Bütövlükdə Azərbaycanın bugünkü inkişafını səciyyələndirərək deməliyəm ki, ölkəmiz siyasi və iqtisadi islahatlar yolu ilə inamla irəliləyir

Sabitlik, demokratiya və inkişaf müasir Azərbaycan dövlətinin rəmzidir, davamlı irəliləyişimizi, dünyadakı nüfuzumuzu şərtləndirən əsas amillərdir. Azərbaycanın zaman etibarilə çox qısa bir vaxtda keçdiyi yol, əldə etdiyi möhtəşəm nailiyyətlər dünyanın aparıcı dövlət başçılarını, nüfuzlu politoloq və iqtisadçılarını belə heyran qoyub. Başa vurduğumuz 2008-ci il bu baxımdan ölkəmiz və xalqımız üçün daha uğurlu olub, parlaq qələbələrlə yadda qalıb. Təsadüfi deyil ki, Dünya Bankı ötən il Azərbaycanı bir nömrəli islahatçı ölkə kimi tanıyıb. Bu isə Azərbaycanda aparılan ciddi, düşünülmüş iqtisadi islahatların öz bəhrəsini verdiyini, ölkəmizin dünya miqyasında çox böyük nüfuza və hörmətə malik olduğunu bir daha təsdiqləyir.

Azərbaycanın son illər sıçrayışlı inkişaf yolu keçdiyini önə çəkən Prezident İlham Əliyev deyib: "Bütövlükdə Azərbaycanın bugünkü inkişafını səciyyələndirərək deməliyəm ki, ölkəmiz siyasi və iqtisadi islahatlar yolu ilə inamla irəliləyir. İslahatlar paralel şəkildə həyata keçirilir, hüquqi dövlət qurulması, cəmiyyətin demokratikləşməsi məsələlərinə çox böyük əhəmiyyət verilir. Güclü siyasi sistem yaradılması bizim bütün gələcək uğurlarımızın rəhnidir, çünki möhkəm demokratik təsisatları olmayan heç bir cəmiyyət inkişaf edə bilməz".

Siyasi və iqtisadi islahatların paralel şəkildə inamla davam etdirilməsi, daxili və xarici siyasətin uzlaşdırılması və dövlətimizin maraqlarının təmin olunmasına, dünyaya inteqrasiya prosesinin sürətləndirilməsinə yönəldilməsi müstəqil Azərbaycan dövlətinin qüdrətini artırıb, Qərbdəki mövqelərini daha da gücləndirib.

İqtisadi və siyasi islahatlar nəticəsində ölkəmiz öz inkişafının keyfiyyətcə daha yüksək mərhələsinə qədəm qoyub. 2008-ci ildə də iqtisadiyyatımız yüksək sürətlə inkişaf etmişdir. Ötən ilin on bir ayı ərzində iqtisadi və sosial sahələrdə baş verən müsbət dəyişiklikləri əks etdirən makroiqtisadi göstəricilər də bunu təsdiqləyir və əhalinin həyat səviyyəsinin yüksəldiyini göstərir. İqtisadi və sosial tərəqqinin əsas keyfiyyət göstəricisi sayılan ümumi daxili məhsul (ÜDM) istehsalı 11,5 faiz artaraq 34.7 milyard manata çatıb. Adambaşına 4051,5 manatlıq məhsul istehsal olunub ki, bu da 2007-ci ildəkindən 10,3 faiz çoxdur.

İqtisadi və sosial sahələrin inkişafı üçün bütün maliyyə mənbələrindən əsas kapitala 8 milyard manat həcmində investisiya yönəldilib ki, bunun da 74,3 faizi daxili sərmayələrin payına düşüb. Bu, dövlətimizin iqtisadi gücünün, iqtisadi potensialının daim artmasının, yerli sahibkarlığın durmadan inkişafının əyani sübutudur. Daxili investisiya əvvəlki ilin müvafiq dövrünün səviyyəsinin 74,6 faiz üstələyib. İstifadə olunmuş investisiyaların əksəriyyəti abadlıq və tikinti-quraşdırma işlərinə sərf edilib.

Dünya Azərbaycanlılarının Həmrəyliyi Günü və Yeni il münasibətilə xalqa təbrikində Prezident İlham Əliyev ölkəmizdə iqtisadi, infrastruktur və sosial məsələlərin uğurla həll edildiyini bildirib: "Azərbaycanda iqtisadiyyatın inkişafı üçün bütün lazımi tədbirlər görülür. Dövlət sahibkarlığın inkişafını dəstəkləyir və növbəti illərdə bu dəstək daha da böyük olacaqdır. Bunun nəticəsində bu gün Azərbaycan iqtisadiyyatının 85 faizi özəl sektorda formalaşır. Bu, böyük nailiyyətdir və onu göstərir ki, Azərbaycanda siyasi və iqtisadi islahatlar ölkəmizin hərtərəfli inkişafına xidmət edir və ölkəmizi gücləndirir. Biz bundan sonrakı illərdə də iqtisadi inkişafa böyük diqqət göstərəcəyik və əminəm ki, qarşıda duran bütün vəzifələrə nail olacağıq".

Azərbaycan xarici siyasət sahəsində də son illər çox böyük uğurlara imza atıb, Avropa ailəsinin ən önəmli üzvlərindən birinə çevrilib. Dünyanın, xüsusən də Qərbin enerji təhlükəsizliyi məsələsinə Azərbaycan öz layiqli töhfələrini verməkdədir. Qlobal transmilli layihələrin reallaşması ölkəmizin dünyadakı mövqelərini daha da gücləndirib.

Bu gün Azərbaycan nefti və qazı həm ölkəmizə xidmət göstərir, həm də dünya bazarlarına çıxarılır. Odur ki, bu baxımdan da Azərbaycan dünya üçün çox mühüm ölkədir. Ötən il enerji sammitinin məhz Bakıda keçirilməsi də dünya ölkələrinin Azərbaycana verdiyi önəmin bariz nümunəsidir. Dövlətimizin başçısı İlham Əliyevin qeyd etdiyi kimi, Bakıda qəbul edilmiş qərarlar nəinki Azərbaycanın gələcək enerji siyasətini möhkəmləndirir, eyni zamanda bölgədə, Avropada, geniş mənada dünyada yeni vəziyyətə gətirib çıxarılmasına xidmət göstərəcəkdir.

Göründüyü kimi, Azərbaycanın hərtərəfli və dinamik inkişafı həm də bəşəri miqyasda böyük məna kəsb edir. Hazırda ölkəmiz bir çox dünya dövlətləri, nüfuzlu beynəlxalq təşkilatlar, Avratlantik strukturlar üçün strateji və səmərəli tərəfdaşdır. Bu baxımdan 2009-cu il Azərbaycana daha böyük siyasi və iqtisadi uğurlar vəd edir.

Xəlil Cabbarov

Respublika.- 2009.- 13 yanvar.- S. 2.