Onlar bizim gələcəyimizdir

Bəşəriyyət bütün dövrlərdə, bütün zamanlarda sabahını, gələcəyini gəncliyə həvalə edib. Gənclik inkişaf, gənclik ümid, yenilik deməkdir. Xalqımızın müqəddəratı da onun ən qiymətli sərvəti olan gəncliyin əlindədir. Bu gün ölkə əhalisinin təxminən 30 faizini təşkil edən gəncliyin xoşbəxt olması üçün gənclərə göstərilən dövlət qayğısı daha da artırılır. Onların sosial-iqtisadi problemlərinin həlli sahəsində nəzərəçarpacaq işlər görülür. Öndə gedən gəncliyimizin bacarıqlarını göstərməsində, yüksək təhsil almasında, elm və təhsil sahəsində təşəbbüslərinin reallaşmasında bu qayğı daim hiss olunmaqdadır. Bu gün respublikamızın gəncləri qurub-yaratmaq əzmi ilə uğurlu addımlar atır. Belə gənclərdən biri də Kəmalə Məmmədovadır.

1998-ci ildə Azərbaycan Sənaye İnstitutunun "İnformatika və hesablama texnikası" ixtisasını bitirdikdən sonra, 2003-2004-cü illərdə ABŞ-ın İqtisadi Təhsil üzrə Milli Şurasının birillik "İqtisadi Təhsilin əsasları Proqramı" çərçivəsində təhsil alan Kəmalə Məmmədova istedadlı gənclərin üzə çıxarılması, onların qabiliyyətlərinin inkişaf etdirilməsi, gənclərin beynəlxalq əməkdaşlığının genişləndirilməsi, sahibkarlıq fəaliyyətinin dəstəklənməsi sahəsində nailiyyətlər əldə etmişdir. Müxtəlif beynəlxalq təhsil proqramlarında işləyən K.Məmmədova hazırda SİFE proqramının Azərbaycan üzrə direktoru vəzifəsində çalışır. 2005-ci ildən Azərbaycanda fəaliyyətə başlayan bu nümayəndəlikdə birləşən gənlərimiz bir sıra xarici ölkələrdə Azərbaycanı layiqincə təmsil edərək çempionatların ən yaxşı iştirakçıları adını qazanmışlar.

Kəmalə xanımdan bu proqramın mahiyyəti barədə ətraflı məlumat verməsini xahiş etdik. O, belə cavab verdi ki, SİFE-yəni Azad Sahibkarlıqda Beynəlxalq Tələbə Təşkilatı 1975-ci ildə ABŞ-da yaradılıb. 2005-ci ildə isə təşkilatın Azərbaycanda nümayəndəliyi yaradıldı.

Təşkilat azad sahibkarlığın nəzəri və praktik biliklərini öyrətməklə tələbələrə dünyanı dəyişdirmək, liderliyi inkişaf etdirmək, komanda və kommunikativ bilik və bacarıqları əldə etməkdə yardımçı olur, onlara arzularını həyata keçirməyə köməklik edir. Daha dəqiq desək, layihənin mahiyyəti tələbələrin sahibkarlıq fəaliyyətində, iqtisadiyyat, biznes və menecment sferasında öz tədris-praktika layihələrini reallaşdırmağa yardım etməkdən ibarətdir. Təşkilat üzvləri biliklərini tələbələrlə bölüşərək müxtəlif təhsil və informasiya proqramlarının, biznes kurslarının təşkil olunması və digər layihələri həyata keçirir. Belə ki, unversitet və institut tələbələri arasında komandalar yaradır, təşkilatımızda hazırlanan müsabiqələrə dəvət edirik. Müsabiqədə hər bir komanda biznes, təhsil və sosial istiqamətlərdə layihələr hazırlayır və münsiflər heyətinə təqdim edirlər. Münsiflərin rəyi ilə qalib komanda seçilir və dünya çempionatında iştirak etmək üçün ABŞ-a göndərilir. Kəmalə xanım onu da qeyd etdi ki, münsiflər heyətinə Dövlət Neft Şirkəti, Meqaholdinq və Nurgün şirkətlər qrupu, Azərqazbank, Embowood və b. şirkətlərin rəhbərləri dəvət olunurlar. Elə hallar da olur ki, komandanın üzvləri təqdim etdikləri layihələrə görə həmin şirkətlər tərəfindən işə dəvət olunur, gələcək həyatlarında böyük perspektivlər qazanır və təşkilati biliklərə sahib olaraq geniş imkanlar qazanırlar. Bir də ki, bu çempionatların keçirilməsində əsas məqsədimiz Azərbaycanın iqtisadi potensialının gücləndirilməsində gənclərin rolunu artırmaq, gənclərin sahibkarlı fəaliyyətini stimullaşdırmaq, azad sahibkarlığın ideyasını tələbələr arasında təbliğ etmək, tələbələrin təşkilatçılıq, idarəçilik və komandada işləmək qabiliyyətini inkişaf etdirməkdən ibarətdir. Bir sözlə, dünyada baş verən yenilikləri Azərbaycan gənclərinə çatdırmaq istəyirik.

Doğrudur, SİFE proqramı Azərbaycanda yenicə tətbiq olunduğuna görə çətinliklərimiz, problemlərimiz də var. Ancaq bütün bunlara baxmayaraq gənclərimiz xaricdə Azərbaycanı uğurla təmsil edirlər. Bu sahədə bizə maliyyə dəstəyi göstərən Azərbaycan Gənclər və İdman Nazirliyinə, Rabitə və İnformasiya Texnologiyaları Nazirliyinə təşkilatımız adından dərin təşəkkürümüzü bildirirəm. İnanıram ki, gənclərimiz dövlətimizin daha güclü və möhkəm olmasına bundan sonra da öz layiqli töhfələrini verəcəklər.

Mehparə ƏLİYEVA,

Respublika.- 2009.- 1 fevral.- S. 4.