Dövlət qulluqçularının ixtisaslı hazırlığına diqqət yüksəkdir

Müstəqil Azərbaycanın ən gənc qurumlarından biri kimi komissiyanın təşkili, strukturu, məqsəd və vəzifələri barədə nə deyə bilərsiniz?

- Azərbaycan Respublikasının Prezidenti yanında Dövlət Qulluğu Məsələləri üzrə Komissiya 2006-cı il oktyabrın 2-dən fəaliyyətə başlamışdır. Komissiyanın strukturu Azərbaycan Respublikasının Prezidenti tərəfindən təsdiq olunub və rəhbərlik, Dövlət qulluğuna kadrların seçilməsi şöbəsi, İnformasiya texnologiyaları və proqram təminatı sektoru, Hüquq sektoru, Beynəlxalq əlaqələr sektoru, Mühasibat və təsərrüfat sektoru və Dəftərxanadan ibarətdir. Komissiyanın əsas məqsədləri dövlət qulluğu sahəsində qəbul edilmiş normativ-hüquqi aktların tətbiqinin təşkil edilməsi, dövlət qulluğu üçün kadrların müsabiqə əsasında seçilməsi, yerləşdirilməsi, dövlət qulluqçularının ixtisas hazırlığının artırılması və sosial müdafiəsi sahəsində, həmçinin dövlət qulluğu ilə bağlı digər məsələlər barədə Azərbaycan Respublikasının qanunvericiliyi ilə nəzərdə tutulmuş siyasətin həyata keçirilməsini təmin etməkdən ibarətdir.

Bu məqsədlərin həyata keçirilməsi ilə əlaqədar komissiya dövlət qulluğu sahəsində vahid dövlət siyasətinin formalaşdırılmasında iştirak edir, Azərbaycan Prezidentinin və Azərbaycan Respublikasının Dövlət Qulluğunu İdarəetmə Şurasının tapşırıqlarını yerinə yetirir.

Komissiya, eləcə də dövlət qulluğu və kadr məsələləri sahəsində fəaliyyətin təkmilləşdirilməsi üçün tələb olunan normativ-hüquqi aktların layihəsini hazırlayır və Azərbaycan Respublikasının qanunvericiliyi ilə komissiyaya həvalə olunmuş digər vəzifələri yerinə yetirir.

Cənab sədr, bildiyimizə görə, Siz bu vəzifəyə Azərbaycan Prezidentinin sərəncamı ilə təyin edilmiş və necə deyərlər, təşkilatın yaradılmasına şəxsən rəhbərlik etmisiniz. Təşkilatın yaranma tarixi barədə bir qədər məlumat versəniz oxucularımız üçün maraqlı olardı.

- Respublikamızda dövlət qulluğunun daha yaxşı təşkili və idarə olunması üçün Azərbaycan Respublikasının Prezidenti cənab İlham Əliyevin 2005-ci il 19 yanvar tarixli 180 saylı fərmanı ilə Azərbaycan Respublikasının Prezidenti yanında Dövlət Qulluğu Məsələləri üzrə

Komissiya yaradılmış, iyun ayında onun Əsasnaməsi təsdiq edilmişdir. Fəaliyyətə isə komissiya 2006-cı il 2 oktyabr tarixdə başlamışdır.

Komissiyanın fəaliyyətinin mühüm istiqamətlərindən biri vətəndaşların dövlət qulluğuna qəbulunun şəffaflıq və müsabiqə əsasında keçirilməsidir. Komissiyanın bu sahədə işi üç yöndə qurulub. Birincisi, peşəkar, müasir dünyagörüşlü və yüksək təhsilli kadrların dövlət qulluğuna cəlb edilməsi məqsədilə vakant dövlət qulluğu vəzifələri barədə ictimaiyyətə dolğun məlumatın verilməsidir. İkincisi, həmin vəzifələrə qəbulun müsabiqə və şəffaflıq əsasında mərkəzləşdirilmiş qaydada keçirilməsidir. Üçüncüsü və ən əsası isə, bu sahədə aparılan dövlət siyasətinə ictimai etimadın artırılmasıdır.

Komissiyada çalışan mütəxəssislərin seçilib yerləşdirilməsini necə həyata keçirirsiniz?

- Hazırda komissiyanın 25 əməkdaşı var. Komissiyanın inzibati vəzifələrin altıncı-doqquzuncu təsnifatlarına uyğun olan vəzifələrinə əməkdaşlar qanunvericiliyə müvafiq olaraq müsabiqə əsasında qəbul edilmişlər.

- Bəhram müəllim, başçılıq etdiyiniz komissiya təhsil və kadr hazırlayan nazirlik, komitə və müəssisələrin barometri rolunu oynayır. Onların hazırladığı kadrlardan razısınızmı?

Əvvəla, qeyd etmək istərdim ki, bu gün dövlət qulluğunda çalışan vətəndaşlarımızın böyük əksəriyyəti yüksək səviyyəli mütəxəssislərdir. Onların da çoxu elə işlədikləri dövlət qurumlarında yetişmiş kadrlardır. Bununla belə, idarəetmənin yeni dövrün tələblərinə uyğunlaşdırılması məqsədilə Azərbaycan Respublikasının Prezidenti yanında Dövlət Qulluğu Məsələləri üzrə Komissiya dövlət qulluqçuları üçün müxtəlif tədbirlər həyata keçirir. Komissiya bu sahədə işini üç istiqamətdə qurub və bir sıra nüfuzlu beynəlxalq təşkilatlarla əməkdaşlıq edir.

Birincisi, dövlət orqanlarının kadr qurumları rəhbərləri üçün Bakıda treninq və təlimlər təşkil olunur. Bir qayda olaraq, bu tədbirlərdə beynəlxalq ekspertlər iştirak edir. Bu tədbirlər sırasında "Azərbaycanın korrupsiyaya qarşı mübarizə strategiyasına dəstək" (AZPAC) layihəsi çərçivəsində Avropa Şurası ilə birgə "Etik davranış qaydaları və xidməti fəaliyyətin qiymətləndirilməsi", "Etik davranış qaydalarının implementasiyası" mövzularında təşkil etdiyimiz təlimləri qeyd edə bilərik.

İkincisi, dövlət orqanlarının kadr qurumları rəhbərləri üçün xarici ölkələrdə təlim kursları təşkil edilir. Bu ilin may-iyul aylarında komissiya Almaniya Texniki Əməkdaşlıq Cəmiyyəti (GTZ) ilə birgə həyata keçirdiyi layihə çərçivəsində Litva Respublikasının paytaxtı Vilnüs şəhərində "Kadrların idarə edilməsi" mövzusunda silsilə təlim kursları təşkil etmişdir. Litva İdarəçilik İnstitutu tərəfindən keçirilən kurslarda "insan resurslarının idarəedilməsinin əsasları", "İslahatlar dövründə təşkilatın inkişafı və işçi heyətinin işinin təşkili", "İdarəetmədə rəhbərin rolu", "İnformasiya texnologiyalarının istifadəsi ilə kadrların idarəedilməsində effektivliyin artırılması" mövzuları ətrafında Litva, Azərbaycan və Avropa İttifaqı ölkələrinin təcrübəsi barədə fikir mübadiləsi aparılmışdır.

Üçüncüsü, yerli icra hakimiyyəti orqanları və mərkəzi icra hakimiyyəti orqanlarının ikili tabelikdə olan yerli bölmələrində çalışan dövlət qulluqçuları üçün regionlarda təlimlər təşkil edilir. İlk belə təlimlərimiz noyabrın əvvəllərində Gəncə və Tovuz şəhərlərində keçirilmişdir. Komissiya təlimləri Birləşmiş Millətlər Təşkilatının İnkişaf Proqramı (UNDP) ilə birgə təşkil etmişdir. Təlimlərə Goranboy, Naftalan, Xocalı, Samux, Göygöl, Kəlbəcər, Gəncə, Daşkəsən, Şəmkir, Gədəbəy, Tovuz, Ağstafa və Qazax şəhərlərinin yerli icra hakimiyyəti orqanlarında və mərkəzi icra hakimiyyəti orqanlarının yerli bölmələrində çalışan rəhbər vəzifəli dövlət qulluqçuları cəlb edilmişdir. Təlimlərdə komissiyanın əməkdaşları "Dövlət qulluqçularının etik davranış qaydaları", "Müsahibənin keçirilmə qaydaları", "Dövlət qulluqçularının vəzifə təlimatları", "Kadrların idarə edilməsinə müasir yanaşma" mövzularında çıxış etmişlər.

Bu gün dövlət qulluğuna gələn gənclərin hazırlıq səviyyəsi isə o qədər də ürəkaçan deyil. Komissiyanın apardığı araşdırmalara görə, ali məktəbləri bitirənlərin çoxu test imtahanı mərhələsini keçə bilmir. Beş müsabiqə üzrə iştirak edən bütün namizədlərin təxminən 18 faizi test imtahanı mərhələsini, 4 faizi isə həm də müsahibə mərhələsini keçə bilmişdir. Dövlət ali məktəbləri ilə müqayisədə özəl ali məktəblərin göstəriciləri çox aşağıdır. Hər iki mərhələni uğurla keçən namizədlərin orta hesabla 41 faizini Bakı Dövlət Universitetinin, 16 faizini Dövlət İqtisad Universitetinin, 8 faizini Azərbaycan Respublikasının Prezidenti yanında Dövlət İdarəçilik Akademiyasının məzunları təşkil edir. Bu sıralamada növbəti yerləri isə 6 faizlə Azərbaycan Dillər Universiteti və Milli Aviasiya Akademiyası tutur.

Seçdiyiniz kadrlar arasında gələcəyin nazirlərini, dövlət xadimlərini görürsünüzmü?

- İndiyə qədər 4 müsabiqə və 3 müsahibə keçirilmişdir. Bu müsabiqə və müsahibələrdə 5700-dən artıq namizəd iştirak etmiş və onlardan 380-dən çoxu dövlət orqanlarında müxtəlif vəzifələrə təyin olunmuşlar. Hazırda beşinci müsabiqənin müsahibə mərhələsi davam edir.

Dövlət Qulluğu Məsələləri üzrə Komissiya dövlət qulluğuna kadrların seçilməsi və yerləşdirilməsi məsələsinə xüsusi önəm verir. Biz işimizi elə qurmuşuq ki, dövlət qulluğuna gələn yeni kadrlar vətənpərvər, peşəkar, müasir dünyagörüşlü və yüksək təhsilli olsun. Dövlət orqanlarından aldığımız məlumatlara görə buna müvəffəq olmuşuq. Əgər dövlət qulluqçusu adını qazanmış bu kadrlar qanunvericiliyə uyğun olaraq öz səlahıyyət və vəzifələrini layiqincə yerinə yetirsələr, habelə Azərbaycan Respublikasının Prezidenti cənab İlham Əliyevin hər bir vəzifəli şəxs və dövlət qulluqçusunun qarşısında qoyduğu əsas tələblərə riayət etsələr, onları daim vəzifədə yüksəliş gözləyir. Bu tələblər aşağıdakılardır: xalqa və dövlətçiliyə sədaqətlə xidmət etmək, milli maraqları hər şeydən uca tutmaq, vətəndaşların müraciətlərinə diqqətli yanaşmaq, şərəfli dövlət qulluqçusu adına yaraşmayan işlərdən uzaq olmaq, təşəbbüskarlıq, problemlərin həlli üçün mövcud imkanlardan istifadə etmək və xalqa xidmətçi olmağı unutmamaq.

Müsahibəyə görə sağ olun.

İlyasov V.

Respublika.- 2008.- 30 noyabr.- S.3.