İlham Əliyev: Azərbaycanın iqtisadi inkişafı dünyada ən sürətlidir

Dövlətimizin başçısı Bərdədə, Yevlax və Mingəçevir ictimaiyyətinin nümayəndələri ilə görüşlərində bölgələrdə yaşayan insanların rifahının yaxşılaşdırılması üçün bütün tədbirlərin görüldüyünü vurğulayıb

Azərbaycanda iqtisadi və siyasi islahatlar uğurla davam etdirilir. Beş il bundan əvvəl "Azərbaycan Respublikası regionlarının sosial-iqtisadi inkişafı Dövlət Proqramı"nın təsdiqi, 2004-cü ilin fevral ayında proqramın icrasına başlanması və uğurla həyata keçirilməsi ölkəmizin davamlı iqtisadi inkişafını təmin edib. Son beş ildə ölkəmizin bütün bölgələrində yeni müəssisələr, fabriklər və zavodlar açılır, yeni məktəblər, müalicə-diaqnostika mərkəzləri tikilir, yollar salınır, su, qaz xətləri çəkilir, elektrik stansiyaları inşa edilir, hava limanları, mehmanxanalar və müxtəlif xidmət sahələri istifadəyə verilir. Bu, Azərbaycanın ümumi inkişafının təzahürüdür. Prezident İlham Əliyev Bərdə, Yevlax və Mingəçevir ictimaiyyətinin nümayəndələri ilə görüşlərində ölkəmizin inkişafının çox dinamik, çox müsbət və hərtərəfli olduğunu vurğulayıb.

Ötən müddət ərzində həm regionların sosial-iqtisadi inkişaf proqramının, həm də digər proqramların icrası ölkə iqtisadiyyatının sürətli inkişafına güclü təkan verib. Belə ki, son beş ildə Azərbaycan iqtisadiyyatı 2,6 dəfə artmışdır. Adambaşına düşən gəlir 5500 dollara çatmışdır. Azərbaycanda sənaye istehsalı 2,5 dəfə artmışdır və bununla yanaşı, sənayeləşmə prosesi çox geniş vüsət almışdır. Nəticədə, 766 min yeni iş yeri açılmışdır ki, bunun da 547 mini daimidir. Yoxsulluğun səviyyəsi kəskin şəkildə azalmış, 49 faizdən 13 faizə düşmüşdür. Aparılan uğurlu iqtisadi islahatlar nəticəsində büdcə xərcləri 12 dəfədən çox artmışdır. İndi ölkəmizin valyuta ehtiyatları 18 milyard dollardan çoxdur. Bu statistik göstəricilər böyük uğurlardan xəbər verir.

Son beş ildə regionların sosial-iqtisadi inkişafı Dövlət Proqramı çərçivəsində bütün bölgələrdə olduğu kimi, Bərdə, Yevlax və Mingəçevirdə də mühüm işlər görülüb, abadlıq-quruculuq, tikinti işləri aparılıb, infrastruktur yeniləşdirilib, sosial problemlər tədricən aradan qaldırılıb.

Yevlax şəhərində uşaq xəstəxanasının açılışında iştirak edən Prezident İlham Əliyev bildirib ki, bu, mənim Yevlaxa üçüncü səfərimdir, çox şadam ki, son illər ərzində Yevlaxda nəinki gördüyümüz bu dəyişikliklər baş verib, eyni zamanda rayonun iqtisadi potensialı möhkəmlənibdir: "Yevlaxda son beş ildə ümumi daxili məhsul bir neçə dəfə, 3-4 dəfə artıbdır. Bu, onu göstərir ki, burada görülən işlər, aparılan islahatlar, quruculuq çox yüksək səviyyədədir. Azərbaycanın hərtərəfli inkişafı üçün iqtisadiyyatın bütün sahələri inkişaf etməlidir. Azərbaycanın iqtisadi inkişafı dünyada ən sürətlidir. Son beş ildə bizimlə bu sahədə rəqabət aparmaq qabiliyyətində olan başqa ölkə yoxdur".

Məlumat üçün bildirək ki, ötən illər ərzində Yevlaxda rəqabətə davamlı məhsul buraxan iri istehsal müəssisələri yaradılmışdır. 2008-ci ildə istehsal edilmiş 12 milyon 300 min manatlıq sənaye məhsulunun 6,6 milyon manatlığı ixrac olunmuşdur. 67 milyon manatlıq kənd təsərrüfatı məhsulları istehsal olunmuşdur. Son beş ildə 12 mindən çox, o cümlədən 6272 daimi iş yeri açılmışdır. 2008-ci ildə bütün maliyyə mənbələri hesabına kapital qoyuluşunun həcmi 151,9 milyon manat olmuşdur. 2004-2008-ci illərdə 954 layihə həyata keçirilmiş, əhalinin təbii qaz və elektrik enerjisinə olan tələbatını ödəmək istiqamətində mühüm işlər görülmüş, təhsil və səhiyyə obyektləri tikilmişdir.

Bərdə şəhərində Müalicə-Diaqnostika Mərkəzinin açılışında iştirak edən dövlətimizin başçısı İlham Əliyev bu mərkəzin həm Bərdə sakinlərinə, həm də qonşu rayonlarda yaşayan insanlara ən yüksək səviyyədə xidmət göstərəcəyinə əminliyini ifadə edib. Cənab İlham Əliyev Bərdədə həm sosial infrastrukturun, həm də sənaye infrastrukturunun yaradılması prosesinin çox sürətlə getdiyini vurğulayıb: "Bərdə Azərbaycanın qədim şəhəridir, qədim torpağıdır və mən çox istəyirəm ki, burada bütün sahələrdə işlər yaxşı getsin. İnsanlar daha da yaxşı yaşasınlar, ən müasir infrastruktur obyektləri tikilsin, insanlara xidmət göstərən bütün müəssisələr yüksək səviyyədə olsun".

Qeyd edək ki, Müalicə-Diaqnostika Mərkəzində 260 nəfər çalışacaqdır. Bu tibb ocağında qəbul, şüa diaqnostikası, hemodializ, anesteziologiya, reanimasiya, konsultativ diaqnostik poliklinika şöbələri, əməliyyat bloku vardır.

Bundan əlavə, mərkəzdə 150 yerlik konfrans salonu, əczaxana fəaliyyət göstərir. Quraşdırılmış monitorun köməyi ilə 4 cərrahiyyə otağında aparılan əməliyyatları birbaşa izləmək mümkün olacaqdır. Buradakı avadanlıq Almaniya, Yaponiya və digər inkişaf etmiş ölkələrdən gətirilmişdir. Mərkəzdə tibbi xidmət və müalicə tam pulsuz aparılacaq.

Bölgələrin hərtərəfli inkişafı Mingəçevir şəhərinin timsalında da özünü göstərir. 2003-cü ilə nisbətən 2008-ci ildə ümumi məhsul istehsalının həcmi 1,7 dəfə artaraq 275 milyon manata, o cümlədən sənaye məhsulunun həcmi 1,3 dəfə artaraq 192 milyon manata çatmışdır. Əsas kapitala yönəldilən investisiyalar 29 dəfə artaraq 41,3 milyon manat, tikinti-quraşdırma işlərinin həcmi 26 dəfə artaraq 34,2 milyon manat təşkil etmişdir.

Azərbaycanın digər bölgələri kimi, Mingəçevirin də sürətlə inkişaf etdiyini bildirən Prezident İlham Əliyev vurğulayıb ki, bundan sonra da Mingəçevir şəhərinin gözəl tarixini, Azərbaycan üçün strateji şəhər olduğunu nəzərə alaraq, ona xüsusi diqqət göstəriləcəkdir.

Hazırda bölgələrdə həm sosial infrastrukturun, həm də sənaye infrastrukturunun yaradılması prosesi çox sürətlə gedir. Dövlətimizin başçısının Bərdə, Yevlax və Mingəçevirə səfəri bir daha təsdiqləyir ki, cənab İlham Əliyev hər bir bölgənin, hər bir regionun inkişafına xüsusi diqqət yetirir.

Ş.ƏLİZADƏ,

Respublika.- 2009.- 8 mart.- S. 1.