Energetika

Texniki dəyişikliklər səmərə verir

Cənubi Qafqazda lider dövlətə çevrilən Azərbaycanda son illər digər sahələrdə olduğu kimi, energetika sektorunda da müsbət dəyişikliklər baş vermiş, əhalinin keyfiyyətli və fasiləsiz elektrik enerjisi ilə təmin edilməsi müasir tələblər səviyyəsinə qaldırılmışdır. "Bakıelektrikşəbəkə" ASC fəaliyyətə başladığı dövrdə paytaxtımızda, eləcə də Bakıətrafı qəsəbə və kəndlərdə bir sıra texniki dəyişikliklər aparılmış, neqativ hallar qətiyyətlə aradan qaldırılmış, ən başlıcası, enerji haqlarının yığılmasında mühüm irəliləyişə nail olunmuşdur. Bəs bu sahədə Qaradağ rayonunda hansı işlər görülmüşdür? Əməkdaşımız bu məqsədlə rayon enerji təchizatı və satışı idarəsinin rəisi Rafiq Əliyevə müraciət etmişdir. Müsahibimiz söhbət əsnasında əldə olunan uğurlu nəticələrdən və qarşıda duran vəzifələrdən danışaraq dedi:

—Qaradağ rayonu geniş əraziyə malikdir. Prezident İlham Əliyevin tövsiyə və göstərişlərinə uyğun olaraq inkişaf investisiya proqramı hazırlanmış, bütün qüvvələr energetika sektorunun inkişafına yönəldilmişdir. Vurğulamaq lazımdır ki, idarəmizin kollektivi 2008-ci ili zəfərlə yekunlaşdırmışlar. Rayonun ərazisində hazırda əhali sektorunda 24757, qeyri-əhali sektorunda isə 3181 abonent vardır. Əhali arasında geniş maarifləndirmə işi aparıldığından sayğaclara müdaxilə olunması halları minimum həddə endirilmişdir. Qış aylarında enerji təchizatında fasilələrə yol verilmir, çalışırıq ki, müxtəlif qızdırıcı qurğulardan istifadə olunmasının qarşısı alınsın.

2007-ci ildə əhalidən 2 milyon 150 min manatlıq enerji pulu toplandığı halda, 2008-ci ildə bu rəqəm artaraq 3 milyon 416 min manata çatdırılmışdır. Bu irəliləyiş, ilk növbədə rayon icra hakimiyyətinin energetiklərimizə göstərdiyi qayğı və diqqətin, aparılan texniki dəyişikliklərin nəticəsidir.

Daxili imkanlardan rasional istifadə olunduğundan yola saldığımız 2008-ci ildə rayonun ərazisində 2 yeni transformator tikilmiş, yeni 10 ədəd komplekt transformator məntəqəsi inşa edilmiş, 16 transformator daha güclüsü ilə əvəz olunmuş, 20 ədəd vakuum və yağ açarları dəyişdirilmişdir. Həmçinin digər texniki dəyişikliklər də aparılmış, alçaq gərginlikli 18868 metr hava xətləri, yüksək gərginlikli 6100 metr hava xətləri, alçaq gərginlikli 4 min metr kabel xətləri, yüksək gərginlikli 2300 metr kabel xətləri dəyişdirilmiş, Lökbatan qəsəbəsində 70, Buta qəsəbəsində isə 100 faiz SİP-lə kabelləşmişdir.

Keçən il abonent etirazları komissiyası öz fəaliyyətini daha da genişləndirmiş, abonentlərin bir sıra ərizə və şikayətləri vaxtında öz müsbət həllini tapmışdır.

R.Əliyev söhbətini davam etdirərək bildirdi ki, idarənin kollektivi 2009-cu ildə daha yüksək templə işləyir.

Nəzərdə tutulmuşdur ki, çoxmərtəbəli binalarda sayğaclaşdırma işi tam başa çatdırılsın, Qızıldaş, Şanqar, Qobustan və digər ərazilərdə sipləşmə işləri aparılsın. Şübhəsiz ki, bu texniki dəyişikliklər yığım faizinin maksimum həddə çatdırılmasına imkan verəcəkdir.

Qədir ASLAN,

Respublika.- 2009.- 8 fevral.- S. 6.