Azərbaycanın hərtərəfli inkişafı üçün ötən il çox uğurlu olmuşdur

Azərbaycanın bugünkü dinamik iqtisadi inkişafı elmi əsaslar üzərində gerçəkləşdirilən sosial-iqtisadi strategiyanın uğurla davam etdirilməsi ilə şərtlənir. Ölkəmiz hazırda nəinki Cənubi Qafqaz regionunda, bütövlükdə Avratlantik geosiyasi arealında sabitlik və iqtisadi əməkdaşlıq məsələlərində əsas söz sahiblərindən birinə çevrilmişdir. Son beş il ərzində Azərbaycanın iqtisadi tərəqqisi sürətlənmiş və yeni mərhələyə qədəm qoymuşdur.

Bu baxımdan yola saldığımız 2008-ci il Azərbaycan tarixinə iqtisadi nailiyyətlər və sosial tərəqqi ili kimi daxil olmuşdur. Dövlətimizin başçısı İlham Əliyev Dünya Azərbaycanlılarının Həmrəyliyi Günü və Yeni il münasibətilə Azərbaycan xalqına təbrikində ötən ili ölkəmizin hərtərəfli inkişafı üçün çox uğurlu il kimi dəyərləndirdi: "Ölkəmiz üçün, Azərbaycanın hərtərəfli inkişafı üçün 2008-ci il çox uğurlu olmuşdur. 2008-ci ildə bizim iqtisadiyyatımız yüksək sürətlə inkişaf etməkdə davam etmişdir. Deyə bilərəm ki, son dörd il ərzində Azərbaycan iqtisadi artım baxımından dünyada birinci ölkədir. Bu böyük nailiyyətdir və bizə imkan verir ki, bütün iqtisadi, infrastruktur və sosial məsələləri uğurla həll edək".

2008-ci ildə ən böyük maliyyə qurumu olan Dünya Bankının Azərbaycanı bir nömrəli islahatçı ölkə kimi tanıması, Birləşmiş Millətlər Təşkilatının Azərbaycan Dövlət Neft Fondunu şəffaflığa görə, şəffaflıq işində qazandığı uğurlara görə mükafatla təltif etməsi bir tərəfdən dünyanın nüfuzlu beynəlxalq təşkilatlarının Azərbaycana, Azərbaycanda gedən proseslərə verdikləri obyektiv qiymətdirsə, digər tərəfdən bu, ölkəmizin beynəlxalq aləmdə nüfuz qazanmasının və hörmətə malik olmasının göstəricisidir.

Son beş ildə ümumi daxili məhsulun 2,7 dəfə, sənaye istehsalının 2,8 dəfə, dövlət büdcəsi gəlirlərinin 10 dəfə artması, ölkə iqtisadiyyatına 44 milyard dollar məbləğində investisiya qoyulması kimi amillər Azərbaycanın iqtisadi artım baxımından dünyada lider dövlət imici qazanmasını şərtləndirən əsas faktorlar olmaqla yanaşı, ölkəmizdə aparılan ciddi və düşünülmüş islahatların məntiqi nəticəsi kimi dəyərləndirilir. Bu möhtəşəm uğurlar həm də Azərbaycanın hərtərəfli inkişafını stimullaşdırır.

İnkişaf etmiş ölkələrin təcrübəsi göstərir ki, müasir dövrdə hər bir xalqın, dövlətin gələcək taleyini təkcə onun malik olduğu zəngin təbii sərvətlər deyil, həm də elmi-mədəni və intellektual imkanları, bütün bunların fövqündə dayanan insan kapitalı müəyyənləşdirir. Buna görə də Azərbaycan öz inkişafını, sadəcə təbii sərvətlərin gətirdiyi dividendlərə bağlamır və mövcud resurslarını sırf insan faktorunun prioritetə çevrilməsi yönümündə qurur.

Dövlətimizin başçısı İlham Əliyev hələ bir neçə il öncə Bakı-Tbilisi-Ceyhan və Bakı-Tbilisi-Ərzurum neft-qaz boru kəmərlərinin ölkəmizə gətirəcəyi siyasi və iqtisadi dividendlərdən danışarkən bəyan edirdi ki, ölkəmizə böyük valyuta axını gözlənilir və bu, ilk növbədə təhsilə, səhiyyəyə, sosial sahələrə ayrılmalıdır.

Təhsil sahəsinə ayrılan büdcə vəsaitlərinin ildən-ilə artaraq 2008-ci ildə 1,1 milyard manata çatması və investisiya qoyuluşlarının isə 220 milyon manat təşkil etməsi möhtərəm Prezidentimiz İlham Əliyevin elmimizin və təhsilimizin inkişafına göstərdiyi sonsuz diqqət və qayğının bariz nümunəsidir. Məlumat üçün qeyd edək ki, indiyədək təhsil sahəsinin inkişafı ilə bağlı 14 dövlət proqramı təsdiq edilmiş, son beş ildə 1600 məktəb binası və ayrı-ayrı təhsil müəssisələri üçün əlavə korpuslar tikilmişdir. Təkcə 2008-ci ildə 300-dək yeni və yeniləşmiş məktəb istifadəyə verilmişdir. Ali təhsil sahəsində də islahatlar davam etdirilmişdir. Dövlətimizin başcısı İlham Əlivevin bir sıra ali məktəblərdə olması, Azərbaycan Tibb Universiteti üçün yeni korpusların tikilməsi, Bakı Musiqi Akademiyası binasının əsaslı təmiri, Bakı Dövlət Universitetinin yeni tədris korpuslarının istifadəyə verilməsi bu sahəyə göstərilən dövlət qayğısının əyani təzahürüdür. M.V.Lomonosov adına Moskva Dövlət Universitetinin Bakı filialının açılması da ölkəmizin təhsil həyatında çox əlamətdar hadisə olmuşdur.

Dövlətimizin başçısı İlham Əliyevin "Bizim gənclərimiz dünyanın ən tanınmış, mötəbər təhsil ocaqlarında təhsil almalı, öz biliklərini artırmalıdırlar" fikri öz xalqının xoşbəxt gələcəyini düşünən bir liderin müdrik düşüncəsindən qaynaqlanır. Axı Azərbaycanın gələcək taleyi bilikli və qabiliyyətli, müasir dünya görüşünə malik gənclərdən çox asılıdır.

Elə buna görə də möhtərəm Prezidentimiz İlham Əliyev gənclərimizin xarici ölkələrdə təhsil almasına çox böyük önəm verir, sonsuz diqqət və qayğı göstərir. Məhz bu diqqət və qayğının nəticəsidir ki, hazırda 4 min azərbaycanlı tələbə xarici ölkələrin ali məktəblərində təhsil alır. 2015-ci ilədək müvafiq Dövlət Proqramına əsasən 5 min azərbaycanlı gənc xaricdə təhsil alacaqdır.

Təhsil işçilərinin əmək haqlarının 50 faiz artırılması ali məktəblərdə qəbul imtahanlarında yüksək bal toplayan 100 tələbəyə Prezident təqaüdünün verilməsi dövlətimizin başçısı İlham Əliyevin təhsili priotet sahə hesab etməsindən irəli gəlir.

2008-ci ilin ən yaddaqalan hadisələrindən biri də regionların sosial-iqtisadi inkişafı Dövlət Proqramının uğurla başa çatması və proqramda qarşıya qoyulan bütün vəzifələrin yerinə yetirilməsidir. Sevindirici haldır ki, əgər proqram qəbul olunanda 600 min iş yerinin açılması nəzərdə tutulmuşdusa, proqramın böyük uğurla icra edilməsi nəticəsində Azərbaycanda 750 min yeni iş yeri açılmışdır. Bu isə regionların sürətlə inkişafında çox böyük təkan oldu.

Dövlətimizin başçısı İlham Əliyevin vurğuladığı kimi yola saldığımız 2008-ci ildə kənd təsərrüfatı sahəsinin inkişafına da böyük diqqət göstərilmiş və böyük uğurlar qazanılmışdır: " Biz, demək olar ki, ərzaq təhlükəsizliyinin təmin olunması üçün bütün lazımi tədbirləri görmüşük və ümid edirəm ki, növbəti bir-iki il ərzində özümüzü ərzaq məhsulları ilə tamamilə təmin edəcəyik. Kənd təsərrüfatında aparılan islahatlar, fermerlərə verilən güzəştlər, dövlət qayğısı, dövlət tərəfindən verilən kreditlər bütün bunlar bizim uğurlarımızı şərtləndirən amillərdir".

2008-ci ildə dövlətimizin başçısı İlham Əliyevin düşünülmüş və ardıcıl siyasəti nəticəsində həm sosial obyektlərin tikintisi, həm əhalinin müxtəlif təbəqələrinin maddi rifah halının yaxşılaşdırılması, həm məcburi köçkünlərin, qaçqınların sosial problemlərinin həlli və məşğulluğunun artırılması, həm yoxsulluq kimi ictimai bəlanın aradan qaldırılması, həm də energetika və nəqliyyat sahəsində, bir sözlə, ictimai həyatımızın bütün sahələrində görülmüş işlər və qazanılmış uğurlar Azərbaycanın iqtisadi tərəqqisinin sürətlənməsindən və yeni mərhələyə daxil olmasından soraq verir. 2008-ci ildə qazanılan uğurlar və nailiyyətlər göstərir ki, möhtərəm Prezidentimiz İlham Əliyevin rəhbərliyi altında Azərbaycan 2009-cu ildə də dünyanın diqqətini cəlb edə biləcək daha böyük uğurlara imza atacaqdır.

Xaliq Məhəmmədoğlu

Respublika.- 2009.- 11 yanvar.- S. 1.