“Şüa” kompleksi sağlamlıq bəxş edir

Bakının Nərimanov rayonundakı Koroğlu Rəhimov küçəsində bir neçə ildir ki, "Şüa" İdman Sağlamlıq Kompleksi fəaliyyət göstərir. Bura demək olar ki, bütün idmançıların sevimli yerinə çevrilmişdir. Müasir tələblərə cavab verən, füsunkar ərazisi ilə diqqəti cəlb edən kompleksdə əsasən sərbəst güləş bazası yerləşir. Burada Avropa və dünya çempionları mütəmadi olaraq məşq edir, mötəbər yarışlarda uğur qazanır və müxtəlif yarışlarda fəxri kürsünün ən yüksək pilləsində dayanırlar.

Biz "Şüa" İdman Sağlamlıq Kompleksinin direktor müavini Rasim Qurbanovla söhbət edərkən o, bizi maraqlandıran məsələlərə aydınlıq gətirərək dedi:

—Vurğulamaq lazımdır ki, Prezident İlham Əliyevin qayğı və diqqəti sayəsində son illərdə Azərbaycanda idmanın müxtəlif sahələrində böyük uğurlar qazanılmış, bu sahənin inkişafı üçün dünya standartlarına cavab verən komplekslər tikilib istifadəyə verilmişdir.

"Şüa" İdman Sağlamlıq Kompleksində məşqlər həmişə yüksək səviyyədə aparılır. Bu sahəyə idman sahəsində böyük uğurlara imza atan təcrübəli məşqçilər cəlb edilmişlər.

Respublikamızın Milli Karate Federasiyası da kompleksin ərazisində yerləşir. Onlar üçün hər cür şərait yaradılmışdır.

Komleksdəki üzgüçülük hovuzunun xidmətindən idmançılar səmərəli istifadə edir və öz sağlamlıqlarını qoruyub saxlayırlar. Üzgüçülük hovuzuna gələnlər arasında paytaxtın məktəbliləri daha çox üstünlük təşkil edirlər.

"Şüa" İdman Sağlamlıq Kompleksində tədbirlər planına uyğun olaraq həmişə yaddaqalan mərasimlər keçirilir. Hər il Böyük Vətən müharibəsi veteranlarına maddi yardım göstərilir, görüşdə rəşadətli döyüş yolu keçmiş Azərbaycan oğullarının şücaətindən, qəhrəmanlığından geniş söhbət açılır.

Kompleksdə milli öndərimiz Heydər Əliyevin anım mərasiminin keçirilməsi ənənə şəklini almışdır. Keçən ilin dekabr ayında keçirilən anım tədbirində 300 nəfərdən çox Böyük Vətən müharibəsi, Qarabağ əlili olan veteranlara, həmçinin aztəminatlı ailələrə ehsan süfrəsi açılmışdır.

İdman kompleksinin ərazisində həmişə geniş quruculuq və abadlıq işləri aparılır, şübhəsiz ki, bu da idmançılarda xoş ovqat yaradır.

Rasim Qurbanov sözünə davam edərək bildirdi ki, kompleksdə 2008-ci il uğurlu nəticələrlə yekunlaşdırılmışdır. Cari ildə isə qarşıda daha əzəmətli vəzifələr durur. Çalışacağıq ki, məşqlər yüksək səviyyədə aparılsın, Azərbaycan idmançıları müxtəlif yarışlara hazırlıqla, yüksək əhval-ruhiyyə ilə yollansınlar.

Qədir Aslan

Respublika.- 2009.- 9 yanvar.- S. 6.