“Cücələrim”in yubiley gecəsi

Azərbaycan Respublikasının Prezidenti cənab İlham Əliyevin sərəncamı ilə 2009-cu il ölkəmizdə Uşaq ili elan olunmuşdur. Uşaq ili çərçivəsində Azərbaycan Dövlət Muğam Teatrında məşhur "Cücələrim" mahnısının yaranmasının 60 illiyinə həsr olunmuş yubiley gecəsi keçirilib.

Bəstəkar Qənbər Hüseynli və şair Tofiq Mütəllibova məxsus bu mahnı ilk dəfə Gəncə şəhərində uşaq xorunun ifasında səslənib. Onun ilk ifaçısı Arif Qazıyev olub. 1950-60-cı illərdə Bakı pioner və məktəblilər sarayının (indiki T.İsmayılov adına Respublika Uşaq və Gənclər Yaradıcılıq Sarayı) "Cücələrim" ansamblının şöhrəti Azərbaycandan başlayaraq dünyanın bir çox ölkələrinə yayılıb.

Salona toplaşanlar—elm, mədəniyyət xadimləri, incəsənət ustaları, jurnalistlər xoş ovqata bürünür, ürəklər mahnıdan riqqətə gəlir. İfaçılarla bərabər tamaşaçılar da əl çalır, uşaqlara qoşulub oxuyurlar. Simfonik orkestrin müşayiətində səslənən mahnının təsiri ilə xəyal hamını yaxın və uzaq illərə aparır. Zaman-zaman Bakı məktəblilərinin Azərbaycan dilində ifa etdiyi bu nəğmə neçə-neçə ölkələri dolaşıb. İldən-ilə "Cücələrim"i dünyanın bir çox uşaq xor kollektivləri öz ana dillərində oxuyublar. 1959-cu ilin may ayında Moskvada keçirilən II Azərbaycan ədəbiyyatı və incəsənəti ongünlüyündə ölkəmizin tanınmış musiqi kollektivləri ilə yanaşı, "Cücələrim"in çıxışı uzun illərdir ki, bizim sənədli kino salnaməmizin yaddaşında saxlanılır. "Cücələrim" ansamblı o vaxtdan Azərbaycanın musiqi şöhrətini bütün dünyaya yayıb. Ötən illər ərzində təməli qoyulmuş gözəl ənənələr bu gün də davam edir.

Yubiley gecəsində çıxış edən Teatrın direktoru, əməkdar incəsənət xadimi Arif Qazıyev dedi ki, 1948-ci ildə yaranan, ilk dəfə Gəncədə səslənən "Cücələrim" mahnısı o zaman keçmiş SSRİ məkanında və dünyanın bir çox ölkəsində geniş şöhrət qazanmışdı. Bu mahnının adı ilə Bakıda pioner və məktəblilərin "Cücələrim" ansamblı, Gəncə şəhərində "Bir mahnının muzeyi" yaradılmışdı. Sonralar bu mahnı populyar bir nəğməyə çevrilərək dünyanın və respublikamızın uşaq xor kollektivlərinin repertuarında geniş yer tutdu, dillər əzbəri oldu. Bu gün isə o zamandan xeyli müddət keçməsinə baxmayaraq, "Cücələrim"in ilk ifaçıları-sənət yollarında daha da şöhrət qazanan sənətkarlarımız-əməkdar artist Suğra Bağırzadə, Nazlı Məcnunbəyova, Hicran Hacızadə, Xuraman Talıbzadə və basqalarıdır.

Bəstəkar Oqtay Zülfüqarov, xalq şairi Nəriman Həsənzadə, akademiklər Budaq Budaqov, Vasim Məmmədəliyev, professorlar Təhsin Mütəllibov, Vidadi Xəlilov, YAP Gəncə Şəhər Qadınlar Şurasının sədri Arzu Həmzəyeva və başqaları "Cücələrim" mahnısının yaranması, bəstəkar Q.Hüseynlinin və T.Mütəllibovun yaradıcılıq yolu, mahnının dünya şöhrəti, milli-mənəvi dəyərlərimizin əhəmiyyəti haqqında söz açıb xatirələrini danışdılar.

Yubiley gecəsi Muğam Teatrının nəzdində yaradılmış "Fərhad" uşaq muğam studiyası üzvlərinin ifaçılarla birgə oxuduqları "Cücələrim" mahnısının şən və oynaq musiqisi sədaları ilə başa çatdı.

Afət Sadıqoğlu

Respublika.- 2009.- 10 fevral.- S. 6.