Xocalı Soyqırımına həsr olunmuş kitab sərgisi

Fevralın 26-da Azərbaycan Milli Elmlər Akademiyasının Mərkəzi Elmi Kitabxanasında Xocalı soyqırımının 17-ci ildönümünə həsr olunmuş sərgi açılıb.

Sərgidə Xocalı soyqırımının dəhşətli və faciəli səhifələrini əks etdirən fotoşəkillər, 120-yə yaxın müxtəlif dillərdə kitab və jurnallar nümayiş etdirilir.

Sərgi-mitinqi Mərkəzi Elmi Kitabxananın elmi işlər üzrə direktor müavini Firəngiz Hüseynova açmış və demişdir ki, Xocalı hadisəsi Azərbaycanın tarixində ən qanlı səhifə, bəşər tarixində insanlıq əleyhinə törədilmiş ən ağır cinayətlərdən biridir. 1992-ci il fevralın 25-dən 26-na keçən gecə baş vermiş bu faciə Azərbaycan xalqına qarşı həyata keçirilən soyqırım idi. Bütün bu erməni vəhşilikləri oxucuların nəzərinə çatdırılan kitablarda öz əksini tapmışdır.

Təqdim olunan nəşrlərin arasında AMEA İnsan Hüquqları üzrə Elmi-Tədqiqat İnstitutunun direktoru, mərhum professor Rövşən Mustafayevin redaktəsi ilə hazırlanmış "Erməni terror və quldur birləşmələrinin bəşəriyyətə qarşı cinayətləri (XIX-XXI əsrlər)" müxtəsər xronoloji ensiklopediyası, V.Arzumanlı və X.Baxşəliyevanın "Türk dünyası və "Böyük Ermənistan" xülyası", Səriyyə Müslümqızının "Qar üstünə qan yağdı", "Ümid olmasa ölərəm" (ingilis dilində), "Ölümündən o yandakı Xocalı", İsmət Qayıbov və Azad Şərifovun "Erməni terrorizmi", Nəsiman Yaqublunun "Xocalı qırğını", Fazil Güneyin "Qara qan", Tatyana Çaladzenin "Sostradaniye", Ziyyəddin Sultanovun "Xocalı faciəsi", Həvva Məmmədovanın "Şəhidlər və şahidlər" (Erməni terrorizmi beynəlxalq terrorizmin tərkib hissəsi kimi)", Sabir Əsədov və İsrafil Məmmədovun "Terrorizm (səbəb və nəticələri)", Sabir Hüseynovun "Xocalıdan gələn səs" və İstanbul Araşdırma Mərkəzi tərəfindən nəşr olunmuş "Katliam" və s. kitablar, eləcə də "Qolos Karabaxa" qəzeti var.

Sərgidə Azərbaycanın Milli Qəhrəmanı, mərhum jurnalist Çingiz Mustafayevin çəkdiyi lentlərdən götürülmüş fotoşəkillər ənənəvi və virtual şəkildə nümayiş etdirilir.

İsmət SƏFƏROV

Respublika.- 2009.- 28 fevral.- S. 5.