Azərbaycanda sahibkarlığın inkişafına çox böyük dəstək var

Prezident İlham Əliyev sahibkarlığın inkişafı üçün gələcəkdə də lazımi tədbirlər görüləcəyini vurğulayıb

Azərbaycan beynəlxalq aləmdə dinamik iqtisadi inkişafa malik ölkə kimi tanınır. Ölkəmiz maliyyə qurumlarının hesabatlarında investisiya cəlbediciliyi baxımından da öndədir. Azərbaycanla iqtisadi ticarət əməkdaşlığında maraqlı olan dövlətlərin sayının artması da fikrimizi bir daha təsdiqləyir. Bu gün Azərbaycanın 140-dan artıq dövlətlə ticarət əlaqəsi mövcuddur.

Ölkə iqtisadiyyatında mühüm rolu olan sahibkarlığın inkişafı üçün əlverişli biznes mühiti yaradılıb. Bazar iqtisadiyyatının əsas aparıcı qüvvəsi olan sahibkarlığın inkişafı daim dövlətin diqqətindədir. Son illər bu sahədə çox böyük irəliləyiş əldə edildiyini, sahibkarlıqla məşğul olmaq üçün prosedur qaydalarının tamamilə sadələşdirildiyini vurğulayan dövlətimizin başçısı İlham Əliyev bildirib ki, "Bir pəncərə" prinsipinin tətbiqi bu sahədə demək olar ki, böyük dönüşdur: "... və deyə bilərəm ki dövlət tərəfindən və Prezident tərəfindən sahibkarlığın inkişafına çox böyük dəstək var".

Məlumat üçün bildirək ki, ötən beş ildə dövlət büdcəsindən sahibkarlığın inkişafına ayrılan vəsaitin həcmi ilbəil artıb. Sahibkarlığa Kömək Milli Fondu vasitəsilə 7 min investisiya layihəsinə 324 milyon manat kredit verilmişdir. Bu layihələrin 87 faizi, kreditlərin isə 70 faizi regionların payına düşür. Təkcə 2008-ci ildə 7350 sahibkar subyektinin təqdim etdiyi layihələr maliyyələşdirilib. ÜDM-də özəl sektorun payının ötən il 84,5 faiz təşkil etməsi dövlətin bu sahənin inkişafına göstərdiyi diqqətin bariz nümunəsidir. Ötən il ərzində ÜDM-in real artımı 10,8 faiz, o cümlədən neft sektoru üzrə 7 faiz, qeyri-neft sektoru üzrə isə 15,7 faiz olub.

Bu gün Azərbaycanın özəl sektoru öz məhsulları ilə nəinki daxili bazarı təmin edir, eyni zamanda bu məhsulların ixrac potensialı da ilbəil artır. Azərbaycan məhsulları dünya standartları səviyyəsindədir və beynəlxalq sertifikatlara malikdir. Emal müəssisələrinin fəaliyyəti də genişdir. Bu gün ölkəmizdə bölgənin ən böyük emal müəssisələri var və yeniləri də yaradılır. Məsələn, Biləsuvar süd emalı zavodu öz çoxçeşidli məhsulları ilə nəinki ölkəmizi, həm də bütün bölgəni təmin edəcəkdir. Yaxud İmişli şəkər zavodu Azərbaycanın tələbatını tam ödəməklə, xarici ölkələrə də məhsul ixrac edir.

Sahibkarlığın inkişafı üçün gələcəkdə də lazımi tədbirlərin görüləcəyini vurğulayan cənab İlham Əliyev bildirib ki, bu il Sahibkarlığa Kömək Milli Fondu tərəfındən veriləcək kreditlərin həcmi artırılacaqdır: "Son dövrdə hər il 100 milyon dollar səviyyəsində vəsait ayrılırdı. Bu il daha da çox həcmdə ayrılacaqdır. Çünki əvvəlki illərdə verilən kreditlər qayıtmağa başlayıbdır. Bu da çox vacibdir. Yəni sahibkarlar əksər hallarda kreditlərdən səmərəli istifadə ediblər və o kreditlər qayıdır, qayıtdıqca yenidən iqtisadiyyatın inkişafı üçün kreditlər şəklində güzəştli şərtlərlə sahibkarlara veriləcəkdir".

Beynəlxalq Valyuta Fondunun və Dünya Bankının hesabatlarında ölkəmizdə həyata keçirilən sistemli iqtisadi islahatlar və 2009-cu il üçün Azərbaycanın inkişaf perspektivləri, hazırlanmış büdcə sənədləri, dünya maliyyə böhranının ölkə iqtisadiyyatına təsirinin qarşısının alınması ilə bağlı görülən tədbirlər müsbət qiymətləndirilib.

Azərbaycan iqtisadiyyatına qoyulan sərmayələrin həcmi də ekspertlərin gəldiyi qənaətlərin doğruluğunu təsdiqləyir. Belə ki, son beş ildə iqtisadiyyata qoyulan investisiyaların həcmi 38 milyard manat təşkil etmişdir. Bunun 16 milyard manatı daxili, 22 milyard manatı isə xarici investisiyalar olmuşdur. Çox müsbət haldır ki, 2003-cü ildə daxili sərmayələrin payı 25 faiz olduğu halda, 2008-ci ildə bu göstərici 75 faiz təşkil etmişdir.

Qeyri-neft sektoruna qoyulan sərmayələr son beş ildə 6,2 dəfə artıb. Bu müddətdə onun xüsusi çəkisi 2003-cü ildə 26,8 faizdən, 2008-ci ildə 69 faizdən artıq olub. Bu da onu göstərir ki, iqtisadiyyatın şaxələndirilməsi və qeyri-neft sektorunun inkişafı istiqamətində çox mühüm tədbirlər həyata keçirilir.

Azərbaycan dövlətinin son beş ildə bölgələrə çox böyük sərmayə qoyduğuna böyük önəm verən cənab İlham Əliyev bildirib ki, bununla bərabər, özəl sektorun inkişafı üçün böyük həcmdə kreditlər, güzəştli şərtlərlə kreditlər ayrılmışdır, sahibkarlığın inkişafına böyük dəstək verilmişdir; həm mənəvi dəstək, həm siyasi, həm də maddi dəstək: "Yəni bütün bu amillər birləşəndə, əlbəttə ki, uğura nail olmaq mümkündür və Azərbaycanın son beş il ərzində keçdiyi yol bunun əyani sübutudur".

Hazırda dünyada dərinləşən maliyyə böhranının təsiri nəticəsində hətta bir çox aparıcı ölkələrin iqtisadiyyatında yaranan durğunluğa baxmayaraq, Azərbaycan iqtisadiyyatı inkişaf etməkdədir. Belə ki, dünya iqtisadiyyatı 2003-cü illə müqayisədə ümumilikdə 25,4 faiz, o cümlədən ABŞ-da 13,3 faiz , Avropa İttifaqında 13,7 faiz, MDB ölkələrində 45,4 faiz artdığı halda, Azərbaycan iqtisadiyyatı 2,6 dəfə artıb.

Azərbaycanın əldə etdiyi iqtisadi göstəricilər beynəlxalq ekspertlər tərəfindən dəyərləndirilir, ölkəmizin təcrübəsi yüksək nailiyyət kimi nümunə göstərilir. Son illər ərzində ölkəmizdə aparılan uğurlu iqtisadi islahatların böyük əhəmiyyət kəsb etdiyini vurğulayan cənab İlham Əliyev bildirib ki, əgər dünyanın ən birinci, ən qabaqcıl maliyyə qurumu olan Dünya Bankı Azərbaycanı 2008-ci ilin yekunlarına görə ilin bir nömrəli islahatçı ölkəsi kimi tanıyırsa və bunu bəyan edirsə, bu özü-özlüyündə göstərir ki, uğurlarımızın təməlində bizim siyasətimiz, düzgün xəttimiz və Azərbaycanda gedən müsbət proseslər dayanır.

Ş.ƏLİZADƏ,

Respublika.- 2009.- 15 mart.- S. 4.