Uğurlu il, böyük perspektivlər

Müstəqillik yolunda inamla addımlayan respublikamızın dinamik inkişafında əsaslı rolu olan 2008-ci il özünün bir çox tarixi hadisələri ilə yadda qalacaqdır. İqtisadi artım tempinə görə dünyada lider mövqeyini qoruyub saxlayan Azərbaycanda iqtisadiyyatın inkişafı uğurla davam etdirilmişdir. Sosial sahədə aparılan islahatlar da sevindiricidir. Əmək haqları, pensiya və müavinətlər bir neçə dəfə artırılıb, müasir infrastruktur layihələri həyata keçirilib. Yeni sənaye və emal müəssisələri, müasir təhsil, səhiyyə və digər xidmət obyektləri, olimpiya idman kompleksləri tikilib istifadəyə verilib. Qərb standartlarına uyğun magistral yollar, körpülər salınıb. Nəqliyyat, energetika, tikinti və digər sahələri əhatə edən infrastruktur layihələri uğurla icra olunur.

2008-ci ilin ən böyük hadisəsi ölkədə prezident seçkilərinin keçirilməsi olmuşdur. Bu seçki şəffaf, demokratik şəkildə aparılmış, Azərbaycan xalqı yekdillik nümayiş etdirərək cənab İlham Əliyevi ikinci dəfə Prezident seçmişdir.

Məlumdur ki, neft sənayesi özünün inkişaf mərhələsindədir və bununla yanaşı, qeyri-neft sektorunun inkişafı da ön plandadır. Qeyri-neft sektorunda əsas məsələlərdən biri iqtisadiyyatın diversifikasiyasını təmin etməkdir. Bu o deməkdir ki, ənənəvi olaraq məlum sahələr neft gəlirləri əsasında inkişaf etməlidir. Bunlar ərzaq təhlükəsizliyi, yüngül sənaye və turizm sahələridir.

15 ilə yaxın bir müddətdə fəaliyyət göstərən ASPİ bu və digər məsələlərin həlli ilə bağlı bir çox mühüm layihələri həyata keçirmişdir. Əsas diqqəti regionların və özəl sektorun inkişafına yönəldən şirkət son vaxtlar Dövlət Əmlakının İdarə Olunması üzrə Dövlət Komitəsi ilə birgə işləyir. Artıq 2 ildir ki, mütəmadi olaraq respublikanın bütün regionlarında kiçik və orta özəlləşdirilmiş müəssisələrdə işçi seminarlar, treninqlər keçirilmişdir. Azərbaycanda istehsalçıların texnoloji cəhətdən yeniləşmə imkanlarını artırmaq üçün xaricdə biznesturlar təşkil edilmiş, yeni avadanlıqların ölkəmizə gətirilməsi istiqamətində işlər görülmüşdür.

İlin yekunu Azərbaycanda tekstil sənayesinin inkişafına dair layihələrin müvəffəqiyyətlə həyata keçirilməsi ilə yadda qalacaqdır. Bu layihə çərçivəsində özəlləşmiş 12 müəssisə üçün inkişaf strategiyaları hazırlanmış, onların reklam və marketinq imkanları genişləndirilmişdir. Eyni zamanda müəssisələrin internet səhifələri, bukletlər, mühasibat uçotunda beynəlxalq standartlar tətbiq olunmuş və texnoloji yeniləşmə və investisiya cəlb olunması məqsədilə Türkiyənin ən qabaqcıl istehsalçıları ilə işgüzar əlaqələr qurulmuşdur.

Məmmədzadə İ.

Respublika.- 2008.- 27 dekabr.- S.5.