qarşılanıb.

Nuriyeva T.

Respublika.- 2008.- 21 dekabr.- S.4.