Ali baş Komandanın milli ordumuza daimi diqqət və qayğısı

Azərbaycanın beynəlxalq aləmdə artan nüfuzu ölkədəki ordu quruculuğu işində də özünü qabarıq göstərməkdədir. Bu, heç şübhəsiz, şəxsən Azərbaycan Prezidenti, Silahlı Qüvvələrin Ali Baş Komandanı İlham Əliyevin diqqət və qayğısının, tələb və tövsiyələrinin nəticəsidir. Ölkədə ordu quruculuğu işinin prioritet elan olunması nəticəsiz qalmamışdır. Ordu quruculuğu işində aparılan islahatlar, vaxtında və yüksək səviyyədə həyata keçirilən tədbirlər bu vacib qurumda zəruri irəliləyişlərin əldə olunması üçün stimul rolunu oynamışdır. Hərbi qulluqçuların sosial və məişət şəraitinin daim yaxşılaşdırılması, aylıq vəzifə maaşlarının dəfələrlə artırılması, təhsil, təlim və tibb sahəsində yeni metodların tətbiq olunması gözlənilən yüksək nəticələrə rəvac vermişdir. Son bir neçə il ərzində Silahlı Qüvvələrin hərbi qulluqçularına geniş yaşayış sahəsinə malik yüzlərlə mənzillərin orderlərinin paylanması şəxsi heyət arasında ruh yüksəkliyi yaradan amillərdən biridir. Son illər Azərbaycanın ordu quruculuğu sahəsində həyata keçirilən bir sıra tədbirlərin keçmiş MDB məkanında belə analoqu yoxdur. Məsələn, 2006-cı ildən Mərkəzi Hərbi Klinik Hospitalın Cərrahiyyə Korpusu tikilib istifadəyə verilmişdir. MDB məkanında analoqu olmayan bu 300 çarpayılıq cərrahiyyə korpusu 6 mərtəbədən ibarətdir. Korpus 14800 kvadratmetr sahəyə, 26 bölməyə və çoxsaylı yardımçı otaqlara malikdir. On bir cərrahiyyə otağında quraşdırılmış on dörd izləyici kamera cərrahiyyə əməliyyatlarının həyata keçirilməsi effektini ikiqat artırmışdır. Cərrahiyyə korpusu hər cür tibbi avadanlıqla təchiz olunmuş yeddi böyük, dörd kiçik tutumlu universal təcili yardım maşını ilə təmin edilmişdir.

Bundan əlavə, hərbi qulluqçuların və onların ailə üzvlərinin mədəni istirahətinin daha yüksək səviyyədə təşkili üçün Göradildə zabitlərin istirahət evi vətən müdafiəçilərinin ixtiyarına verilmişdir. Qaraheybət hərbi şəhərciyində isə Silahlı Qüvvələrimizin beynəlxalq standartlara uyğun ümumqoşun Təlim Mərkəzi müasir dövrün ən yüksək tələbləri səviyyəsində qurulmuşdur. Mərkəzi Klinik Hərbi Hospitalın Cərrahiyyə Korpusunun, və Ümumqoşun Təlim Mərkəzinin açılış tədbirlərində Azərbaycan Prezidenti, Silahlı Qüvvələrin Ali Baş Komandanı İlham Əliyevin şəxsən iştirak etməsi, bir tərəfdən dövlət rəhbərinin ordumuza inam və etimadının ifadəsidirsə, digər tərəfdən də dövlətin bu mühüm və vacib sahəyə xüsusi önəm verməsinin ifadəsidir. Ümumiyyətlə, Ali Baş Komandanın respublikanın müxtəlif bölgələrinə, xüsusilə cəbhə xəttində yerləşən hərbi hissələrə müntəzəm baş çəkməsi, yeni korpusların açılış mərasimlərində şəxsən iştirak etməsi və bir sıra hərbi hissələrə Döyüş Bayrağı təqdim etməsi şəxsi heyətdə böyük ruh yüksəkliyi yaratmışdır. Azərbaycan Prezidenti İlham Əliyevin cəbhə bölgəsində, səngərdə vətənin keşiyində dayanan əsgər və zabitlərlə şəxsən maraqlanması, onların hərbi xidmət şəraiti ilə yerindəcə tanış olması, birbaşa səngərdən cihazlar vasitəsilə düşmənin üzbəüzdəki mövqelərini müşahidə etməsi hərbi qulluqçuların xidmətdə uğur qazanması üçün stimul rolunu oynayan faktlardandır. Cənab Ali Baş Komandan xidmətdə fərqlənən hərbi qulluqçulara elə səngərdəcə medallar və qiymətli hədiyyələr təqdim etməklə, əsgər və zabitlərlə birlikdə çay süfrəsi arxasında əyləşməklə və onlarla səmimi söhbət etməklə Silahlı Qüvvələrimizin şəxsi heyətinin döyüş ruhunun yüksəlməsində, əsgər və zabitlərimizdə qələbəyə olan inam hissinin artmasında mühüm rol oynamışdır. Təsadüfi deyil ki, ordu quruculuğu işinə daim böyük diqqət və tələblə yanaşan Ali Baş Komandan belə tədbirlərin birində demişdir: "Ordu quruculuğunda işlər uğurla davam edir. Ordumuz güclənir. Bu sahəyə xüsusi diqqət var. Ümumiyyətlə, cəmiyyətdə bu sahəyə böyük diqqət olmalıdır. İnsanlarımız, gənc nəslimiz vətənpərvərlik ruhunda tərbiyə edilməli, böyüməlidir. Hər bir vətəndaş çalışmalıdır ki, orduya kömək etsin, orduya öz dəstəyini versin".

Müqayisə üçün deyək ki, 2003-cü ildə Azərbaycanda hərbi xərclərə 135 milyon dollar xərclənirdisə, 2007-ci ildə bu məbləğ bir milyard dollara çatıb. Ümumiyyətlə götürdükdə isə, orduya aid xərclər təkcə son dörd ildə 8 dəfədən çox artıb. Bu onu göstərir ki, Azərbaycanın dövlət büdcəsində hərbi xərclər birinci yeri tutur. Göründüyü kimi, dövlətin əsas məqsədi real əməllə, yenilik və islahatlarla xalqın etimadını qazanmaq və doğrultmaqdır. Yalnız belə bir dövlətin yaşamaq hüququ var. Yalnız belə bir Prezidentin iradəsini ifadə etdiyi xalqın gücünə, qüdrətinə güvənməyə haqqı çatır. Elə məhz bu səbəbdən də Ali Baş Komandanın bölgələrə, xüsusilə cəbhə xəttində yerləşən hərbi hissələrə hər səfəri böyük bir təntənəyə, böyük bir irəliləyişə və bayrama çevrilir.

Dövlətin orduya qayğısı artdıqca bu mühüm və strateji sahədə əldə olunan uğurların miqyası da genişlənir. Bu gün Azərbaycanın ordu quruculuğu planlı surətdə həyata keçirilir. Qoşunların döyüşə və səfərbərliyə hazırlığı, döyüş və mənəvi-psixoloji üstünlüyü idarəetmə orqanlarının təşkili, maddi-texniki təminat və digər əsas direktiv sənədlər vasitəsilə gerçəkləşdirilir. Silahlı Qüvvələrin bütün növlərində, hərbi hissə və birləşmələrdə komanda-qərargah təlimləri və real döyüş şəraitinə yaxınlaşdırılmış səhra təlimləri planlı surətdə keçirilir, qoşunların döyüşə və səfərbərliyə hazırlığı daim yüksək səviyyədə nəzarət altında saxlanılır. Əsas komanda-qərargah vəzifələrinə peşəkar, mənəvi, psixoloji cəhətdən hazırlıqlı, döyüş təcrübəsinə malik peşəkar zabitlərin təyin olunması hərbi hissələrdə xidmətin səviyyəsini ikiqat artırmışdır. Bildiyimiz kimi, Silahlı Qüvvələrin təhsil ocaqlarında məzunların buraxılışı müasir standartlara uyğun yeni proqramlarla həyata keçirilir. Bu da xidmətin ümumi keyfiyyətini artıran əsas amillərdəndir.

Silahlı Qüvvələrin fəaliyyətinin əsas istiqamətlərindən biri də onun beynəlxalq əlaqələrinin genişləndirilməsi və qabaqcıl dünya dövlətlərinin təcrübəsindən bəhrələnərək inkişafından ibarətdir. Bu gün Azərbaycan zabitləri NATO-nun mənzil qərargahında və müxtəlif komandanlıqlarında ölkəmizi uğurla təmsil edirlər. Azərbaycan Respublikasının Silahlı Qüvvələrinin tərkibində sülhməramlı tabor yaradılıb. Bu taborun bölmələri hazırda Əfqanıstanda beynəlxalq terrorizmə qarşı sülhməramlı əməliyyatlarda öz missiyalarını layiqincə yerinə yetirirlər. Təsadüfi deyil ki, Azərbaycanın müdafiə naziri general- polkovnik Səfər Əbiyevin ünvanına bir sıra beynəlxalq təşkilatlardan müntəzəm olaraq minnətdarlıq məktubları daxil olur. Məsələn, Əfqanıstanda Təhlükəsizliyə Yardım üzrə Beynəlxalq Qüvvələr Komandanı, Amerika Birləşmiş Ştatları Quru Qoşunları generalı Dən Mak Nelil tərəfindən göndərilən məktubda sülhməramlılarımızın nümunəvi xidmətindən yüksək razılıq hissi ifadə olunub. Məktubda deyilir: "Sizin Əfqanıstandakı qoşunlarınız yerləşdiyi yerdən asılı olmayaraq hər gün təhlükəsizliyə öz töhfəsini verir və hər bir tapşırığın yerinə yetirilməsində böyük çeviklik və qəhrəmanlıqlar göstərir. Onlar Azərbaycanın heyrətamiz nümayəndələridirlər. Onlar əvvəllər də bu cür olmuş, gələcəkdə də belə olmaqda davam edəcəklər. Əfqanıstanda Təhlükəsizliyə Yardım üzrə Beynəlxalq Qüvvələrin bir hissəsi kimi onlara komandanlıq etmək mənim üçün şərəfdir".

Yeri gəlmişkən, bu, sülhməramlılarımızın əldə etdiyi ilk uğur deyil. NATO-nun "Əməliyyat İmkanları Konsepsiyası" çərçivəsində Ortaq Qüvvələr Birliyinə daxil edilmiş Azərbaycan Silahlı Qüvvələrinin bölüyü birinci səviyyəli NATO qiymətləndirməsi təlimini müvəffəqiyyətlə başa çatdırmışdır. Niderland Krallığının Brunsum şəhərindəki NATO-nun Birləşmiş Qüvvələr Komandanlığının altı zabiti qiymətləndiricilər qrupunun üzvləri qismində iştirak edib. Təlimin şərti ssenarisinə uyğun olaraq NATO qüvvələri ilə birlikdə 15 tapşırıq yerinə yetirilib və Azərbaycan bölüyü uğur qazanıb. NATO-nun Birləşmiş Qüvvələr Komandanlığı hərbçilərimizdən razı qalıb. Yeri gəlmişkən, sülhməramlılarımızın onlarla hərbi qulluqçusu yüksək peşəkarlıq və döyüş hazırlığı nümayiş etdirdiyinə görə ABŞ "Dəniz Piyadalarının Nailiyyət medalı" və digər mükafatlarla təltif olunub.

Sülhməramlılarımız eyni adlı mükafata bundan əvvəl də dəfələrlə layiq görülüblər. NATO-nun Cənubi Qafqazda əlaqələndirici zabiti Zbiqnev Rıbatski tərəfindən Azərbaycanın Müdafiə Nazirliyinin ünvanına göndərilmiş digər bir məktubda deyilir: "Sizin ölkənizin Silahlı Qüvvələri hökumətinizin müəyyənləşdirdiyi islahatlar üzrə məqsədləri müvəffəqiyyətlə hazırlayır və yerinə yetirirlər. Azərbaycanın hərbi qulluqçularının əldə etdikləri tərəqqi NATO-nun əlaqələndirici zabiti kimi məndə böyük təəssürat yaratmışdır. Mən bu fürsətdən istifadə edərək Azərbaycanın Silahlı Qüvvələrinə davamlı uğurlar arzulayıram."

Bundan bir qədər əvvəl isə SENTKOM-Mərkəzi Komandanlıqda keçirilən toplantıda Koalisiya Qüvvələri Komandanının müavini general Makkarti sülhməramlı bölüyümüzün xidmətini yüksək qiymətləndirərək demişdir: "Azərbaycan sülhməramlı bölüyünün əsgərləri xidmət etdiyi bölgədə xidməti çox yüksək səviyyədə təşkil edir. Onların xidməti Amerika Dəniz Piyadalarının xidmətindən üstündür."

İnanırıq ki, hərbi qulluqçularımız xalqın və dövlətin etimadını qazanmaq yolunda əllərindən gələni bundan sonra da əsirgəməyəcək, qazanacağımız böyük uğurlara yüksək döyüş hazırlığı ilə öz töhfələrini verəcəklər. Azərbaycanın ərazi bütövlüyü və suverenliyi hər bir Azərbaycan əsgəri üçün həyat amalıdır.

Azərbaycan Ordusunun əldə etdiyi uğurların arxasında, heç şübhəsiz, ölkə Prezidenti, Silahlı Qüyvələrimizin Ali Baş Komandanı İlham Əliyevin gərgin əməyi və davamlı qayğısı dayanır. Bu qayğı, əlbəttə böyük tələb və etimadla müşayiət olunur. Ölkəmiz üçün taleyüklü tarixi məsələlərin həllinə yönəlmiş bu münasibəti Azərbaycan ordusunun şəxsi heyəti də dərindən dərk edir. Odur ki, gecə-gündüz əldə silah yurdumuzun keşiyində dayanan hərbçilərimiz şəxsən Ali Baş Komandanın və xalqımızın etimadını doğrultmaq üçün bundan sonra da əlindən gələni edəcək, ölkənin işıqlı sabahı və bütövlüyü naminə öz döyüş hazırlıqlarını daim artıracaqlar.

Rüstəmov İ.

Respublika.- 2008.- 23 dekabr.- S. 3.