Paytaxtda sərnişindaşıma işinin tənzimlənməsi uğurla aparılır

“Bakı Sərnişin Nəqliyyatı” MMC-nin bu sahədə həyata keçirdiyi tədbirlər öz bəhrəsini verir

Ölkəmizdə digər sahələrdə olduğu kimi, yol-nəqliyyat kompleksinin yenidən qurulması, nəqliyyat sisteminin təkmilləşdirilməsi, xüsusilə də sərnişindaşıma işinin tənzimlənməsi istiqamətində Prezident İlham Əliyevin rəhbərliyi altında ardıcıl tədbirlər həyata keçirilir. Dövlət başçısının Bakı şəhərində nəqliyyat sisteminin təkmilləşdirilməsi ilə bağlı müvafiq sərəncamı bu baxımdan xüsusilə önəmlidir. Sərəncamdan irəli gələn vəzifələr Nəqliyyat Nazirliyinin "Bakı Sərnişin Nəqliyyatı" Məhdud Məsuliyyətli Cəmiyyəti tərəfindən uğurla icra olunur. Belə ki, nəqliyyat naziri Ziya Məmmədovun əmri ilə təsdiq edilmiş "Bakı şəhərində sərnişin daşımalarının təşkili, idarə olunması və tənzimlənməsi, xidmətin keyfiyyətinin yaxşılaşdırılması, bu sahədə sahibkarlıq mühitinin sağlamlaşdırılması, azad rəqabətin təmin olunması üzrə tədbirlər planı"nda nəzərdə tutulmuş işlərin vaxtında və keyfiyyətlə yerinə yetirilməsi ilə əlaqədar MMC tərəfindən iş planı tərtib olunmuş və tədbirlərin icrası ardıcıl olaraq davam etdirilmişdir.

Qeyd edək ki, bu baxımdan 2008-ci ildə paytaxtımızda avtobusla sərnişindaşıma işində və taksi fəaliyyətində nəzərəçarpacaq dərəcədə dəyişikliklər baş vermişdir. Xüsusilə mikroavtobusların müasir tipli iri tutumlu avtobuslarla əvəzlənməsi şəhərimizə yeni yaraşıq verməklə yanaşı, həm də insanlar tərəfindən razılıqla qarşılanmışdır. Bütün bunlar barədə Nəqliyyat Nazirliyinin katibliyi tərəfindən ətraflı məlumat verilmişdir. Məlumatda deyilir ki, Bakı şəhərində avtobus və taksilərlə sərnişin daşımalarının təşkili və tənzimlənməsi sahəsində "Bakı Sərnişin Nəqliyyatı" MMC tərəfindən 2008-ci il ərzində müəyyən işlər görülmüşdür. Belə ki, ilk növbədə görülmüş tədbirlər nəticəsində il ərzində 48598 taksi avtomobilinə, 40729 marşrut avtobusuna "Fərqlənmə nişanları" verilmiş və dövlət büdcəsinə 2815647,00 manat məbləğində vergi ödənilmişdir.

Mütəmadi olaraq sərnişindaşıma xidməti göstərən daşıyıcıların “Fərqlənmə nişanları”nın alınmasına vaxtında cəlb edilməsi, qeyri-qanuni fəaliyyət göstərən daşıyıcıların üzə çıxarılması, onlara xəbərdarlıq edilərək müvafiq bildirişlər verilməsi və şəhərin müxtəlif yerlərində operativ tənzimləmə işləri aparılması təmin edilmişdir. Yoxlamalar zamanı müfəttişlərlə kobud rəftar edən 371 şəxsdən izahat alınmış və 63 nəfər barəsində tərtib olunmuş aktlar qanunvericilikdə nəzərdə tutulmuş qaydada müvafiq tədbirlər görülməsi üçün Vergilər Nazirliyinə göndərilmişdir. İl ərzində nəzarət şöbəsi tərəfindən texniki cəhətdən nasaz, istismara yararsız, estetik görünüşü və ekipirovkası standarta uyğun olmayan 478 avtobus marşrutdan kənarlaşdırılmışdır. Dayanacaq qaydalarını pozan, yollarda tıxac yaranmasına şərait yaradan 1010 sürücüyə xəbərdarlıq edilmiş, onlar Cəmiyyətə dəvət olunmuş və təlimatlandırılmışlar.

Şəhər nəqliyyatı sisteminə, marşrutlarına və sərnişindaşıma xidmətinə aid daxil olan təklif və şikayətləri, operativ həll etmək məqsədilə MMC-də "qaynarxətt" yaradılmışdır.

Cəmiyyətin müəssisələrində mütəmadi olaraq texniki inventarlaşdırmalar aparılmışdır. Cari il ərzində istifadəyə yararsız, fiziki və mənəvi cəhətdən tam aşınmış, sərnişindaşıma tələblərinə uyğun gəlməyən 45 nəqliyyat vasitəsi balansdan silinmişdir.

Şəhər sərnişin daşımalarında istifadə olunan mikroavtobusların iri və orta tutumlu avtobuslarla əvəz edilməsi barədə Nəqliyyat Nazirliyinin müvafiq tapşırığına uyğun olaraq, bu günə kimi sərnişindaşıma fəaliyyəti ilə məşğul olan şirkətlər tərəfindən orta və iri tutumlu 910 avtobus alınıb istifadəyə verilmişdi. Bunlardan da 314 iri tutumlu avtobus "Transqeyt" şirkəti tərəfindən gətirilib ("DAEWOO" markalı 245, "MA3" markalı 20, "MAN" markalı 49) və bu işlər davam etdirilir.

Yeni müasir tipli avtobusların təqdimat mərasimlərində Prezident İlham Əliyev və nazir Ziya Məmmədov iştirak etmişlər.

Cari il ərzində 297 sayda marşrutda avtobusların təsdiq olunmuş hərəkət sxeminə riayət etmələrinin təhlili aparılmışdır və bu işlər davam edir.

Şəhərin küçə və meydanlarında yaranan nəqliyyat tıxaclarının səbəbi daim araşdırılır, onların qarşısını almaq məqsədilə avtobus dayanacaqlarının yol ayrıcılarından, nəqliyyat qovşaqlarından uzaqlaşdırılması işləri davam etdirilir. Bununla əlaqədar, bu günə kimi avtobus marşrutları üzrə müəyyənləşdirilmiş 457 dayanacaq yerlərində Bakı Şəhər İcra Hakimiyyəti tərəfindən yeni, günün tələblərinə cavab verən dayanacaqlar quraşdırılmışdır.

Eyni zamanda, paytaxtın nəqliyyat sistemində aparılan təkmilləşdirmə işlərilə əlaqədar kiçik tutumlu avtobusların şəhərin mərkəzi hissəsinə daxil olmasının qarşısı alınmış və həmin avtobusların marşrutlar üzrə hərəkət istiqamətlərində dəyişikliklər edilmişdir. Bununla əlaqədar olaraq şəhərin mərkəzi hissəsində səmişinlərin tələbatını ödəmək məqsədilə iri tutumlu avtobusların istismarı üçün təkliflər hazırlanmışdır.

Bakı şəhərində şəhərdaxili marşrutların və taksi avtomobillərinin işini tənzimləmək məqsədilə, İntellektual İdarəetmə Sisteminin yaradılması ilə əlaqədar aidiyyəti məsələlərin müzakirəsi isiqamətində cəmiyyətin mütəxəssisləri Nəqliyyat Nazirliyinin işçi qrupunun tərkibində müvafiq sənədlərin hazırlanmasında və digər tədbirlərdə fəal iştirak etmişdir. Bu sistemin tətbiqi ilə əlaqədar avtobus marşurutlarının optimallaşdırılmış sxemləri hazırlanmış, marşurtlar üzrə dayanacaq yerləri müəyyənləşdirilmişdir. 2008-ci il mayın 19-da Nəqliyyat Nazirliyi və Koreya Respublikasının SKS&Co. Ltd şirkəti arasında "Bakı şəhərində nəqliyyat əməliyyatlarının intellektual idarə edilməsi sisteminin yaradılması üzrə işlərin, malların və xidmətlərin satın alınmasına dair Müqavilə" imzalanmışdır. Hazırda yuxarıda adı çəkilən müqavilənin müddəalarının yerinə yetirilməsi istiqamətində işçi qrup tərəfindən işlər davam etdirilir.

Eyni zamanda, Dünya Bankının dəstəyi ilə maliyyələşən "Bakı Şəhər Sərnişin Nəqliyyatı İslahatı" Layihəsinin əsas podratçı ROM Transportation Engineerinq şirkətinə layihə ilə əlaqədar müvafiq məlumatlar təqdim edilmiş və onlarla sıx əlaqələr yaradılaraq müvafiq işlər aparılır.

"2008-2009-cu illərin payız-qış mövsümünə hazırlıq barədə" "Avtonəqliyyatservis" Departamentinin 25 noyabr 2008-ci il tarixli əmrinin icrası ilə əlaqədar olaraq, Bakı şəhərində sərnişin nəqliyyatının fasiləsiz və təhlükəsiz hərəkəti təmin edilir.

Şəhər ərazisində taksi minik avtomobillərinin işini tənzimləmək məqsədilə, 32 taksi dayanacağı yaradılmışdır və həmin dayanacaqların normal fəaliyyət göstərməsi üçün dayanacaqlar sxemlərə uyğun olaraq müvafiq nişanla təmin edilmiş, bəzi yerlərdə asfalt üzərinə standarta uyğun xətlər çəkilmişdir. Eyni zamanda, bu dayanacaqlara taksi avtomobillərinin cəlb edilməsi üzrə müvafiq işlər davam etdirilir.

İl ərzində təhlükəsizlik şöbəsinin əməkdaşları tərəfindən marşurtlarda 1400 təhlükəsizlik və sərnişindaşıma qaydaları pozuntusu müəyyən edilmişdir. Aşkar edilmiş ciddi yol hərəkəti təhlükəsizliyi qaydaları pozuntularına görə sərnişindaşıma fəaliyyəti ilə məşğul olan 35 hüquqi və fiziki şəxsə təqdimatlar göndərilmişdir.

Bakı şəhər DYP-dən sərnişindaşıma marşurtlarında il ərzində baş vermiş yol-nəqliyyət hadisələri haqqında daxil olmuş məlumatlar mütəmadi təhlil edilir.

Fövqəladə Hallar Nazirliyinin-Dövlət Material Ehtiyatlar Agentliyi ilə Binəqədi Rayon Fövqəladə Hallar və Mülki Müdafiə Şöbəsilə sıx, İşgüzar əlaqə saxlamaqla bir sıra tədbirlər həyata keçirilmışdir.

DMEA-yə, MMC-nin tabeli müəssisələrində qorunub saxlanılan USO (universal texnoloji), TSO (texnoloji sanitar) avadanlıqlarının miqdarı, keyfiyyət və kəmiyyəti haqqında məlumat verilmişdır. MMC üzrə 2007-ci və 2008-ci illərin Mülki Müdafiə tədbirlər planının icrası ilə əlaqədar tərtib edilmiş hesabatlar müvafiq qurumlara təqdim edilmişdir.

2008-ci il ərzində Nəqliyyat Nazirliyinin rəhbərliyi ilə "Bakı Sərnişin Nəqliyyatı" MMC tərəfindən həyata keçirilən bütün bu İşlər ilk növbədə şəhər əhalisinə və qonaqlarına göstərilən sərnişin nəqliyyatı xidmətlərinin yaxşılaşdırılmasına, sərnişinlərin daşımalar zamanı rahatlığı və təhlükəsizliyinin təmin edilməsinə yönəldilmişdir.

"Bəkı Sərnişin Nəqliyyatı" MMC tərəfindən görülən işlər və 2009-cu ildə qarşıda duran vəzifələr barədə cəmiyyətdə bütün şöbə, xidmət və müəssisələrinin iştirakı ilə, ötən ilin dekabrın 30-da müşavirə keçirilmiş və qərara alınmışdır ki, mövcud nöqsan və çatışmazlıqlar qısa müddətdə aradan qaldırılaraq cari ildə daha uğurlu nəticələr əldə edilsin.

Ramiz YUSİFLİ,

Respublika.- 2009.- 25 yanvar.- S. 2.