Azərbaycan-Türkiyə Akademik Tibb Toplantısı

Bu, qastroenteroloqların fəaliyyətində yeni səhifə açacaqdır.

Dünən Azərbaycan Tibb Universitetinin konfrans zalında Azərbaycan Respublikası Prezident Aparatı, Səhiyyə Nazirliyi, Azərbaycanlıların və digər Türkdilli Xalqların Əməkdaşlıq Mərkəzi, Türkiyənin Qastroenteroloji Cəmiyyətinin, Azərbaycan Cərrahları və Qastroenteroloqlar Cəmiyyətinin və Türkiyənin "Sənovel" Şirkətinin birgə təşəbbüsü ilə Beynəlxalq Akademik Tibb Toplantısı keçirildi.

Mərasimdən öncə toplantı iştirakçıları Fəxri Xiyabanda olmuş, milli öndərimiz Heydər Əliyevin, akademik Zərifə xanım Əliyevanın məzarlarını ziyarət etmiş, ehtiram əlaməti olaraq tər qərənfillər düzmüş, həmçinin Şəhidlər Xiyabanını ziyarət etmişlər.

Toplantıda Azərbaycan və Türkiyənin dövlət himnləri səsləndirilmiş, Azərbaycanlıların və digər Türkdilli Xalqların Əməkdaşlıq Mərkəzinin sədri İlham İsmayılov mərasim iştirakçılarını salamladıqdan sonra danışıq üçün sözü Tibb Universitetinin rektoru, akademik Əhliman Əmiraslanova vermişdir.

Əhliman Əmiraslanov vurğulamışdır ki, türk xalqlarının qardaşlıq münasibətləri son illərdə daha da möhkəmlənmiş, onlar beynəlxalq aləmdə kəsərli söz sahibinə çevrilmiş, xüsusilə səhiyyə sahəsindəki yaxınlıq öz bəhrəsini vermişdir.

"Hepatitə yox deyək!" devizi altında keçirilən bu konfrans yəqin ki, gələcəkdə də öz işini davam etdirəcəkdir.

Toplantıda professor Ali Özdən, akademik Böyükkişi Ağayev, Azərbaycan Respublikası Prezidenti İcra Aparatının ictimai-siyasi şöbəsinin sektor müdiri Qafar Əliyev, professor Yusif Bayraqdar, professor, doktor Burhan Şahin, professor Ömər Özütəmiz, professor Tankut İntel və başqalarının çıxışları hamıda xoş ovqat yaratdı. Onlar çıxışlarına əsrlərlə bir-birlərinə qırılmaz tellerlə bağlı olan iki qardaş ölkənin səhiyyə işçilərinin birgə əməkdaşlığını yüksək dəyərləndirdilər və bu konfransın Azərbaycanda reallaşmasının müsbət nəticələr verəcəyinə əmin olduqlarını bildirdilər.

Natiqlər Türkiyə və Azərbaycanın tanınmış həkimləri B və S hepatitlərinin, pankreasin kistası və xərçəngin, qara ciyərin serrozunun, bağırsaqların bəzi xəstəliklərinin müasir müayinə və müalicə üsullarının, qara ciyər köçürmələrinin, endoskopik müayinənin bəzi xüsusiyyətləri və digər mövzularda çıxış etdilər. Onlar vurğuladılar ki, həzm sistemi xəstəliklərinin dünyada yayılması və onun bütün yaş qruplarını əhatə etməsi səhiyyə sahəsində narahatlıq yaratmışdır. Yəqin ki, bu kimi konfransların keçirilməsi hər iki ölkə alimlərinin təcrübəsini vahid istiqamətə yönəldəcəkdir.

Toplantını azərbaycanlıların və digər türkdilli xalqların Əməkdaşlıq Mərkəzinin Sədri İlham İsmayılov yekunlaşdıraraq türk xalqları arasında birliyin və həmrəyliyin möhkəmlənməsindən qurur hissi duyduğunu bildirdi. Qeyd etdi ki, ümumiyyətlə, bu Beynəlxalq Konfrans azərbaycanlı qastroenteroloqların fəaliyyətində yeni bir səhifə açacaqdır.

Aslan Q.

Respublika.- 2008.- 30 noyabr.- S.7.