Fədakar alim-androloq

Gənc alim İlham Əhmədov Azərbaycanımızın füsunkar guşələrindən biri olan Qəbələnin Nohurqışlaq kəndində dünyaya göz açıb. İlk təhsilini də elə həmin kənd məktəbində alıb. Orta təhsilini əla qiymətlərlə başa vurduqdan sonra 1986-cı ildə indiki Azərbaycan Dövlət Tibb Universitetinin müalicə profilaktika fakültəsinə qəbul olunub. Universitetin Tələbə Elmi Cəmiyyətinin fəal üzvü olub, elmi konfranslarda dəfələrlə çıxış edib. O, 1992-ci ildə ali təhsilini başa vurduqdan sonra universitetdə saxlanılıb. Universitetin böyük Elmi Şurasının qərarı ilə həmin ali məktəbin Urologiya kafedrasının baş laborantı təyin edilib.

O, həmin günləri belə xatırlayır: "Urologiya kafedrasında Azərbaycan Milli Elmlər Akademiyasının müxbir üzvü, professor Südeyif İmanverdiyevin rəhbərliyi altında işləməyim gələcək elmi fəaliyyətimə işıq saldı. Elmə böyük marağımı nəzərə alan görkəmli elm xadimimiz mənə "Prostat vəzi xərçənginin diaqnostikası və müalicəsi" mövzusunda namizədlik dissertasiyası üzərində çalışmağı tövsiyə etdi. 1999-cu ildə namizədlik dissertasiyasını uğurla müdafiə edərək tibb elmləri namizədi adını aldım. Elə həmin ildə mənə çalışdığım kafedranın assistenti vəzifəsi həvalə edildi".

Lakin onu ən çox maraqlandıran ölkəmizdə çox zəif inkişaf edən androloji sahə idi. Odur ki, andrologiyanın elmi yeniliklərini həvəslə öyrənirdi.

Az sonra o, "Erektil disfunksiya (impotensiyanın) diaqnostikası və müalicəsi" mövzusunda doktorluq dissertasiyası üzərində işləməyə başladı. Bu sahənin imkanlarını dərindən öyrənmək üçün zəngin təcrübə qazanmaq lazım idi. O bu arzusunu elmi rəhbəri S.İmanverdiyevə bildirdi: "Südeyif müəllim mənim fikrimi bəyəndi. Dedi ki, Türkiyədə böyük bir dostum var - Atəş Kadioğlu, İstanbul Universitetinin tibb fakültəsinin professorudur, Amerikada təhsil alıb, indi İstanbulda androloji şöbənin rəhbəri, həm də Türk Androloji Akademiyasının prezidentidir. Hörmətli akademik məktublaşıb onun razılığını aldıqdan sonra mən 2004-cü ildə Türkiyə İstanbul Universitetinin tibb fakültəsinin androloji bölməsinə elmi axtarışlarımı davam etdirmək üçün göndərildim".

İ.Əhmədov ilk günlərdən Türkiyədə andrologiyanın elmi potensialının çox böyük olduğunu görərək daha əzmlə çalışır, praktik işlərə daha çox meyil göstərir, androloji tədris kurslarına və ən mükəmməl androloji cərrahiyyə əməliyyatlarına qatılır. 10 elmi məqaləsi Türkiyənin müxtəlif dərgilərində çap olunur. Professor Atəş Kadioğlu ilə birlikdə beynəlxalq tibb jurnalında nəşr edilən məqaləsi isə onu qonşu dövlətdə tanıdır. O, həmçinin Türkiyədə androloji tədris kitablarının hazırlanmasında yaxından iştirak edir və həmin dərsliklərdə bir neçə bölmənin həmmüəllifi olur.

2005-ci ildə gənc alim Azərbaycana qayıtdıqdan sonra professor S.İmanverdiyevin birbaşa rəhbərliyi və dəstəyi ilə Tibb Universitetinin Urologiya kafedrasının nəzdində androloji kabinet yaradılır. İnkişaf etmiş xarici ölkələrdən gətirilən tibbi avadanlıqlar və tədris vəsaitləri androloji müayinə və müalicəyə müasir yöndən yanaşmağa imkan verir.

2006-cı ildə Bakıda Azərbaycan-Türkiyə androloji birliklərinin ilk simpoziumu keçirilir. Bu tədbir Türkiyənin 17 vilayətindən gələn görkəmli tibb mütəxəssislərinin dəyərli çıxışları ilə yadda qalır. Yenə də akademik S.İmanverdiyevin yaxından köməyi ilə İ.Əhmədov 2007-ci ildə ölkəmizdə Andrologiya və Reproduktiv Təbabət Assosiasiyasının yaradılmasına nail olur. Qurum hər il elmi simpozium və toplantılar keçirir. Bu tədbirdə androloji xidmətin yaxşılaşdırılması, bu sahədə elmi yeniliklərin ölkəmizdə tətbiqi geniş müzakirə olunur, təcrübi biliklərin mübadiləsi aparılır.

Androloq-alim Avropa Androloqlar Assosiasiyasının üzvüdür. Belçikada, İtaliyada elmi konfranslarının, ötən ilin dekabrında isə Brüsseldə androloqların beynəlxalq konfransının iştirakçısı olmuşdur. Andrologiya sahəsi ilə bağlı 30 elmi məqalənin müəllifidir. Onun həmkarları ilə birgə hazırladığı monoqrafiya və metodik tövsiyələr dəyərli tibbi vəsaitdir. O, həmçinin yeni metodlarla 600-dən çox uğurlu mikroskopik (rekonstruktiv), plastik əməliyyatlar həyata keçirib.

Bu gün bacarıqlı alimimizin arzusu respublikamızda androloji mərkəz yaratmaqdır. O bu barədə deyir: "Son illər möhtərəm Prezidentimiz İlham Əliyevin rəhbərliyi ilə ölkəmizdə quruculuq işləri ilə yanaşı, bütün sahələrdə böyük irəliləyişlər vardır. Biz də hər birimiz öz sahəmizdə respublikamızın inkişafına, onun elmi potensialına kömək göstərməyə borcluyuq. Mən də androloji bir mərkəz yaratmaqla bu sahədə elmimizin xarici ölkələrin səviyyəsinə qalxmasını və bu cür xəstələrin elmi əsaslarla müayinə və müalicəsinin təşkilini qarşıma məqsəd qoymuşam".

Tanınmış androloq, akademik S.İmanverdiyevin və türkiyəli professor A.Kadioğlunun elmi rəhbərliyi altında mükəmməl bir doktorluq dissertasiyası hazırlayıb. Bu elmi əsər Türk Androloji Akademiyasının, həmçinin Ali Attestasiya Komissiyasının müsbət rəyini də alıb.

Əminik ki, fədakar alim İ.Əhmədov doktorluq adını da şərəflə daşıyanlardan olacaq və onun respublikamızda androloji mərkəz yaratmaq ideyası da tezliklə reallaşacaqdır.

İlham ƏSGƏROV,

Azərbaycan Jurnalistlər

Birliyinin üzvü.

Respublika.- 2009.- 17 yanvar.- S. 6.