Biz çox güclü ordu potensialı yaratmaqla Ermənistan-Azərbaycan, Dağlıq Qarabağ münaqişəsinin həllini yaxınlaşdırırıq

Ümummilli liderimiz Heydər Əliyev xalqın təkidli tələbi ilə ikinci dəfə hakimiyyətə gəldikdən sonra dövlət müstəqilliyimiz möhkəmləndirilmiş, müasir tarixin yeni mərhələsinə qədəm qoyaraq çox qısa müddət ərzində dinamik inkişaf yolu keçmişdir. Cəmiyyətin bütün sahələrində islahatlar aparılmış, ölkəmizdə hüquqi, demokratik dövlət bərqərar edilmiş və dünya birliyində layiqli yerini tutmuşdur. Dünyanın ən mötəbər beynəlxalq təşkilatlarında təmsil olunan Azərbaycanın mövqeyi dəstəklənmiş, söz sahibi olmuşdur. Düzgün müəyyənləşdirilmiş siyasi kursun son beş ildə qətiyyətlə və uğurla davam etdirilməsinin nəticəsidir ki, Azərbaycan dünyada analoqu olmayan sürətli inkişaf səviyyəsinə, qlobal regional və dünya miqyaslı iqtisadi layihələrin reallaşdırılmasına görə Yer kürəsinin lider dövlətlərindən birinə çevrilmişdir.

Qarşısında duran bütün problem və çətinlikləri müvəffəqiyyətlə həll etmiş ölkəmizin yeganə çözülməmiş problemi qalıb ki, o da torpaqlarımızın hələ də erməni işğalı altında qalmasıdır. Ölkəmiz bu problemi də həll etməyə qadirdir və hazırdır. İstər danışıqlar, sülh yolu ilə, istərsə də hərbi əməliyyatlar vasitəsilə problemi həll etmək iqtidarında olan Azərbaycan birinci həll variantına üstünlük verir. Məqsəd silah işə salmamaq, qan tökülməsinə yol verməmək, regionda sabitliyi pozmamaq, ölkənin iqtisadi inkişafını ləngitməməkdir.

Ölkəmizin rəhbərliyi hesab edir ki, hələ sülh danışıqları tükənməyib, problemin dinc yolla nizamlanmasına ümid var. Ancaq Azərbaycan danışıqlarda diktə edən tərəf olmaq üçün silahlı qüvvələrini və ordusunu, iqtisadi qüdrətini və beynəlxalq səviyyədə mövqeyini görünməmiş sürətlə gücləndirmişdir.

Dövlətimizin başçısı İlham Əliyev andiçmə mərasimindəki nitqində Ermənistan-Azərbaycan, Dağlıq Qarabağ probleminə geniş yer ayırmış və demişdir: "Azərbaycanda ordu quruculuğu prosesi bundan sonra da sürətlə gedəcəkdir. Eyni zamanda, ordumuzun maddi-texniki bazasının möhkəmləndirilməsi üçün çox böyük işlər görülübdür. Sizin diqqətinizə mən iki rəqəmi çatdırmaq istəyirəm. 2003-cü ildə Azərbaycanın hərbi xərcləri 163 milyon dollar idi, 2008-ci ildə bu rəqəm 1 milyard 850 milyon dollara çatıbdır. Növbəti illərdə bu məbləğ daha da artırılacaqdır. 2009-cu il dövlət büdcəsinin layihəsində orduya ayrılan vəsait daha da böyük olacaqdır. Beləliklə, biz çox güclü ordu potensialı yaratmaqla Ermənistan-Azərbaycan, Dağlıq Qarabağ münaqişəsinin həllini yaxınlaşdırırıq".

Dövlət başçımızın belə nikbin əhvali-ruhiyyədə olmasının möhkəm əsasları var. Bunu Azərbaycanın nail oduğu güclü mövqe - inkişafda olan iqtisadiyyatımız, hərbi potensialımız, daxili sabitliyimiz, fəal xarici siyasətimiz, dünyada artan imicimiz şərtləndirir. Azərbaycan ordusunun və iqtisadiyyatının qüdrətlənməsi, şübhəsiz ki, Ermənistan tərəfi çox narahat edir. Çünki bizim ardıcıl inkişafımızın əksinə olaraq Ermənistan tənəzzül içərisindədir. Daxili böhran, iqtisadiyyatın iflic vəziyyətə düşməsi, iri iqtisadi layihələrdən kənarda qalması, qonşularla pis münasibət, beynəlxalq ictimaiyyətin Ermənistanı təcavüzkar kimi tanıması və qınaq obyektinə çevirməsi və digər amillər bu ölkəni çıxılmaz vəziyyətə salıb. Bu ilin mart hadisələri və müxalifətlə hökumət arasında baş verən qalmaqallar insan hüquqlarının kobudcasına pozulduğu işğalçı dövlətin mənfi imicini formalaşdırıb. BMT-nin məlum dörd qətnaməsini qulaqardına vuran nüfuzlu beynəlxalq təşkilatların tələblərinə əməl etməyən, xalqların dinc-yanaşı yaşamaq prinsipini pozan Ermənistan təcavüzkar siyasəti ilə özünü beynəlxalq aləmdən təcrid vəziyyətinə salıb.

Son vaxtlar yersiz inadcıllıqla heç nəyə nail ola bilmədiklərini anlayan Ermənistan rəhbərlərinin mövqelərindəki "yumşalma" ondan xəbər verir ki, onlar Dağlıq Qarabağla bağlı ölkələrində yaranmış böhrandan yaxa qurtarmağa və qonşu dövlətlərlə münasibətləri bərpa etməyə çalışırlar. Rusiya Federasiyasının prezidenti Dmitri Medvedevin iştirakı ilə Azərbaycan və Ermənistan prezidentlərinin imzaladıqları Moskva Bəyannaməsi fikrimizə sübutdur. Türkiyə ilə sərhədlərin açılmasına can atan ermənilər məkrli xislətlərinə sadiq qalaraq təcavüzkar niyyətlərindən əl çəkmək istəmirlər. Onlar Azərbaycan torpaqlarındakı işğalçı qüvvələrini hələ də çıxarmır, hər hansı güzəşt qoparmaq niyyəti güdürlər.

Keçən illərin nəticəsi aydın göstərir ki, əgər Ermənistan itirə-itirə gedirsə, Azərbaycan qazana-qaza gəlir. Bu mövzuya toxunan Prezident İlham Əliyev demişdir: "Danışıqlar prosesində Azərbaycanın mövqeyi, Azərbaycanın baxışları və bizim tərəfimizdən irəli sürülmüş əsas təməl prinsiplər çox böyük dəyər qazanmışdır. Bu gün deyə bilərəm ki, danışıqların mahiyyəti Azərbaycanın ərazi bütövlüyü əsasında aparılır ki, bu, heç kimdə şübhə yaratmır və yarada da bilməz".

Göründüyü kimi, Azərbaycanın mövqeyi aydın, qəti və möhkəmdir - Dağlıq Qarabağ problemi beynəlxalq hüquq normalarına uyğun həll olunmalı, ədalət bərpa edilməli, bir milyondan çox haqqı-hüququ tapdanan soydaşımız öz evinə, yurduna qayıtmalıdır.

İndi reallıq ondan ibarətdir ki, Ermənistan heç bir sahədə rəqabət aparmaq gücünə malik deyil. Deməliyik ki, tarix özü Ermənistanı Dağlıq Qarabağ probleminin həllinə məcbur edir. Əlbəttə, belə də olmalıdır, tarix boyu işğalçılar sonda məğlub duruma düşüblər, rüsvayçı məğlubiyyətlə meydanı tərk ediblər. Belə aqibət Ermənistanı da gözləyir və o gün çox da uzaqda deyil.

İlyasov V.

Respublika.- 2008.- 24 dekabr.- S.1.